Mashora 12 - BIBILLYA Mareiyo Meele a Iruva

Siri yengera ikapwa

¹ Kwiikee fyeeri efyo fyeni mangyi Herode kasisya vandu vave siri.

² Kawaa Yakobo mwanamaye wa Yohane na usu.

³ Na ekilollya mmbo kilesenya Vayuda kawuya itira na Petro nawe. Mikonu yeyo yekee mikonu ya mikate ilatiri ntarang'o.

⁴ Kyeeri alemaa intira kammbika kifingyony maakony a ngyulimali ta vasikari vaana vaana, vamwiise naambo numa ya pasaka nansomute neenrambikkya vandu.

⁵ Naasa Petro kavikwa kifingyony. Nalyo siri ikatereva Iruva nnu kimaruma kyakwe.

Petro Alotoro Auka Kifingyony

⁶ Kyikava kyeeri Herode ekundye imuuta-fo, kio ekyo kyeni Petro elele nnang'ani ya vasikari vavii, eekemfinge na mise ivii, na varingyi yoo mwaangony veeringaa kifingyony ekyo.

⁷ Pari-pari nsu wa Nndumi kashesalala yoo akai, sa ikamika kulya mmba, nsu wa Nndumi kantukuva yoo uvariny, kamwaanta kammbia, Kweete uviny. Mise ilya ikasuruka efo maakony ikawa si.

⁸ Nsu ulya wa Iruva kammbia, “Kwiinive, kurae fyaaru fyafo.” Katana indo. Kawuya immbia, “Raa soori tafo, kwashisora.”

⁹ Kasomuka kansora; nta nalaitumuso sheelyi ni dede kindo nsu yeto atana, we kakusara mmbo akee yoorya tupu.

¹⁰ Llya valeira kiringyony kya mbee na kya kavii, vakashekooya ngiri ya minya yeaanga kulya muriny, mwaango ulya wa ngiri ukarwiika to mweni. Vakasomuka vakashekooya shia imwi, nsu ulya kanra-u.

¹¹ Kyeeri Petro alemarukya-fo, kaamba, “Ulaalu shammanya na nshushwa sheelyi Nndumi mmbo anruma nsu wakwe nasheshuuta maakony a Herode ave ando ufyari loose lwa Vayuda lushevikaa nsia.”

¹² Na kyeeri ekeekusara efyo fyoose kashekooya amfika kyeny kwa Maria, we maye wa Yohane ulya evaangwaa ni Marko; nafo kweefo vandu veengyi vesasangyi-fo veeterevaa.

¹³ Nawe kyeeri alekakapa mwaango wa ngiri yeyo, kyishinga kyimwi kyevaangwaa Roda kyikashearannya.

¹⁴ Kyeeri alemanya ni unyanga lwa Petro, nnyalerua mbele ngiri-fo, kyeendwa ni ifura, lyo mmbo alerisha mbele, kaanga mmba kavavia sheelyi Petro mmbo asalalyi yoo mbee ya ngiri.

¹⁵ Vakammbia, “Ni ukwale lukutiri-ro!” Kyaindi we karumisha deny sheelyi niindo kyikai. Vakaamba ni nsu wakwe.

¹⁶ Petro keengera ikakapa; naasa kyeeri valenduya, vakallollya vakaawukwa.

¹⁷ Llyony alevatukkya woko naambo vamalallye, kavaongoya shaasa Nndumi alemuuta kulya kifingyony. Kaamba, “Endevieny Yakobo na valya vengyi mbony eti.” Kauka-u keenda kundo kungyi.

¹⁸ Naasa kwikyikya vasikari vakeereve nnu, mmbo kyava inda kya Petro.

¹⁹ Na Herode kyeeri alennduuya nalallolye, neekyivesa-vesa varingyi valya, kavavasya vawaawa. Naasa Herode kasama kooka Uyuda kandefika Kaisaria, kakaa-fo.

Ufu lwa Herode

²⁰ Na Herode emmiswa nnu kimaruma kya vandu va Tiro na Sidoni; vakamweengya na nrwe umwi nsi, nawo vammaa iitana na Blasto, yeto mwikallya kiria kya mangyi kyeelala, vakatereva ufoo mashika uruka lwawo llwewonisaa shoonga yuuka urukeny, lwa mangyi.

²¹ Naasa nkonu umwi ukee n-deerye, Herode karaa masara a kimangyi, kakaa rembo kitiminy kya umangyi, karera mbee yaawo.

²² Vandu vakakapa ngaya vakaamba, “Elu ni unyanga lwa Iruva muni, nshi unyanga lwa nndu-fo.”

²³ Naasa nsu wa Nndumi kankapa, ni llya ara nalaniinga Iruva nnduma; kalyiwa nshoka, kakumba muu kafwa.

²⁴ Irero lya Nndumi lyikaengera ikwaana.

²⁵ Na kyeeri Barnaba na Saulo valemaa iinutya urundi lwawo, vakawuya vauka Yerusalemu, vakeenda veerie Yohane evangoo Marko ando amwi nawo.