Marko 11 - BIBILLYA Mareiyo Meele a Iruva

Yesu aanga Yerusalemu na ifura

¹ Na elyi veefo vaparikyaa kulya Yerusalemu vamfika kulya Betifage na Betania nng'u ifumbuny lya miri ya mafura, nalyo karuma vakiloshyony vakwe vavii.

² Kavavia, “Endeny efo kimuriny ekyo kisumani na yaa mukai. Mukamfika-fo nalyo yeni mushekooya ngashe ya nshungu ikee shaavike. Yaauweny musheenngye!

³ Na kwakooya nndu amuvia, a nkikyi elyi mwatana indo? Mbieny ni Nndumi atiri kindo aikunndye! Nawe asheirikaa-se na kyaangu iwuye na yaa.”

⁴ Vakeenda vakavekooya ngashe ilya ya nshungu ikee shaavikye yoo mwaangony wa mmba yoo kipoo yoo ilemmyony lya shia.

⁵ Na vandu vasalali-u maata vakavia, “A nkikyi elyi mwauwa ngashe yeyo?”

⁶ Nawo vakavavia indo-da shaasa Yesu aamba. Vakavara.

⁷ Vakarwaa ngashe ilya na kulya Yesu akai. Vakaala soori tawo ta yeerya efo mungony wa vayo. Nawe kasaama-u, kakaa-u rembo.

⁸ Na vandu veefo vengyi vakaala soori tawo ta yeerya efo shia. Veengyi-se vakaala-u maramba vamanya efo mareminy.

⁹ Nalyo valya vasongwa vakasanga na valya vasha numa, vakaonisa ngyunyanga vashaambaa, “Kundearafumwa yeto asha arumwa ni Nndumi!

¹⁰ Kundearafumwa umangyi lwa nde weeru Davidi lwiifo lushaa! Hosiana efo uuwe iruveeu!”

¹¹ Nalyo kafika kulya Yerusalemu alya poo ya mmba ya Iruva. Kalola-fo findo fiiyo fyoose, kakwaanisa kakooya kwameenda nnu kwishiilaa. Kakwiipoo-fo keenda kulya Betania aryani na valya ikumi na vavii.

Yesu adenga nri wa nkuu

¹² Na elyi lya ndesi ngama, elyi veefo vashuukaa kulya Betania katirwa nshaa.

¹³ Nalyo kalollya nkuu wa nndeny ukee kwaasha wamoora maru. Kasha nau kaamba kulakooye alollya-u kindo. Ashe na yoo ukai, nta nalakooye-u kindo kulaore ni maru meni. Mashika kulandefika kyeeri kya ndunda-fo.

¹⁴ Nawe kauvia, “Kulakikae-se nndu alya ndunda kunu kwafo na kufike llung'anu-fo.” Na valya vakiloshyony vakwe vakakiita.

Yesu aanga mmba ya Iruva

¹⁵ Naasa vakafika kulya Yerusalemu. Nawe kaira na efo poo ya mmba ya Iruva. Kapooka yaanta-fo valya veefo veekumbaa na yuura findo efo poo ya mmba ya Iruva. Kavefullwa na mesa ya valya vealasha fesa na firi fyeekaya fya valya veekumba mbeta.

¹⁶ Nta nalalekeye nndu kaira na efo poo ya mmba ya Iruva arie kindo.

¹⁷ Kavalosha kavavia, “A mmbo kilakee kireiye kyeamba, ‘Mmba yakwa mmbo ivaangwaa mmba yeeterevya ya vandu va masanga moose?’ Neeni mukawuya iyaallwa mbanga ya veala shia.”

¹⁸ Nalyo vakohani valya vaniini na veelosha mavavaso vakeeta. Vakasia mwaanya shaasa vemmbwaa. Nyelyi vamweereiye, mashika vandu valya vakuummbye-u mamwiingyi woose vatirwa nntamba kya kiloshyo kilya kyakwe.

¹⁹ Na wo nkonu elyi kwafika iila kaveuka kulya muriny.

Kya nkuu ulya uleuma

²⁰ Naasa elyi lya ndesi ngama vashiiraa efo shia vakakooya nkuu ulya wamuuma upookya miraariiny.

²¹ Na Petro kakummbwa kammbia, “Llosha llate nkuu yeto kuleudenga, ekakato wamuuma.”

²² Na Yesu kaallwa kavavia, “Veny vekusirya Iruva!

²³ Nkya dede shamuvia, wo nndu avia ifumbu yelyi, ‘Ipowa yaa kukai kundeerwa efo yeeveny,’ kara nalatirwa nnyimyira efo nriminy, kakusirya-u deny, mmbo kishevaa indo-da shaasa amaamba, naasa ni indo ashewonisaa.”

²⁴ Kimmba niindo, neeny shamuvia, “Findo fyoose muterevaa efo kwa Iruva na ifyooshora, kevekusiryeny-ng'u mmbo mwammeefiwarya, nalyo mushefiwonisaa tupu.

²⁵ Na kyeeri musalalyi-u mwiiterevaa, kwakooya mutiri mwaandu na nndu, mfwaayeny, naambo na Nde waany wa efo iruveeu navemufwaaya yeni kya efyo mulyamarye. [

²⁶ Indi kwakooya kulaore yeni mwafwaaya vandu, nta Nde yeto waany wa efo iruveeu nnashemufwaayaa yeni kya ngyulyamari tany-fo.]”

Wiidimi lwa Yesu

²⁷ Nalyo vakafika lyingyi kulya Yerusalemu. Naasa elyi eefo arua-ruaa efo poo ya mmba ya Iruva, kasheywa ni vakohani vaniini na vaarya va fitabu na masiingo a vandu.

²⁸ Vakashemmbia, “A ni wiidimi lwa ngata-kyi kwatana nalo findo efi?”

²⁹ Naasa Yesu kavavia, “Reny shimuvese kindo kimwi, neeny mushaallwe, llyo na yeny nshemuviaa kya mumu yeto shitiri shatana nato indo mmbwa ngata ingai.

³⁰ A ubatiso lulya lwa Yohane kundo luukye nkwi, ni efo iruveeu, ao ni kunu vanduny ndesa? Shirouweny ekyo.”

³¹ Nawo vakaumburana wo veni na veni, vakaamba, “Kwakooya lwaamba, ‘Ni lwa efo iruveeu’, mmbo asheluviaa, ‘Naambo kyi mulamwiirikyeeny?’

³² Na kwakooya lwaamba, ‘Ni lwa kunu vanduny’, nkivaa-fo, mashika vandu woose veeshi Yohane mmbo akee nndu nkisuku dede.”

³³ Naasa vakarouwa Yesu vakaambia, “Llwiishi-fo.” Nalyo Yesu kavavia, “Nta yeny nshimuviaa kya mumu shitiri shatana nato indo mmbwa ngata ingai-fo.”