MEEKYENA 14 - BIBILLYA Mareiyo Meele a Iruva

Vandu Vakunung'unnya Mose na Aron

¹ Ironda lyoose lyikoongora vakaia, vandu vakooka misoru kio kilya.

² Naasa vakakunung'unnya Mose na Aron, woose vakavavia, Kyeevaa kyeni kukooye lulefiiya kulya urukeny lwa Misri, ao, nkyeni deny lufiiye kunu kasa eka.

³ A nkyiki elyi Nndumi Iruva alelusaamisa na kunu urukeny elu lushewaiyo-fo na usu? Vaka na vana veru mmbo vashekamarwaa mfungwa; a ndesa nshi kyeni luwuye na kulya Misri?

⁴ Vakaviana, Nndeny Luvike akida mwilutetera luwuye na Misri.

⁵ Llyo Mose na Aron vakawa si kifulufulu yoo mbee ya vana va Israeli.

⁶ Na Yosua mwana wa Nuni na Kalebi mwana wa Yefune vakaranndwa soori tawo mmbo valya valendesaiya uruka

⁷ vakarera na vana va Israeli woose vakavavia, uruka lulya luleira nafo lundelusaiya ni uruka usha nnu deny.

⁸ Kwakooya Nndumi Iruva alukunndya mmbo asheluniingaa uruka elu luve lweru nalwaate-fo nalo ni uruka lwiishwe malela na uki.

⁹ Lyo mulalemi Nndumi Iruva-fo, nta mulairyae vandu va uruka yelo-fo, mashika wo vashevaa shoonga yeeru, na turuve ilya yeevasiikye yammaa yuuto unawe Nndumi Iruva, mmbo akee neese, mulavairyae-fo.

¹⁰ Ironda lyoose lyikakunda vakapwa na mawe. Llyo Itumbe lya Nndumi Iruva lyikalollyo yoo yeemeny yeele, vana va Israeli woose vakalollya.

Mose Avaterevya Usari

¹¹ Nndumi Iruva kavesa Mose, Vandu yeva mmbo vashiminaa fika indii? Valashikusiryaa nta? Lla elyi shilevatannya ngyende yeto toose veelollye.

¹² Nshevakapaa na ndwari shiroo, shivasoke na ding'u yaawo, neewe shikuvike kuve ufyari uniini lwa vandu lutiri finya ngota wo.

¹³ Naasa Mose kavia Nndumi Iruva Llyo kyeeri Vamisri vashiitaa ekyo, mashika ni yewe kulevanta-fo;

¹⁴ naasa llyo vasheviaa vandu va uruka elo, valemmiita sheelyi nnyewe Nndumi Iruva kukaye vandu yeva, kimmba yewe Nndumi Iruva kwalollyo paa na ifishi lyafo lyikavasikyany nrwe, kwaveerya mbee, ngo ya ifishi nsanyiny, na ngo ya muro kio

¹⁵ Naasa kwakooya kwawaa vandu yeva na lyimwi sha iwaa nndu umwi, llyo vandu va masanga yewo vashiitaa mbony ta nnduma wafo vasheambaa,

¹⁶ Ni mashika elyi Nndumi Iruva alelemwa ivaata urukeny yelo evadeerye kyaasa ashevaniingaa, naasa kavarumatya efo kasa.

¹⁷ Naasany shakutereva nnu, kya wiidimi lwafo uniini Nndumi Iruva, shaasa kulerera-da, llya kuleamba,

¹⁸ Nndumi Iruva ni mfoo nalarooyoo nngoo muni ilyilya, kaveva mwisarya urekwa na uravi, nawe nta nalashaamba nrekwa ni nndu nalalyamarye, mwitaiya vana uravi lwa vande yaawo, kufike irika lya kararu na lya kaana.

¹⁹ Mmbo shakutereva kusarye uravi lwa vandu yeva, shaasa ilillya lyafo lyifye, shaasa kulelyillya vandu yeva kibookya kulya Misri kufike inu.

²⁰ Nndumi Iruva kaamba, Yeny shammbafwaaya shaasa kwaamba;

²¹ lyo kya dede, elyi shiiyoo na ulana lukaishwa itumbe lyakwa,

²² kimmba vandu yeva valellollya itumbe lyakwa na ngyende takwa, tilya shiletana kulya Misri, na kunu kasa, lyo vakashifuluta indo ka ikumi, valaarannyi ukyeni lwakwa;

²³ ni dede yakwa mbashelollya uruka elo shilevikya vande vawo kyaasa-fo, neewo woose valeshimina nkwiiyo nta umwi waawo ashelulollyaa-fo;

²⁴ Kyeendi ishinga lyakwa we Kalebi, kimmba we atiri nrima wa ngata ingyi nnang'ani yakwe kashilatya na nrima moose, we nshemfita urukeny elo alelulollya, na ufyari lwakwe vasheikaya.

