MEEKYENA 17 - BIBILLYA Mareiyo Meele a Iruva

Nsengye wa Aron

¹ Numa Nndumi Iruva karera na Mose, kammbia,

² Rera na vana va Israeli, kwiipoo misengye kwawo, nsengye umwi wa wo nndu nndumi wa nrwe, shaasa mmba tawo tikai, misengye ikumi na ivii, wo nsengye kuureiye irina lya muni nsengye.

³ Nsengyeny wa Levi kureiye-u irina lya Aron, mashika ni nsengye umwi kwa nrwe wa mmba.

⁴ Neewe mmbo kuivikaa yoo yemeny yeele mbee ya isanduku elyo lya mavavaso, yoo shikwaanannyaa neeni.

⁵ Na nndu yeto nshensauwaa, nsengye wakwe mmbo usheparaa maa, neeny shirummbwe nkunung'unu yeto wa vana va Israeli uwe yaany.

⁶ Naasa Mose kavia vana va Israeli, na vaniini vawo vakamweengye misengye, na nsengye wa Aron ukakaa nnang'ani ya yeyo yaawo.

⁷ Mose kavika misengye yeyo mbee ya Nndumi Iruva yoo yeemeny yeele.

⁸ Kwiikee nkonu wa kavii, Mose kaanga neefo yeemeny yeele, nsengye ulya wa Aron wa mmba ya Levi ate wampara maa, na ivaa fivaro, na yuuta ndunda mbiiri.

⁹ Naasa Mose kasomuta velollye, vakalola neewarya wo nndu nsengye wakwe.

¹⁰ Naasa Nndumi Iruva kavia Mose, Viira nsengye wa Aron alya isandukuny, ifingywa-u uve kyaaso kwa irika elyi yeesi, naambo kufishe nkunung'unu wawo, naambo valasheefwa.

¹¹ Mose katana indo, shaasa Nndumi Iruva alemmbavavasya.

¹² Naasa vana va Israeli vakarera na Mose, vakammbia, Lolate, mmbo lwiifoo lusiaa, lwarumaka, loose deny mmbo lukeesarummya.

¹³ Wo nndu aserikyaa yoo yeemeny lya Nndumi Iruva mmbo afwaa, a ndesa mmbo lusiaa loose?