Mashora 22 - BIBILLYA Mareiyo Meele a Iruva

¹ Kaamba, “Yeni vomi, vanavama vakwa na vande vakwa, kye shaarannyiny shiireraa kyakwa shimuni yaa mbee yaany ulaalu.”

² Vekiita mmbo akeerera nawo kwa Kiebrania vakaengera isyado, kaamba,

³ “Yeny ni nndu wa Kiyuda, shiwonikye Tarso, muri wa Kilikia, lyo mmbo shilelellywa yaa muriny yeu, marendeny a Gamalieli shaloshwa mavavaso a vande veru nisha nnu, sha nndu wa usasari kwa Iruva shaasa yeni muvekai inu.

⁴ Shalyisa vandu va Shia yei ya Nndumi ukiva neevawaa, shavarwaa kifingyony, ee, vomi na vaka.

⁵ Shaasa na Nkohani Nniini eshidimaa ishikureekya, na vamiku va ikwaanu woose-da, yewo shilewarya barrwa kwawo naambo shirwaye wooroye vawo, sheenda Dameski, naambo shindeende yewo veefo vashe Yerusalemu, vekee veenive naambo vasheorotwa.”

Paulo aniingya ukureeki kya ukiro lwakwe

⁶ “Naasany kyeeri sheenda, kufii shifike Dameski, kyeeri kya nsanyiny mwi usimbiki, paripari sa niini ikooka iruveeu ikashiringitya taari toose.

⁷ Shawa si, sheeta unyanga lushaambaa, ‘Saulo, Saulo nkikyi elyi kukeeshivavisa?’

⁸ Sharouwa, ‘A ni yewe vi Nndumi?’ Kashivia, ‘Yeny ni Yesu wa Nasareti, yeto yewe kukeemmbavisa.’

⁹ Valya vekee neeny valelollya sa ilya lyo mmbaleita unyanga lwa yeto alerera neeny-fo.

¹⁰ Naasa shaamba, ‘A shatana inda Nndumi?’ Nndumi kashivia, ‘Salala kwaange Dameski, neefo kushevioo findo fyoose fikee fivavasye kutani.’

¹¹ Na kyeeri shilelemwa ilollya kimaruma kya itumbe lya sa ilya, shateterwa ni maako a valya vekee neeny shaanga Dameski.”

¹² “Naasa nndu umwi evaangwaa Anania, nsaari wa isora mavavaso, akee nkureekye mesha ni Vayuda woose va efo,

¹³ kashisheya kasalala kufii neeny, kashivia, Mwanama Saulo, lola, ‘Shamwipoiyo miso akwa sa ilya sheni.’

¹⁴ Kaamba, ‘Iruva wa vande veru mmbo alekusauwa yewe kukooye imanya filya akundye, neelola yeto muni usumanu, na yaarannya unyanga lushuukaa kaniny kyakwe.

¹⁵ Mashika mmbo kushevaa nkureekyi wakwe kwa vandu woose, wa findo efyo kulelollya neefiita.

¹⁶ Naasa ulaalu nkyokyi kukeevera? Salala kubatiswa, kusangyo ngyulyamari tafo, kwiivangaa irina lyakwe.’”

Uvaango lwa Paulo kyeelosha vandu va masanga

¹⁷ “Naasa kyeeri shewuya Yerusalemu, shiiterevaa efo mmba ya Iruva, shava sheely shikee yuuma,

¹⁸ shallolya Nndumi nawe kashivia, ‘Uka yaa Yerusalemu uviny, mashika mmbasheirikyaa ukureeki lwafo kya mbony takwa-fo.’

¹⁹ Neeny shaamba, ‘Nndumi, wo veeshi sheelyi yeny mmbo shevikaa kifingyony valya vakekukusirya neevakapa efo mmba toose teeterevya.

²⁰ Na samu ya Stefano nkureeki ulya wafo kyeeri ilepusuwa, neeny nnyoo mbai shesalalyi, sheerikya, neeringa soori ta valya valemmbwaa.’

²¹ Nawe kashivia, ‘Enda, mashika yeny nshekurumaa kweende kwaasha kwa vandu va masanga.’”

²² Vakamwarannya kafikya irero elyo, vakaongora, vakaamba, “Muute yaa urukeny, mashika nkivaa nakee na muu-fo.”

²³ Kyeeri vekee irorongya na yeereera soori tawo na ifwalafwala kiluulyi uwe,

²⁴ nshilyi ulya wa vasikari kavavasya Paulo neendwa kulya turuveny, kaamba naveswa mbony takwe ekapwaa na ngova, naambo namanyi na kimaruma vakankapya kyorongye indo.

²⁵ Vekimaa imfinga na kyoove, Paulo kavia nshilyi ulya ekee kufii nawe, “A ni kindo kya usumanu ikapa nndu Mroma indi kulore anrumbuyo mwaandu?”

²⁶ Nshilyi ulya aita indo keenda kandevia nshilyi ulya nniini, “Nkyoki kukundye itana? Mashika nndu yeu ni Mroma.”

²⁷ Nshilyi nniini kasha, kammbesa, “Nkyeshivia, yewe ni Mroma?” Kaamba, “Yee.”

²⁸ Nshilyi yeto nniini kammbia, “Yeny mmbo shilewonisa Uroma na shia ya fesa shiingyi.” Paulo kaamba, “Neeny mmbo shekee Mroma kwa iwonika.”

²⁹ Naasa valya vekundye immbesa vakanrau vakeenda. Na nshilyi ulya nniini nawe keereya, llya alemanya ni Mroma, mashika a llya alemfinga.

Paulo arawa kifingyony

³⁰ Elyi lya ndesi ekundye imanya songosiny, ni kwa kiteve-ki Vayuda vakashenkumba, kamporomwa, kavavasya vaniini va makohani na shila yaawo shoose vavike ikwaanu. Kaolota Paulo, kammbika yoo mbee yaawo.