MEEKYENA 13 - BIBILLYA Mareiyo Meele a Iruva

Veesununda

¹ Naasa Nndumi Iruva karera na Mose, kammbia,

² “Ruma vandu vandesununda uruka lwa Kanaani, elo nsheningaa vana va Israeli. Wo ufyari lurumi nndu umwi eto avaa nsonguru waawo.”

³ Naasa Mose kenndya unyanga elo, karuma vandu ewo vauka alya kasa ka Parani, indi.

⁴ Ufyari lwa Ruben nsongoru alesauwa ni Shamua mwana wa Sakuri.

⁵ Ufyari lwa Simon nsongoru alesauwa ni Shefti mwana wa Hori.

⁶ Ufyari lwa Yuda nsongoru alesauwa ni Kalebi mwana wa Yefune.

⁷ Ufyari lwa Iskari nsongoru alesauwa ni Igali mwana wa Yosefu.

⁸ Ufyari lwa Efraimu nsongoru alesauwa ni Hoshea mwana wa Nuni.

⁹ Ufyari lwa Benyaminy nsongoru alesauwa ni Palti mwana wa Rafu.

¹⁰ Ufyari lwa Sablon nsongoru alesauwa ni Gadieli mwana wa Sodi.

¹¹ Ufyari lwa Manase nsongoru alesauwa ni Gadi mwana wa Susi.

¹² Ufyari lwa Dani nsongoru alesauwa ni Amieli mwana wa Gemali.

¹³ Ufyari lwa Aseri nsongoru alesauwa ni Seturi mwana wa Mikaeli.

¹⁴ Ufyari lwa Naftali nsongoru alesauwa ni Nabi mwana wa Wofusi.

¹⁵ Ufyari lwa Gadi nsongoru alesauwa ni Geueli mwana wa Maki.

¹⁶ Yewo mmbo vandu Mose alevaruma vandesaiya uruka. Hoshea we mwana wa Nuni, Mose alemfishya irina ni Yosua.

¹⁷ Mose kavaruma vandesaiya uruka lwa Kanaani, kavavia; “Rwen ulaalu mwiire Negebu mundefika kulya uwe,

¹⁸ mumanye shaasa uruka lukai na vandu va vayo, mumanye kwakooya vatiri finya ao m mbafwafwa ao vakee veengyi ao vaangu;

¹⁹ na uruka lwawo ni usha ao ni ukasha, na kwakooya vakee maronda maronda ao n'turuveny vakai;

²⁰ na kwakooya lutiri shoonga ao mwa shaa, ao kwakooya Lutiri ngorosho. Kaaryen deny mulweenngye na nndunda ta uruka elo.” Nakyo kyekee kyeeri nndunda ta misabibu ta mbee itikeevira.

²¹ Kyasia vakarwa indesaiya uruka uka kasa ka Sini fika Rehobu na Hamati

²² Vakarwa fika Negebu, na Hebron, na Ahimani, na Sheshai, na Talmai, mfo vekee vana va Anaki. Na Hebron mmuri weesongoye soani wa Misri myaka mfungare uka untano.

²³ Vakashefika imungony lya Eshikoli, nang'u vakarummbwa-u kivale kya sabibu vandu vavii vakakikurika raare, na komamanga nato, na marwaa.

²⁴ Imungo yelyo mmbo lyevaangwa Eshikoli kyeendwa ni kivale kilya kya misabibu valeutau.

²⁵ Veekimaa isaiya uruka vakawuya vammaa mikonu makumi aana.

²⁶ Vakandekooya Mose na Aron na ironda lyoose lya vana va Israeli alya kasa ka Paran kulya Kadeshi, vakaveenngye mbony, wo na vandu woose vakawoora na ndunda ta uruka elo.

²⁷ Vakavavia, “Mmbo lulefika kulya muleluruma, ni uruka lwiishwe malela na uki, na yeti nto ndunda ta vayo.

²⁸ Lyo vandu va uruka yelo vatiri finya, na miri yaawo ni turuve niini, lukavelollya-fo na vana va Anaki.

²⁹ Vaameleki mmbo vakee urukeny lwa Negebu, na Valuti na Vayebusi, na Vaamori vakakaa mafumbuu na vakanaani wo vakakaa mbai ya yeeve na mbaambaa ya Yordan.”

³⁰ Naasa Kalebi kakaarisa vandu yoo Mose akai kavavia, “nndeny lusaame sere lundetira uruka, mashika kulakooye lushevingaa.”

³¹ Lyo vandu valya valerwa nawe vakaamba, Llushidimaa irwa lundekabana na vandu yeva-fo, mashika vatiri finya ngota yese.

³² Vakavia vana va Israeli mbony shuumu kya uruka elo valendelusaiya, vakavavia; “uruka yelo llutiri shoonga timaa vandu va vayo-fo, na vandu yewo mmbo vakee vaasha nnu.

³³ Nafo lukalollyafo Vanefili, vana va Anaki, mmbo vana va Vanefili, mbee yaawo lukava sha ngallya, ni indo valelulollya.”