MEEKYENA 24 - BIBILLYA Mareiyo Meele a Iruva

¹ Naasa Balaamu ekilollya mmbo kisennyi Nndumi Iruva, ivikya Vaisraeli Mbora, nnyaleenda sha yoo mapokyony-fo, inderuuya usavi fo kya indi kaenda na kasa.

² Balaamu kalollya Israeli vekee ufyari kwi ufyari, mumuyo wa Iruva ukansheya.

³ Kasongosya fyaaso kaongwa, Yeny Balaamu wa Beori shaamba indi, Yeto ekee mfinge miso aamba ule,

⁴ Yeto mwiita marero a Iruva, Kavelollya myoorye yakwe awe kifulufulu katarambuwa miso.

⁵ A ando afo eekaa mmbo asennyi inda, Woi Yakobo? Na mmba tafo woi Israeli!

⁶ Akavaka fyaandaa fikee fyaalale, Sha irema lyikee mbai ya mura Akavaka miri ikee mivaaye ni Nndumi Iruva muni Sha firevellya fikee mbai ya mura

⁷ Mura mmbo usheishwaa neeirikya si Neevaaya mbeu tawo ando aiyo mura mwiingyi Na mangyi waawo naitikiswa ngota Agagi Na umangyi lwakwe lurumishwa.

⁸ Iruva mmbo alensaamisa amuuta Misri, Eetiri finya sha finya ya mboo. Mmbo ashemiraa vandu va masanga yewo vakee vakiduva vakwe Navefishafisha mafua awo Navaase na mife yakwe.

⁹ Mmbo alemalallya sau sha miiso ilele, sha miiso ya kyika, mbovi akaryaa iimmatwa? Yeto mwikuvikya mbora navikyo mbora Neeto mwiikudenga nadengwa.

¹⁰ Unyafi lwa Balaki lukarwa kimaruma kya Balaamu, Balaki kakakaba makofi, kavia Balaamu, “Mmbo shilekuvaanga kusheekye idenga vakiduva vakwa, lyo yewe mmbo kwammbavikya mbora kararu sele.

¹¹ Naasa ulaalu ruuya ando kwa yoovya, mmbo shenkunda ikuniinga wiindi uniini, lyo Nndumi Iruva ankwiima wiindi.”

¹² Balaamu kavia Balaki, “A yeny shilevia-se varumi vafo valya kuleshirummya sheelyi,”

¹³ naakwa Balaki ashiniinga mmba yiishwe fesa na sahabu nshishidimaa yiimmbwa irero lya Nndumi Iruva, Iruva yekyo areraa nkyo neeny shikyaambaa.

Kisuku kya Ifurumya kya Balaamu

¹⁴ Naasany, ulaalu mmbo nkeesora vandu vakwa, na ulaalu ra shikuvie findo vandu yeva vashetannyaa vandu vafo yoo mafurummyony.

¹⁵ Kasongosia lyingyi kyaaso kyakwe, kaamba, Balaamu mwana wa Beori aamba indi, Yeto alesikywa miso aamba,

¹⁶ Yeto mwiita marero a Iruva, neemanya urango lwa yeto akee uwe ya fyoose yeto ansukuyo mbony ta muni findo fyoose. Kwakooya amwiinndya dede mmbo antarambuwa miso,

¹⁷ Shilollye, yeto ashaa lyo nshi ulaalu-fo, shikenlola, lyo nyakee kufii-fo, Nyinyiri ishefumaa kwa Yakobo Na mbiiri ya umangyi ishesalalaa yuuka kwa Israeli, Nayo mmbo ishekabakabaa vasongoru va Moabu, Neefishafisha vana vatiri kusu-kusu.

¹⁸ Edomu nawe asheturaa umangyi Seiri nayo ivaa umangyi, mmbo vekee vakiduva vakwe Elyi Israeli vashetanaa fya wiidimi

¹⁹ Mwishillya mmbo asheukaa kwa Yakobo Nashemamita yewo vasherewaa efo muriny.

²⁰ Naasa llyo kalola Vaameleki, nawo kavavia fyaaso efi kaamba, Vaameleki vekee vandu va mbee Lyo mmbo vashefurummyaa na urumato.

²¹ Naasa Baalamu karera kya Mkeni, kasongosya kyaaso kyakwe, kaamba-le; Kwafo ni ando a wiidimi, sha kifuri kikee mbombony ya iwe

²² Lyo yeni Vakeni mmbo musherumatwaa, mmbo mushipowaa mifungo mbaashuri kufike indi?

²³ Kasongosya kyaaso kyakwe kaamba, Oshiny lwao mmbovi eto akkyaa kyeeri Iruva, asheinutyaa findo efyo?

²⁴ Mashika ngalava tisheshaa tyuuka mbai ya yeeve kwa Kitimu Tishesaveesa Vaasuri ando amwi na Eberi, nawe narumatwa

²⁵ Naasa Balaamu kakwiiboo, kawuya ando akwe, na Balaki kakweete.