MEEKYENA 19 - BIBILLYA Mareiyo Meele a Iruva

Ifu lya ng'umbe idodorye

¹ Nndumi Iruva karera na Mose na Aron, kavavia,

² Elyi llyo ivavasyo lya ivavaso lya Nndumi Iruva alevavasya, kaamba, Via vana va Israeli vakweenngye taa ya ng'umbe idodorye ilatiri ivara nta kulore ilemmiiboo mario;

³ mweenngye nkohani Elieseri, nawe nairwaa boo ya ulale, nndu ungyi naishishe eelollye.

⁴ Lyo nkohani Elieseri nabaane samu ya vayo na nni neeishoshotya taari ya mbee ya yeema lyekwanannya yeele ka mfungare;

⁵ naasa nndu ungyi nakore ng'umbe yeyo na muro yoo mbee yakwe, shonyi ya vayo na nyama na samu na mura wa vayo fyoose fikorwa na muro,

⁶ naasa nkohani neeboo kiri kya kirevellya, na isopo na mafwaa adodorye neerye efo murony yeto we ekeekora ng'umbe yeyo.

⁷ Naasa nkohani nasangye masara akwe, nakusangye mureny naasa llyo naangen neefo ulaleny, naveva ntefusu kufike nkwaany.

⁸ Neeto akora ng'umbe yeyo nasangye soori takwe mureny, naikusangya efo mureny, nave ntefusu kufike nkwaany.

⁹ Numa llyo nndu ungyi nalakee ntefusu asheiboo ifu elyo lya ng'umbe eyo nashelyisuruma ando esha efo boo ya ulale, ifu elyo lyisurumwa fika elyi Israeli vashekuumbyaa lyive sha mura wa nraukano ando amwi na kiraso kya uravi.

¹⁰ Neeto ashiiboo ifu elyo nkuti nasangye soori takwe, nave ntefusu fika nkwaany, neeni mmbo mutanaa indo llung'anu kwa vana va Israeli, na kwa muny akee nnang'ani yaany.

Ivavaso lya yiilyiswa

¹¹ Kwakooya nndu abaana nnying'a mmbo ashevaa ntefusu ando a mikonu mfungare;

¹² nakweeremute na mura elyi nkonu wa kararu, na nkonu wa mfungare llyo asheiliswaa, lyo kanra nalakwiilyisa nkonu wa kararu lyo nkonu wa mfungare nnyasheeremukaa-fo,

¹³ Kwakooya nndu apaana nnying'a kara nalakwiilyisa, namanyi mmbo akee ntefusa yoo ando eele, a Nndumi Iruva naasa nndu yeto navikwa kwaasha na Israeli, mashika, nnyalefwallyo mura yeto wa iilyisa-fo, mmbo akee ntefusu fika ulaalu.

¹⁴ Elyi llyo ivavasyo, elyi nndu afiyya efo ulaleny, wo nndu ashaangaa neefo yeemeny elyo, neeto eefoo, mmbo ashevaa ntefusu ando a mikonu mfungare.

¹⁵ Na wo kiiya kilakee kisikye, mmbo kivaa kitefusu-da.

¹⁶ Kiwo kwakooya nndu efo muungony abaana nndu awaawa firen, ao kabaana kindo kifu, ao ifua lya nndu, ao kafika kifuny, mmbo avaa ntefusu ando a mikonu mfungare.

¹⁷ Neefo kwa nndu yeto akee ntefusu mmbo vasheiboo-fo ifu lya kiraso kya ulyamari ekyo kyeekora, na mura ukensasande na ifu fikee kiiyen kimwi;

¹⁸ llyo nndu umwi nalakee ntefusu neeboo upiti noolote efo mureny yeto, naushoshotye efo uwe ya yeema, neefo uwe ya fiiya fyoose, na vandu navafwallye neeto alebaana iffwa lya nndu mfu, ao nndu yeto alewaawa, ao kindo kifiiye ao aleira yoo kifuny;

¹⁹ neeto akee mweeremutu nafwallye yeto akee ntefusu elyi nkonu wa kararu, na wa mfungare, llyo nailyiswany, naasa nasangyeny soori takwe nooke-fo nandekusangya muren, indo nakwiilyise nkwaany.

²⁰ Lyo kwakooya nndu ammba ntefusu nalakundye ikwiilyisa, nndu sha yeto narauwa na vandu vengyi deny, mashika mmbo ashetefusaa ando yoo eele kwa Nndumi Iruva mashika elyi mura yeto wa nrauko alandefwallyo naasa we mmbo eengeraa iva ntefusu tupu.

²¹ Neelyi mmbo lyishevaa ivavasyo lya fyeeri fyoose kwany, neeto mwiiboo mura yeto wa nrauko mmbo asangyaa soori takwe, neeto abaana mura yeto mmbo avaa ntefusu kufike nkwaany.

²² Na kindo kyoose kyabaanwa ni nndu ntefusu nakyo mmbo kivaa kitefusu, na nndu apaana kindo ekyo kitefusu nawe naveva ntefusu kufike nkwaany.