MEEKYENA 20 - BIBILLYA Mareiyo Meele a Iruva

Mbony tilevutika kulya Kadeshi

¹ Naasa kwiikee mwiiri wa mbee ironda lyoose lya Israeli lyikaafukya kasa ka, Sini, vandu vakakaa Kadeshi Mariamu kafiiya-u, karikwa-fo.

² Nang'u nkasa koomu kulaiyoo mura Vandu vakasheya vakakuummbya yo mbee ya Mose na Aron.

³ Vakasalala na Mose vakasakya vakaamba, Kyeeshia mmwaasi kwa kooya lwefwa kyeeri kilya kyeni vana va maye veru valefwa mbee ya Nndumi Iruva!

⁴ A nkyiki elyi muleende ironda elyi lya Nndumi Iruva fika kunu kasa naambo lushefiiya-fo, yese na findo fyeru?

⁵ A mmbo kileva inda dwa iluuta kulya Misri mutani mwalweende ando yaa kukasha indi kulatiri fimu nta ndunda, nta sabibu, nta kulaiyoo mura weena?

⁶ Mose na Aron vakooka alya vandu veekai, vakafika alya yeemeny lya ikwanannya vakawa si kifulufulu, Itumbe lya Nndumi Iruva lyikavamikya.

⁷ Nndumi Iruva karera na Mose, kammbia,

⁸ Iboo nsengye ulya wafo, kusang'irye ironda lyoose, yewe na mwanama-u Aron, kuvie isimamba lya iwe elyo lyikee yoo mbee yaany lyuute mura, kuvautye-fo mura, vaonise mura vawo na findo fyawo.

⁹ Mose keepoo nsengye wakwe mbee ya Nndumi Iruva shaasa alevavasyo,

¹⁰ Mose na Aron vakasanyirya ironda lyoose yoo mbee ya isimamba lya iwe, kavavia, “Ulaalu aranyiny-te yeni filemi, a lukamuutya mura kunu isimambeny yeu ndesa?

¹¹ Mose kainwa woko lwakwe kakapa isimamba lya na nsengye wakwe kavii, mura mwingyi ukasomuka; vandu vakana na findo fyawo da.

¹² Naasa Nndumi Iruva kasakira Mose na Aron kavavia kimmba mwanra mulashikusirya yeny nisha, neeshiindya mbee ya vana va Israeli, naasany kimmba niindo, mmushevafitaa vandu yeva yefo urukeny elo shilemuniinga-fo.”

¹³ Yeu nto mura ulya va Meriba, nng'u ando vana va Israeli valekunung'unnya Nndumi Iruva nawe kawoora shaasa akee mweele nnang'ani yaao.

Mangyi ya Edomu yeema Israeli shia

¹⁴ Naasa Mose karuma varumi vauka alya Kadeshi veende kwa mangyi ya Edomu, vammbie, Mwanama-u we Israeli akuvia indi, “Yewe kwiishi nisha ngatara toose tilelukooya;”

¹⁵ shaasa vande veru valesoka na Misri, neese lukakaa-fo fyeeri fyaasha, nawo Vamisri vakalutannya findo firavi nnu, shasa valetanya vande veru;

¹⁶ na kyeeri lulefuuya Nndumi Iruva keeta kiiyo kyeru, karuma nsu wakwe nasheluuta Misri, ulaalu yese n'yaa Kadeshi lwamfika, muri yeu wa yaa nnyanuny kwafo;

¹⁷ mmbo shakutereva-dwa kuluniinge muumu wa irummbwa yoo nnang'ani ya uruka lwafo, llushiiraa efo maremeny-fo, nta lluvavaraa misabibu-fo, nta llunaa mura wa firori fyany-fo, mmbo lusoraa shia yeyo shiniini ya uruka lwafo, lulashaangya mbai nta, kutani lwafika nnyanuny mmbwa-fo.

¹⁸ Edomu kamwaallwa kammbia, Oode, mmushiraa urukeny lwakwo fo kweesa itana indo mmbo lukabanaa neeni na upanga.

¹⁹ Vana va Israeli vakaamba, “Mmbo lusoraa shia yeyo niini sheni, na kwakooya lwana mura wafo yeny na findo fyakwa shikutaa uuru lwa vayo llyo shikuniinngya muumu shiire na marende akwa, na nshikunndye kindo kingyi kyoose-fo.”

²⁰ Kammbia, “Ra nkushiiraa urukeny lwakwa-fo. Naasa Edomu kakuboo neende indekabana na Vaisraeli, keepoo nseemu wa vandu vatiri finya.”

²¹ Naasa niindo Vaedomu valelema Vaisraeli valarummbwe yoo nnang'ani ya uruka lwawo, Vaisraeli vakainduka vakaruuya shia ingyi.

Ufu lwa Aron

²² Naasa vana va Israeli vakauka alya Kadeshi, vakakooya ifumbu lya Hori.

²³ Naasa Nndumi Iruva karera-u na Mose na Aron, nkufii na nnyanu wa Vaedomu, kavavia,

²⁴ Aron akeefwa kimwi sha vande vany, mashika nnyashefikaa urukeny elo-fo, mmashika llya muleshilema alya Meriba.

²⁵ Iboo Aron na mwana wakwe we Elieseri, kuwasaamise kunu ifumbuny lya Hori;

²⁶ Uta Aron masara alya a ukohani kuvike mwana wakwe Eliasari masara yoo a Aron, llyo Aron nafweny navesanga na vakuu vakwe.

²⁷ Naasa Mose kavetana shaasa Nndumi Iruva alemmbavasya, vakasaama na kulya ifumbuu vana va Israeli veelollye.

²⁸ Vekifika-fo Mose koota Aron masara akwe kavika mwana wakwe Elieseri. Aron kafiiya-u Mose na Elieseri vakaoloka kulya ifumbuny.

²⁹ Naasa ironda lyoose lyikilollya Aron amfwa vakamuiya ando a mikonu makumi araru.