²⁵ Naasany kimmba Mmeleki Nkanaani valele efo imungony, ndesi indukeny mweende kasa mwishiraa shia ya yeeve lya Shamu.

Ngapo ya Vana va Israeli Kyimaruma kya Nkunung'unu

²⁶ Naasa Nndumi Iruva karera na Mose na Aron, kavavia,

²⁷ A niinda shisheenda na ironda elyi iravi lya vandu vashikunung'unnya indii? Shammiita nkunung'unu wa vana va Israeli, shaasa vakeeshikunung'unnya.

²⁸ Vavieny, ni dede elyi shikee na muu, Nndumi Iruva aamba, shaasa yeni mulerera maaruny akwa aketa, niindo nshemutannyaa yeni;

²⁹ minying'a yaany mmbo ishewaa kunu kasa eka, na yeekyena lyany lyoose, pookya yeto atiri myaaka makumi avii na mmwasi, yewo valeshikunung'unnya,

³⁰ ni kya dede mmushangaa urukeny yelo shileipoiyo woko lwakwa naambo shimuvike-fo, kuuta Kalebi mwana wa Yefune na Yosua mwana wa Nuni.

³¹ Lyo vana vany, valya muleamba vai vashekamarwaa mifungwa, ni wo nshevafitaa-fo, vaone uruka elo mulelulema.

³² Kyeendi kyany yeni minying'a yaany mmbo ishewaa kunu kasa eka.

³³ Numa vana vany vashevaa veesa findo kunu kasa ando a myaaka makumi aana, vakamare iryo lya uravi lwawo, kutani minying'a yaany yasiiya kunu kasa.

³⁴ Kiinani na mikonu yeyo mulesaiya uruka, nkyo, mikonu makumi aana, nkonu umwi, mmwaaka umwi, mukamare uravi lwany, nnyo myaaka makumi aana, mumanye ekyo kya ishira.

³⁵ Ni yeny Nndumi Iruva shaamba, neekyo nkya dede nshetannyaa ironda elyi iravi lyoose, valekusanyirya vashilemi, vashefiiya kunu kasa.

³⁶ Naasany vandu yewo Mose alevaruma vandesaiya uruka, vakawuya, nawo vakeerese vandu nawo vakakunung'una, elyi valerera kikasha,

³⁷ vandu yewo valeende mbony shikasha ya uruka, vakafwa vakawaawa ni tauni mbee ya Nndumi Iruva.

³⁸ Indi lyo Yosua mwana wa Nuni na Kalebi mwana wa Yefuni, vakarewa-u na muu nnang'ani a vandu valya valendesaiya uruka.

Ikudeesya lya Mbee Indetira Uruka

³⁹ Naasa Mose kavia vana va Israeli marero yaa nawo vakaiya nnu.

⁴⁰ Vakakupoo elyi ngama nraasi, vakasaama ifumbuu alya masasa, vakaamba, Lolen-te nnyaa Lukai, neese mmbo lurwaa lweende yoo Nndumi Iruva aleluvikya kyaasa, mashika lulelyamara.

⁴¹ Mose kavavia, A nkyiki yeni ulaalu mufishe mavavasyo a Nndumi Iruva? Mashika, mbony yeyi nnyikivaa-fo.

⁴² Mularwe-fo, mashika Nndumi Iruva nnyakee neeni-fo, mmbo mushekapwaa, neetulwa mbee ya vakiduva vany.

⁴³ Mashika Mwameleki na Mkanaani n'yoo mbee yaany vakai, neeni mmbo mushewaawa na upanga, mashika mulewuya numa mulakilatye Nndum Iruva, nawe mbo ashemuraa.

⁴⁴ Lyo wo vakakaarya isaama fika ifumbuu, yo isanduku lya mavavaso llyileutwa kulya ulaleny-fo, nta Mose nnyalesomukafo.

⁴⁵ Llyo Mwameleki na Mkanaani valya vekee kulya ifumbuny valeoloka, vakavavingya neevakapa vakavatuula, kutani vafika Horma.