MEEKYENA 21 - BIBILLYA Mareiyo Meele a Iruva

Vaisraeli Vavinga Vakanaani

¹ Naasa Mkanaani we mangyi ya Aradi wa taari ya Negebu, keeta sheelyi Vaisireeli mmbo valesha na shia ya Atarimu, naasa keeboo fira indekabana na Vaisreeli, katira-fo mifungwa.

² Naasa Vaisraeli vakatereva Nndumi Iruva naambo navavike maakony awo valyamare na miri yaawo deny.

³ Naasa Nndumi Iruva kairikya, kavika Vakanaani maakony a Vaisraeli, vakavamamita wo na miri yaawo, llyo ando yoo kulefishyo Horma.

Shoka ya Arera

⁴ Vaisraeli vakauka alya ifumbuny lya Hori veesoraa shia ya mbai ya yeeve lya Shamu, varingitye uruka lwa Vaedomu, nawo vakafwa nrima, vakeereya shia yeyo.

⁵ Vandu vakakunung'unnya Iruva na Mose vakaamba, “A nkyikyi elyi muleluuta kulya Misri lushefiiya kunu kasa? Mashika nkwiifo shoonga-fo, nta mura neese mmbo lwansukyo nshoonga yei shifwafwa.”

⁶ Naasa Nndumi Iruva ekiita indo karuma shoka ta muro tikamaara vandu nnu nawo vakafwa vandu veengyi.

⁷ Naasa vandu vakasora Mose vakammbia, “Lulelyamara nnu elyi lulekunung'unnya Iruva neewe lwakutereva kuluterevye kwa Nndumi Iruva naluute shoka eti.” Naasa Mose kavaterevya.

⁸ Nndumi Iruva kavia Mose, Songosia shoka ya minya ya arera, kuivanike uve ya nri, na nndu ammaarwa n'shoka kailola, nakie.

⁹ Naasa Mose kasongosya shoka yeyo, kaivanika kirii-u, na nndu emmarwa n'shoka llya alelola shoka yei ya arera, kakyia.

Kyaaro Kutani Vaafukya Imungo lya Moabu

¹⁰ Naasa vana va Israeli vakaiboo kyaaro vakafika Oboti vakamannya-u ulale.

¹¹ Kuukau vakafika Iye-abarimu, mfo kasa ka Moabu, taari ya ngama.

¹² Kuuka-u vakafika imungony lya Seredi.

¹³ Kuuka yoo vakafika kwakulya Arnoni kasa komu, nng'u nnyanuny wa Vaamori mashika Arnoni na Moabu mmbo tifiitani;

¹⁴ Nkyo kimaruma efo kyitabuny kya fira ta vandu va Nndumi Iruva kukareiyo, Vahebi kulya Sufa, na imungo lya Arnoni,

¹⁵ na waanga lwa mamungo yoo, yooloka na Ari, kufike Moabu.

¹⁶ Kuuka-u vakafika Beeri, nng'u kirori kya mura kilya Nndumi Iruva alevavasya Mose nasanyirye-u vandu avaninnngye-u mura.

¹⁷ Na Vaisraeli vakeemba kiimbo eki, Ruka mura ewe kirori, kiimbyeny,

¹⁸ Kirori kikee kisume ni vamangyi Vaniini va vandu vakakisuma na milo yaawo. Kuuka yoo kasa eko vakafika Matana;

¹⁹ Kuuka-u vakeenda Nahalieli, kuukau vakafika Bamoti;

²⁰ Kuukau Bamoti vakafika imungo lya Moabu, alya uwe ya kidooro kya Pisga, taari ya kasa.

Mangyi Sihon na Ogu Vavingwa

²¹ Naasa Vaisraeli vakaruma varumi kwa mangyi ya Vaamori avangwaa Sihoni, vandemmbia,

²² Luniinge muumu lwiire efo urukeny lwafo, llushaanngyaa lwiire efo maremeny-fo, nta efo misabibuny-fo, nta llunaa mura wa firori fyan-fo, mmbo lusoraa shia yeyo shiniini, lwiire putu.

²³ Lyo nta Sihoni nnyaleirikya Vaisraeli veere urukeny lwakwe-fo, kyeendi mmbo alesangirya vandu vakwe vandekabana na Vaisraeli yoo kasa eko, kafika Yahasa, kakabannya-u na Vaisraeli.

²⁴ Vaisraeli vakavakaba nnu, vakashillya uruka lwawo, pookya mura wa Arnoni fika mura wa Yaboki, kufike uruka lwa vana va Amoni mashika wo veetiri finya nnu.

²⁵ Vana va Israeli vakatira miri yeyo myoose.

²⁶ Kimmba Heshboni mmbo weekee muri wa mangyi Sihoni wa Vaamori ulya ekeekabana na mangyi ya Moabu ulya eesongoye, kansoka uruka lwakwe loose, fika mura wa Arnoni.

²⁷ Nkyo kimaruma yevo varera fyaaso vakaamba, “Oshony na Heshboni, Muri wa Sihoni utanwa na yiikarwa;”

²⁸ Mashika muro mmbo uleuka Heshboni Kipalapala kya muro kikauka muriny wa Sihoni, ukalya Ari ya Moabu. Vamangyi va ando aniini kwa Arnoni.

²⁹ Oshin lwafo yewe Moabu! Mukeesarumya, yeni vandu va maruva Kemoshi mmbo kwallwa vana vakwe vakava nerishiswa kwaasha, Na vefu vakwe vaipowa ushingeny, Sihoni we mangyi ya Vaamori.

³⁰ Heshboni ukarumatwa fika Diboni, Lukavarumata lukakooya Nofa, kufii na Medeba.

³¹ Naasa nkyo Vaisraeli vakakaa urukeny lwa Vaamori.

³² Naasa Mose karuma vandu va sa urukeny lwa Yazeri, vakandetira miri yaawo vakoombuta-fo Vaamori yewo veefo.

³³ Numa vakasora shia ya Bashan nawe Ogu mangyi ya Bashani kakunda ikabana na Vaisraeli kulya Edrei, we na vandu vakwe woose.

³⁴ Kyasia Nndumi Iruva kavia Mose, “Kulamwiiryee-fo, mashika mmbo shamma immbika maakony afo, we na vandu vakwe woose, na uruka lwakwe, neewe mmbo kushentannyaa shaasa kuletannya Sihoni we mangyi ya Vaamori, ulya eekee Heshboni.”

³⁵ Vakakaba mangyi yeyo na vana vakwe, na vandu vakwe woose, valasaare-u nta nndu umwi, llyo vakashillyany uruka lwakwe.