Mashora 14 - BIBILLYA Mareiyo Meele a Iruva

Paulo na Barnaba kulya Ikonio

¹ Naasa vekifika kulya Ikonio vakaanga mwiindeny wa Vayuda, na shaasa llya valerera, ironda iniini lya Vayuda na Vagriki vakakusirya-u.

² Kyaindi llyo Vayuda valya valandealuke vakafuluta vandu va masanga vakavaishura nrima nkasha kwa valya venkusirya.

³ Naasa vakakaa-fo kyeeri kyaasha, vereraa na ukaari vekayo ni Nndumi, yeto alekureekya irero lya isarya lyakwe, kavalyimya ngyende na findo filandelollyo fitanwa mmbo.

⁴ Lyo yewo vekaa miriny vakaraukana; maata vakakaa kyaalu kya Vayuda na vengyi kyaalu kya Varumi.

⁵ Numa Vayuda veshaakana na vandu va masanga amwi na vaniini vawo vakakusara itannya varumii makasha.

⁶ Varumi vakawonisa mbony yeto vakarishya Listra na Derbe ikee miri ya Likonia na ngyuruka ta nnyanuny,

⁷ vakakaa-fo, veshaambaa Nrumi ya Nsia.

Paulo na Barnaba kulya Listra na Derbe

⁸ Neefo Listra kweifo nndu umwi, ekee, kitongororo uka elyo awonika kwa maye, nnta nnyemwiidima irua-rua-fo.

⁹ Nndu yeto mmbo ekee iirannya Paulo eshaamba Nrumi ya Nsia. Paulo kallola kyuumu kamanya atiri kikusiryo kya inshiisa.

¹⁰ Nrumi kakooma na unyanga uniini, kammbia, “Salala shumu na marende afo.” Kasalala swany, kapooka yeenda.

¹¹ Naasa nsemu ulya wikilollya filya Paulo atana vakaonisa ngyunyanga tawo vakaamba kwa Kilikaonia, Maruva allusheya veeke sha vandu.

¹² Barnaba vakamfishya Zeu, na Paulo vakamfishya Herme mashika elyi we eekerera.

¹³ Nkohani wa Zeu eetiri mmba yeeterevya yekee yoo mbee ya muri ulya, keende ng'umbe na ngyureto na fivaro fika yoo mwaangony, kakunda iniingya firaso ando amwi na nsemu ulya wa vandu.

¹⁴ Kyeeri Barnaba na Paulo valemanya, vakaranndwa soori tawo, vakaangusya yaanga kulya vanduny vakakooma,

¹⁵ vakaamba, “Nyira vomi, nkikyi elyi mwatana indi? Yese neese ni vandu va vandu kimwi sheeni moose, mmbo lwamoongoya Nrumi ya Nsia, naambo mwiinduke neera mbony yeti ta tangalu, na iindukya Iruva yeu akee na muu, yeu aleumba iruveeu na ulana na yeeve-da na fyoose fiifo;

¹⁶ mmbwe yeto kasha alera vandu va masanga vasore shia tawo veni.

¹⁷ Lyo nalare nakae nalatiri ukureeki, mashika aletana mesha, kamuniinga mmbwa yakwe yuuka iruveeu, na kyeeri kya fimu, kawuutisa miri yaany shoonga na nsia.”

¹⁸ Na kwa marero yoo kyikava kiroo kwawo iima nsemu ulya wa vandu ivautya firaso.

¹⁹ Kyaindi Vayuda vakasha vauka Antiokia na Ikonio vakaaya mamwiingyi ulya wa vandu kutani vakapa Paulo na mawe, vakanrufwa na si fika kipoo ya muri, veekusarye mmbo ammaa ifwa.

²⁰ Llo kyeeri vakiloshony venndingitye taari toose, kasalala, kaanga na kulya muriny; na elyi lya ndesi kauka-fo, keenda ando amwi na Barnaba fika Derbe.

Paulo na Barnaba vawuya na Muriny Antiokia ya Siria

²¹ Naasa ekimaa yaamba Nrumi ya Nsia kulya muriny ulya, neewonisa vakiloshyony veengyi, kawuya-se na kulya Listra, Ikonio na Antiokia.

²² Vakavangisa mirima ya vakiloshyony, neevaikima vakae iirikyony lyilya, na ekyo sheelyi nkuti lwaange umangyiny lwa Iruva na mavina meengyi.

²³ Naasa vekimaa ivika vamiku va siri, na itereva ando amwi nawo neekotoya, vakavavika maakony a Nndumi yeto vankusirye.

²⁴ Vakaira yoo nnang'ani ya Pisidia vakafika Pamfilia.

²⁵ Nawo vekimaa yaamba Nrumi ya Nsia efo Perge vakaoloka vakafika Atalia.

²⁶ Naasa kuuka yoo vakeenda kyaaro kya mureny fika Antiokia. Efo mfo valeterevyo isarya lya Iruva kyeendwa ni ishora llya vemmaa ilyirunda.

²⁷ Llya valefika indi vakaumbya siri, vakavaongoya findo fyoose Iruva aletana ando amwi nawo, na kyeyaamba Iruva mmbo alemmaa iruya vandu va masanga mwango wa iirikyo.

²⁸ Vakairisha-fo kyeeri kyaasha kyaangu ando amwi na vakiloshyony.