Mashora 21 - BIBILLYA Mareiyo Meele a Iruva

Kyaaro kya Paulo kya Yerusalemu

¹ Kyeeri lulemaa ilakana nawo neesama ngalava, lukafika Kosi, neelyi lya ndesi lukafika Rodo na kuukau lukafika Patara,

² lukawonisa-u ngalava yekeenda Foinike lukasaama neepoka kyaaro.

³ Lukalollyo Kipro lyo lukaira yoo woko umuso: Lukeenda lukafika Shamu yoo Tiro. Mashika yoo ng'u ngalava yeeru isheolofwaa mario iriye.

⁴ Lwikimaa ilollya vakiloshyony lukakaa-u ando a mikonu mfungare, nawo vakavia Paulo vaorwa ni Mumuyo Mweele naleende Yerusalemu.

⁵ Kyeeri lulemaa mikonu ilya lukauka-u lukakwengya, na vandu woose ando amwi na vaka vawo na vana vawo, vakalwiimya fika kipoo ya muri, lukafiirya ndi mbai ya yeeve lukatereva,

⁶ lwiikimaa ilakana lukasaama ngalaveny, nawo vakawuya kwawo.

⁷ Lwiikimaa kyaaro kyeru luuka Tiro lukafika Tolemai, lukeedikira siri neekaa kwawo nkonu umwi.

⁸ Elyi lya ndesi lukauka-fo lukandefika Kaisaria, lukaanga kyeny kwa Filipo, mwiamba Nrumi ya Nsia, umwi wa valya mfungare, lukakaa kwakwe.

⁹ Nndu yeu mmbo etiri vana va kyika vaana valandemanya nndu nndumi, veeke veawuya fisuku.

¹⁰ Naasa kyeeri lulekaa-u mikonu miingyi, nkisuku umwi avaangwaa Agabo kasoka auka Uyuda.

¹¹ Ekilukooya kaipoo nkanda wa Paulo kakufinga we muni marende na maako, kaamba, “Mumuyo Mweele aamba ule, ‘Indi niindo Vayuda va Yerusalemu vashefingaa nndu yeu muni nkanda yeu, nawo mmbo vashemmbikaa maakony a vandu va masanga.’”

¹² Naasa kyeeri luleita indo, yese na vandu va ando yoo lukamwiima nalasaame na Yerusalemu.

¹³ Nalyo Paulo karouwa, “Nkyoki-ro mukeetana, iiya na ishiwaa nrima? Mashika, yeny na mbony ta ifingwa, mmbo shikudeesye naakwa ni iwaawa efo Yerusalemu kimaruma kya irina lya Nndumi Yesu.”

¹⁴ Kyeeri alelema kilya lulemmbia, lukamalallya, lukaamba, “Ikunda lya Nndumi lyitanyike.”

¹⁵ Numa ya mikonu yei lukaipoo fiiya fyeru lukasaama yeenda Yerusalemu.

¹⁶ Vakiloshyony maata va Kaisaria vakeenda veryani neese, vakaipoo na Mnason, ni nndu wa Kipro, ni nndu wa kiloshyo wa kasha na mmbwe yeto lushekaa kwakwe.

Paulo eenda iidikira Yakobo

¹⁷ Lukifika Yerusalemu vakiloshyony vakaluwarya na nsia.

¹⁸ Elyi lya ndesi Paulo kaanga kwa Yakobo eriani neese, na vamiku woose veiyo.

¹⁹ Lwiikimaa ivaidikira, kavavia wo kindo wo kindo Iruva aletannya vandu va masanga efo urundiny lwakwe.

²⁰ Kyeeri valemaiita indo vakaarafuma Iruva, vakammbia, “Mwanama weeru, kulollye shaasa Vayuda yewo valemwaluka vakee fiku fiingyi, kyaindi woose mmbo vatirwa nkififi nnu kimaruma kya uvavaso lwa Mose.

²¹ Nawo mmbo valemmaa ivio mbony tafo, sheelyi mmbo kukeelosha Vayuda woose yewo vakee efo masangeny engyi ilakana na Mose, kwiivaviaa valarini vana vawo-fo, nta valasore mirumwa ya Kiyuda-fo.

