Mapookyony 8 - BIBILLYA Mareiyo Meele a Iruva

Mmbwa Niini Yamanda

¹ Iruva kakumbwa Noe ando amwi neefyo fitiri muu fyoose. Na fyuumbe fyoose efyo fyekee nawe efo safininy, Iruva kavivita uraato uwe ya uruka na mura ukaanngwa.

² Ngyusoka tikamanda na matirisha a iruveu nang'u, mmbwa ya iruveeu ikamanda.

³ Mura ukasimbika ulaniny, ando mikonu iyana na makumi araanu mura ukaanngwa.

⁴ Nkonu wa ikumi na mfungare wa mwiiri wa mfungare, safina ilya ikatemirwa ifumbuny lya Ararati.

⁵ Mura ukaengera yaanngwa fika mwiri wa ikumi. Mwiri yeto wa ikumi, nkonu wa mbee ngyuroro ta mafumbu tikalollywa.

⁶ Numa ya mikonu makumi aana, Noe karrwa itirisha lya safina.

⁷ Kasomuta ikukuru, nalyo llyewuya-fo, lyikarumbuka efo neefo, kutani mura woomya urukeny.

⁸ Numa kaekeya mbeta naambo nalole kwakooya mura wammaangwa ulaniny.

⁹ Lyo mbeta ilya nnyilelollya ando eevarya-fo, ikawuiya Noe efo safininy mashika elyi mura weewalyi-walyi ulaniny koose, nawe kaorrwa woko kaitira kayaata-se kulya safininy.

¹⁰ Kairisha se mikonu mfungare; kasomuta-se mbeta ilya lya kavii.

¹¹ Mbeta ilya ikambuiya nkwaany iirye iru lya nri wa nsenefu kaniny kya vayo, naasa Noe kamanya sheelyi mura mmbo wammangwa ulaniny.

¹² Kairisha-se mikonu mfungare, kailekeiya-se nayo ilambuye lyigyi.

¹³ Naasa kikavaany nkonu wa mbee wa mwiiri wa mbee nkonu Noe alefita myaaka mayana arindaru na umwi, mura ukaumya ulaniny. Noe kauta-u kifiniko kya safina, nawe kalollya sumbai yammaa yuuma.

¹⁴ Na mwiiri wa kavii, nkonu wa makumi avii na mfungare, sumbai yemmuuma.

¹⁵ Iruva kavia Noe,

¹⁶ “Somuka efo safininy, yewe na nka wafo, na vana vafo na vaka va vana vafo.

¹⁷ Kusomute-fo wo kindo kitiri muu kikee neewe kitiri mwiili, ndeye na mafisi, na wo kindo kirufukaa si fiishwe ulaniny fyengere ifwarika na ifumbuka.”

¹⁸ Naasa Noe kasomuka-fo, we na nka wakwe na vana vakwe na vaka vawo.

¹⁹ Wo ifisi na kikufurwaa si, wo ndeye, na ekyo kyoose kyirrwaa urukeny kya wo ngata, fikasomuka kulya safininy.

Noe Aniingya Kiraso

²⁰ Noe katana kitara kyeerasya Nndumi Iruva kauta wo ifisi isha, na wo ndeye shisha, kafyuuta five kiraso kyerumatwa na muro yoo kitareny kyerasya.

²¹ Nrungo ulya wa kiraso ukasennya Nndumi Iruva. Nndumi Iruva kaamba efo nriminy, “Nshikidengaa-se uruka kimaruma kya nndu wa vandu fo, mashika makusaro akwe mmbo akee maravi uka ukoo lwakwe; nta nshisherumataa-se ekyo kyoose kikee na muu shaasa shiletana-fo.

²² Kyeeri ulana luiyo, fyeeri fya ivaaya, na iilula, kyeeri kya mbeo na kyeeri kya nrike, kio na nsanyin, mfishemandaa-fo.”