Mashora 18 - BIBILLYA Mareiyo Meele a Iruva

Paulo kulya Korinto

¹ Numa ya findo efyo, Paulo kauka Atene kafika Korinto.

² Kalollya-fo Myuda umwi avaangwa Akila, awonikye Ponto; nawe mmbo asheye auka Italia mikonu ya kufii, ando amwi na nka-wakwe Priskila, ni llya Klaudio emmumbuta Vayuda woose wooke Rome, nawe kafikya kwawo,

³ na kimmba ishora lyawo lya waarya lyekee lyimwi, kakaa kwawo, vakarundya ando amwi, mashika verundaa mashora eefuma meema.

⁴ Wo sabato karera efo mmba yeeterevya, naambo noomwi Vayuda na Vagriki.

⁵ Naasa kyeeri Sila na Timoteo valesoka vauka Makedonia, Paulo kavangisa nnu irero llya, ekureekyaa Vayuda kyeyaamba Yesu ni Kristo.

⁶ Vekillya nawe ulai na yaarara Iruva, kasisika soori takwe kavavia, “Samu yaany imusheye uwe ya mirwe yaany; yeny nshitiri mbese-fo, uka ulaalu mmbo nshendaa kwa vandu va masanga.”

⁷ Kooka-u kaanga mmba kwa nndu umwi avaangwaa Tito Yusto, mwiinndya Iruva, nawe mmba yakwe mmbo yekee nnyanu na kiterevyo kya Vayuda.

⁸ Krispo, nniini wa kiterevyo ekyo, kakusirya Nndumi ando amwi na mmba yakwe shoose. Kyeeri Vakorinto veeta indo, nawo vakakusirya-u, vakabatiswa.

⁹ Nndumi kavia Paulo na yoorya kio, kulairyee-fo, rera, nta kuladeerye-fo,

¹⁰ mashika yeny shikee neewe, nta nkwiifo nndu akubaana-fo, nyelyi yeny shitiri vandu veengyi kunu muriny yeu.

¹¹ Kakaa-fo ando a mwaka umwi na miiri irindaru eelosha-fo Irero lya Iruva.

¹² Kyeeri Galio ekee nshilyi wa Akaya, Vayuda vakaanta kituuru na Paulo, vakamweende ishenkumba,

¹³ vakaamba, “Nndu yeu mmbo akee yoomwa vandu vainndye Iruva kafisha mavavaso.”

¹⁴ Naasa Paulo ekundye itarambwa kana narere, Galio kavia Vayuda, “Kukooye kweiyo kindo kyantambo ao kikasha, yeni Vayuda, kyevaa usumanu yeny shiirikyani neeni;

¹⁵ kyaindi kwakooya ni mbony ta marero na marina na mavavaso any, Loleny efyo yeni muveni, mashika yeny nshikunndye iva mwianduya findo sheefyo-fo.”

¹⁶ Kavafuna vakauka alya mbee ya kiri kilya kya mwirummbwa myaandu.

¹⁷ Nawo woose vakatira Sostene, nniini wa kiterevyo kya Vayuda, vakankapya yoo mbee ya kitima ekyo. Galio nalalollye nkindo.

Paulo awuya lyingyi Antiokia

¹⁸ Numa ya mbony eti Paulo keengera ikaafo mikonu miingyi numa kasamana na siri naambo neende Shamu na ngalava; na Priskila na Akila vakeenda nawe, kyeeri alemaa yuuta fii ta alya Kenkrea, mashika emmbika kyaasa

¹⁹ Vekifika Efeso kavatiya-fo. We muni kaanga kiterevyony kya Vayuda karera nawo.

²⁰ Lya valekunda nakee-u mmwasi we kalema;

²¹ we kalakana nawo, eshaambaa, shimuwuiyaa-se kwakooya Iruva akunda. Kasaama ngalava kooka Efeso,

²² na kyeeri alefika Kaisaria, keedikira siri, naasa kasokany na Antiokia.

²³ Naasa ekyikaa-fo mikonu mive na mive kakupoo, keera yoo nnang'ani ya uruka lwa Galatia na Frigia, muri kwi muri, ekarisaa vakiloshyony.

Apolo akeelosha Efeso na Korinto

²⁴ Naasa Myuda umwi irina lyakwe ni Apolo, awonikye Aleksandiria, ni nndu asomyi deny, kafika Efeso, nawe ekee ntakusu wa mareiyo.

²⁵ Nndu yeto mmbo elloshwa shia ya Nndumi; na kimmba nriminy wakwe etiri nkukumo, kapooka irera na ilosha mbony ta Yesu songosiny deny; lyo we mmbo eeshi ubatiso lwa Yohane weni.

²⁶ Kapooka irera nookaari kiterevyony kya Vayuda, na kyeeri Priskila na Akila valemwiita vakanrwaa kwawo, vakallosha shia ya Nndumi nisha mmwasi.

²⁷ Na kyeeri ekunndye iruuka yeeve neende Akaya, siri ikareiya, vareiye vakiloshyony barrwa naambo vambwarye; nawe kyeeri efika-fo keekya nnu valya vemmaa ikusirya-u kwi isarya lya Iruva.

²⁸ Mashika mmbo evinga Vayuda nnu kyuumu vandu woose velollye, ewooraa na mareiyo sheelyi Yesu ni Kristo.