Mashora 4 - BIBILLYA Mareiyo Meele a Iruva

Petro na Yohane varawa kifingyony

¹ Kyeeri vekee irera na vandu yewo, makohani na nsongoru wa mmba ya Iruva na Vasadukayo vakavasheya,

² vakaereve nnu kimaruma kya elyi vakeelosha vandu na ivambisa mbony ta iruka lya Yesu auka kwa vafu.

³ Vakavatira vakavarwaa kifingyony fika elyi lya ngama; mashika kwemmeva nkwaany.

⁴ Llyo veengyi nnang'ani ya valya valeita irero elyo vakakusirya-u, na yekyena lya vomi veni lyikafikiya fiku firaanu.

⁵ Elyi lya ngama vasongoru na vamiku na vaarya va fitabu vakakusanyirya alya Yerusalemu,

⁶ na Anasi Nkohani nniini, na Kayafa-da na Yohane na Iskanda, na woose valya vekee va kwa Nkohani nniini.

⁷ Kyeeri valevasaleesa yoo nnang'ani, vakavavesa, Ni finya-ki na ni kwa irina lya vi mwatana nalyo yefi?

⁸ Naasa Petro, eishwe Mumuyo Mweele, kavavia, “Yeni vaniini va vandu na vamiku va Israeli,

⁹ kwakooya lwaveswa inu mbony ta kindo kisha nndu ulya mfwafwa aletannywa, na shaasa aleshiiswa,

¹⁰ manyiny yeni moose na vandu woose va Israeli sheelyi ni irina lya Yesu wa Nasareti, ulya yeni mulenkabya nsalabeeu, na Iruva kannduta kooka kwa vafu, na irina elyo nndu yeu mmbo aselelyi yaa mbee yaany ekee nsha indi.

¹¹ We mmbwe iwe elyo lyikee iile ni veetana mmba, nalyo mmbo lyammevikwa lyive iwe lya ndumba.

¹² Nta nkwiifo ukiro kwa ungyi nta umwi-fo, mashika nkwiifo irina lyingyi kwasi ya ngina vandu vakee vaniinge vakirwa llyo-fo.”

¹³ Naasa kyeeri valelollya ukaari lwa Petro na Yohane, neevamanya nshi vandu vasommyi nnu, valatiri urango, vakafulukywa, vakamanya mmbo vekee na Yesu.

¹⁴ Na vekilollya nndu aleshiiswa esalalyi ando amwi nawo mbalekiidima irera-fo.

¹⁵ Vakavaumbuta alya ikwaanuny lilya, numa vakarera wo veni na veni,

¹⁶ vakaamba, “Lukatannya inda vandu yeva? Mashika vandu woose vakee Yerusalemu mmbo valelollya ni wende uniini luletano mmbo, nta llushidimaa ilema-fo.

¹⁷ Llyo naambo kindo ekyi kilashekwaana vanduny, luvaimi deny neeverese valasherera lyingyi na nndu moose kwa irina elyi-fo.”

¹⁸ Vakavavaanga, vakavaima deny valashelosha-se na irina lya Yesu.

¹⁹ Petro na Yohane vakavavia, “Kwakooya ni usumanu mbee ya Iruva imwaarannya yeni ngota yaarannya Iruva, rumbweny yeni muveni;

²⁰ mashika yese llushidimaa ira lulaamba mbony eto lulelollya na itiita-fo.”

²¹ Naasa vekimaa ivaerese lyingyi vakavaporomwa valalollye kimaruma kyevakapa, nyelyi valeereya vandu mashika vandu woose mmbo vekee irumisha Iruva kya efyo fyoose filetanyika.

²² Mashika nndu ulya aletannywa wende elu etiri myaaka makumi aana.

Vakiloshyony va Yesu vatereva finya ya Iruva

²³ Llya valemaa iporomuwa, vakeenda kwa vandu vawo, vakavavia mbony toose tilya valevio ni vaniini va makohani na vamiku.

²⁴ Nawo vekiita, vakaonisya Iruva ngyunyanga tawo na nrima umwi nsi, vakaamba, “Nndumi ni yewe Iruva, nnyewe kutannyi iruveeu na ulana na yeeve na fyoose yefyo fiifo;

²⁵ kwi Mumuyo Mweele mmbo kulerera na kana kya ndeye weeru Davidi we nsero wafo kwaamba, ‘Ni inda vandu va masanga vakeyuushana. Na vandu va ngyufyari ta vandu vakakusara-sara ruu.

²⁶ Vamangyi va ulana vankudeesya na vasongoru vamfisha kyama. Uwe ya Nndumi na uwe ya Kristo wakwe.’”

²⁷ “Mashika ni dede, Herode na Pontio Pilato ando amwi na vandu va masanga na vandu va Israeli mmbo valekusanyirya yaa muriny yeu kimaruma kya nsero wafo mweele Yesu, yeto kulemwaamba mafura,

²⁸ naambo vatani fyoose efyo woko lwafo na wiidimi lwafo lwendeesya uka elyo mbee fitanyike.

²⁹ Naasa, woi Nndumi ulaalu kulole wiitiki elo lwawo, kwidimisye mashinga afo yaamba irero lyafo na ukaari,

³⁰ kuveorrwa woko lwafo kushiise, ngyende na myoorye fitanyike na irina lya Mwana wafo Yesu.”

³¹ Vekimaa itereva Iruva, ando alya vekai kukarinyiswa, woose vakaishurwa Mumuyo Mweele, vakaamba irero lya Iruva na ukaari.

Umwi wa vakiloshyony va Yesu

³² Na ironda elyo lya vandu va kikusiryo vakatira nrima umwi nsi na ngoo imwi nta kulakae-fo nndu aamba kindo kyoose atiri nkyakwe muni; kyaindi findo fyoose vakaallwa fyawo woose.

³³ Na Varumi valya vakauta ukureekyi lwa iruka lya Yesu na finya shiniini, na mbora shiingyi tikakaa nawo woose.

³⁴ Nta nkulekaafo nndu umwi waawo aleting'wa nkindo; mashika woose yewo veetiri marema ao mmba mmbo valekumba, vakeende uuru lwa vayo;

³⁵ vakaniingya vakiloshony, wo nndu kaniingwa-u shaasa eekunndye.

³⁶ Na Yosefu ulya Llevi wa vakiloshyony valemfishya Barnaba, (kyeamba, “Nmwana wa Iviirya Muu”). Kwawo ni Kipro,

³⁷ etiri irema kalyikumba, keengye valya vakiloshyony fesa.