²² Nkyoki ekyo? Nkuti vashiitaa sheelyi kusheye kunu.

²³ Naasa tanany shaasa lukuviaa. Yaa kweru kwiiyo vandu vaana vavikye kyaasa na Iruva.

²⁴ Ipoo vandu yewo, kukwiilyise nawo, kuvataiye naambo vaute mirwe yaawo, naambo vandu woose vamanyi mbony toose tilya valeita kyafo nshi indo tikaifo, kyaindi yewe kumuni mmbo kukeenda ninsha neesora uvavaso.

²⁵ Kya mbony ta vandu va masanga valya valealuka, lulereiya barrwa ya yoora uteteri lweru wo vakwiise ilya findo fileniingyo firaso kwa maruva a wongo, na samu, na findo fikee fisasande na samu, neekwiisa utuusi.”

²⁶ Naasa Paulo kaipoo vomi valya na elyi lya ndesi kakwiilyisa ando amwi nawo, numa kaanga mmba ya Iruva kaammba mbony ya imaa mikonu yekwiilyisa, kutani kiraso kisheningywaa kimaruma kya wo umwi waawo.

Paulo atirwa efo mmba ya Iruva

²⁷ Naasa kyeeri mikonu ilya mfungare ilefika kufii isya, Vayuda valya vaukye Asia vakallollya kulya mmba ya Iruva, vakasarya vandu woose, vakantira.

²⁸ Vakaongora vakaamba, Yeni vomi va Israeli lutaraminy. Yeu mmbwe nndu ulya alooshaa vandu woose wo ando vafulute vandu veru na uvavaso lweru na ando yaa. Lyingyi, mmwasi yeefyo, mmbo aleata Vagriki mmba ya Iruva, katefusa ando yaa kweele.

²⁹ Mashika mmbo alelollya Trofimu, Mweefeso ando amwi nawe kulya muriny, mmbwe yeto valekusara Paulo mmbo alemwaata mmba ya Iruva.

³⁰ Muri moose ukasavaa, vakakusanyirya uviny, vakatira Paulo, vakamruffwa na si, vakamuuta efo mmba ya Iruva, llya yeni myaango ikaraywa.

³¹ Kyeeri vekeruuya shia ya immbwaa, mbony tikafikkya nnini umwi wa vasikari kyeyamba Yerusalemu mmbo yammasana shoose.

³² Naasa keepoo askari na vashilyi kavasora swany. Nawo elyi valollya vasikari na nshilyi waawo vakamanda ikapa Paulo.

³³ Naasa nshilyi yeto na vasikari kasha, kantira kavavasia nafingwa na mise ivii, kavesa, “Ni vi yeu? A nkyokyi atana?”

³⁴ Vengyi va mamwiingyi yeto vakaongora yeva indi na vengyi ekyi. Naasa kalemwa imanya kimaruma kya kyoorongye kilya, kavavasya neendwa kulya turuveny ya vasikari.

³⁵ Kyeeri Paulo alefika ando kwiyoo fitere, vasikari vakaipoo Paulo mashika a finya ya mamwiingyi ulya.

³⁶ Mashika ironda lyilya mmbo lyekeesora, vekapaa kyoorongye na yaamba, “Utau nndu yeu.”

Paulo akureeka

³⁷ Nawe kyeeri ekeendwa kulya turuveny; Paulo kavia nshilyi ulya wa vasikari, “A shitiri mumu wekuvia kindo ndesa?” Nawe kammbia, “Kwiishi Kigriki?”

³⁸ A yewe nshi Mmisri ulya mikonuny yei aleriingya vandu valya fiku fiina, vakavaangwa veewaa, kavatetera fika kasa nng'alo?

³⁹ Paulo kammbia, “Yeny ni nndu wa Kiyuda, nndu wa Tarso, muri wa Kilikia, nndu wa muriny ulakee n-du. Shakutereva shiniinga mumu shirere na vandu yeva.”

⁴⁰ Naasa ekinninga mumu, Paulo kasalala alya fitereny, katukya vandu valya woko. Kyeeri valemalallya sau, karera nawo na Kiebrania.