MEEKYENA 11 - BIBILLYA Mareiyo Meele a Iruva

Ando Kuvaangwa Tabera

¹ Naasa vandu yewo vakakunung'una, neerera findo firavi maarwiny a Nndumi Iruva ekiita karooyony unyafi, kaata muro nnang'ani yawo ukarumata taari imwi ya ulale.

² Naasa vandu vakaiya Mose, nawe Mose kavaterevya Nndumi Iruva, na muro ulya ukamanda.

³ Irina lya ando alya lyikava Tabera, kyeyaamba ni elyi muro wa Nndumi Iruva mmbo ulevaakya nnang'ani yawo.

Mose Asauwa Vasongoru Makumi Mfungare

⁴ Naasa ironda lya vandu valya variani nawo, vakatira lango, na vana va Israeli vakaiya lyingyi, vakaamba, A nkwi lushutaa nyama lulye den?

⁵ Mmbo lukeekummbwa makunga a ruu lulera veelya kulya Misri na malakuku, na nyany na fitunguu, na fitunguu saumu;

⁶ lyo ulaalu mmbo lwammuumya kunu, lulatiri nta kindo luvikye nsia kuuta mana yei sheni.

⁷ Nayo mana mmbo yeevakye mbekye ta ntama na fwana ya vayo ikava mbora,

⁸ Vandu mbofurukana isanirya, vakasa na mawe ao vakaikapya fyuuriny, numa vakaivika mureny vakasongosia mikate, nrolo wa vayo ukava sha wa mafura maiya.

⁹ Mana mmbo ileoloka na laura kyeeri ileolokya ulale kyeeri kya kio.

¹⁰ Naasa Mose keeta shaasa vandu vekeekunung'una, wo nndu yeemeny Lyakwe, naasa Nndumi Iruva karooyo nnu ni unyafi, na Mose nawe kasua.

¹¹ Naasa Mose kavia Nndumi Iruva, A nkyiki elyi kwashitannya kikasha neeny shikee ishinga lyafo? A nkyiki elyi shilaona ikiiyo misony afo, kutani kwashirika irio lya vandu eva woose?

¹² A ndesa ni yeny shileraamisa vandu yeva woose? A nyeny shileera vandu eva woose kutani kwashivia, Kurike vandu yeva, sheelyi nde wa mwana ankurikye neellela, indo kutani nshefitaa vandu yeva urukeny lwa kyaasa?

¹³ A nkwi nshutaa nyama yamaa vandu yeva woose? Mashika mmbo vakeiya neeny neeshivia, Luniinge nyama lulye.

¹⁴ Yeny nshishidimaa iipoo vandu yeva woose shimuni-fo, mashika ni iryo iroo nnu shilalyiidimaa,

¹⁵ Na kwakooya niindo kushireyaa, nkyeeni deny kwashikuwaiya, kwanshilyillya indo, naambo shilakikae na nyinyira yei.

¹⁶ Naasa Nndumi Iruva kavia Mose, sheengye vandu makumi mfungare kuvaute efo nnang'ani ya vamiku va Israeli, yewo kuveeshi mmbo ushilyi lvawo, kuveende yoo yeemeny lya ikwanannya, vasalaleu neewe.

¹⁷ Neeny mmbo nsheolokaa shirere neewe, llyo nsheipoony kyenga kya mumuyo wafo shivarike wo, llyo nawo veepoo iryo yelyo ando amwi neewe, naambo kulalyiipo yewe kumuni.

¹⁸ Naasa viany vandu yeva, kwiilyiseny mirima yaany kulaore ndesi yamfika, neeni muwonisaa nyama lulye, mashika elyi mwaiya Nndumi Iruva keeta, llya muleamba, A mmbi aluniingaa nyama, mashika elyi kulya Misri lwekee na pule. Naasany, kimmba niindo Nndumi Iruva ashemuniingaa nyama mulye.

¹⁹ Nshi mushelyaa nyama ando a nkonu umwi ao avii ao iraanu-da, ao ikumi ao a mikonu makumi ivii,

²⁰ indi mmbo mushelyaa ando a mikonu makumi araru sele, kutani nyama yeyo ishemuukyaa neeni muiswe mbueny tany, muyisue deny, imurite nrima, kimmba elyi mwalema Nndumi Iruva yeto amusongoye, mukakunung'una mbee yakwe, mukaamba, Nkyoki kileluuta Misri?

²¹ Naasa Mose kaamba, Vandu yeva nkee nawo mmbo vafikye fiku mayana arindaru, vakyeenda na marende neewe kwamba, Nshevaningaa nyama ando a mwiiri moose,

²² A ndesa ni ng'umbe na mburu iinga tishishwaa, tivamaa? Ao ndesa mmakunga moose a mureny ashesangiryoo avamaa?

²³ Nndumi Iruva kavia Mose, “A ndesa woko lwa Nndumi Iruva mmbo lwamfiiya? Ulaalu kushelollyaa kwakooya irero lyakwa lyishiinukyaa ao wode.”

²⁴ Mose kooka-u kandevia vandu marero yoo a Nndumi Iruva kakwanisya vandu makumi mfungare, vakee nnang'ani ya vamiku, vakasheringitya yeema elyo.

²⁵ Nndumi Iruva kooloka efo ifishiny, karera nawe, na yuuta kyenga kya mumuyo wa Mose kaavya vamiku valya 70, nawo vakaawuya fisuku, lyo mmbalekiengera itana indo-fo.

²⁶ Lyo vandu vavii mbo valesaa kulya ulaleny, umwi ni Eldadi na ungyi ni Medadi na mumuyo ulya ukawoolokya nao mbekee nnang'ani ya ewo vekee vadesye; indi mbesha yeemeny fo, nao vakaa kulya ulaleny veauyaa fisuku.

²⁷ Nndu umwi nkoo Karisha swany, kandevia Mose kaamba Eldadi na Medadi nkulya ulaleny mbakai veshauya fisuku.

²⁸ Yosua wa Nuni, we akee nndundi wa Mose uka udu lwakwe, karera kaamba, Woi nndumi vakwa Mose, vaimi.

²⁹ Mose kammbia, A ndesa mmbo kwavatirya nkififi kimaruma kyakwa, mmbo kyeevaa kisha mmwasi kukooye vandu va Nndumi Iruva woose vevaa veeawuya fisuku na Nndumi Iruva navaniinge mumuyo wakwe.

³⁰ Naasa Mose kandeanga na kulya ulaleny, we na vamiku valya va Israeli,

Nndumi Iruva Eende Ngwale

³¹ Uraato lukasha luuka kwa Nndumi Iruva lukeende ngwale tyuuka yeeveny, na uraato elu lukavatuula si taari toose ta ulale loose, tikasikya si koose.

³² Vandu vakakupo nkonu piti na kyio kyoose naambo vatire ngwale tilya ando a mikonu, vakasanyirya wo nndu nkuka, vakashisha vakataanika kundo koose efo ulaleny,

³³ Naasa llya vandu valya vekeelya nyama tilya Nndumi Iruva karooywa ni unyafi, Nndumi Iruva kavarikya ngapo niini nnu.

³⁴ Ando alya kukavaangwa Kibrot-hatafa, mashika yoo nng'u valerikwa valya valelya kya vaafu.

³⁵ Kupookya yoondo Kibroth-hataava vandu vekepoo kyaaro yeenda Haseroti vakandekaa efo Haseroti.