Mapookyony 7 - BIBILLYA Mareiyo Meele a Iruva

Mmbwa Shiniini ya Mifu

¹ Nndumi Iruva kavia Noe, “Anga safininy ando amwi na va mmba yafo woose, mashika elyi shilelollya yewe kukee wa usumanu mbee yakwa nnang'ani ya vandu.

² Efo mafisiny myelise moose utau mfungare, mfungare lya kyuumi na lya kyika, na efo mafisi yoo matefusu avii, avii nsi a kyuumi na kyika.

³ Ipoo ndeye mfungare ta kyuumi na mfungare ta kyika, naambo kularete ufyari lya vayo yaa ulaniny.

⁴ Mashika kusiaa mikonu mfungare neen nshendee mmbwa niini ulaniny, ando a mikonu makumi aana kio na nsanyiny na wo kyuumbe kyiiyo shilekiumba nshekirumataa.”

⁵ Nawe Noe katana indo shaasa Nndumi Iruva alemmbavasya.

⁶ Noe mmbo etiri myaaka, mayana arindaru kyeeri yekyo kya mmbwa niini ya mifu ulaniny.

⁷ Noe kaanga safininy, we na nkaakwe, vana vakwe va kyuumi na vaka vawo kyeendwa ni mmbwa yeyo ya mifu.

⁸ Na mafisi yoo myeeremutu, na yoo alekee myeeremutu na ndeye, neefyo fikufurwaa si

⁹ fikaanga safininy yoo Noe akai, fivii, fivii kya kyuumi na kya kyika, shaasa Iruva alevavasya Noe.

¹⁰ Naasa kwikisia mikonu yeyo mfungare, mmbwa yeyo nniini ya mifu, ikakapa mura ukaishywa ukapooka isikya ulana.

¹¹ Noe kafika myaaka mayana arindaru, kwikee mkonu wa ikumi na mfungare mwiiri wa kavii, ngyusoka shoose tikaruka mura mwiingyi nnu, na ngina ikapusswa mmbwa shiingyi deny.

¹² Mmbwa ikakapa urukeny, ando a mikonu makumi aana kio na nsanyiny.

¹³ Nkonu yeto mweni mmbwa ilepooka ikapa, Noe, nka wakwe, vana vakwe wo Semu, Hamu na Yafeti, na vaka vawo vakaanga neefo safininy,

¹⁴ ando amwi na wo ngata ya ifisi lya ngoroshon, na findo fyevikkya, neefyo firufukaa si, fikuruffwaa efo sumbai, neefyo firumbukaa na ndeye.

¹⁵ Fikaanga safininy yoo Noe akai, fivii fivii, wo kimwi ekyo kitiri muu.

¹⁶ Neefyo fileanga nafo, mmbo fyeeke fya kyuumi na fya kyika, shaasa Iruva alevavasya; Nndumi Iruva kanraiya-fo.

¹⁷ Mmbwa yeyo niini ikasha ando a mikonu makumi aana, nato mura ukafumbuka ukaipoiyo Safina uwe ikakyeleya yoo uwe ya mura.

¹⁸ Mura ukatira finya ukaingyifwa deny, na safina ilya ikakyeleya yoo uwe ya mura.

¹⁹ Mura ukaingyifwa nnu ulaniny, na mafumbu moose akee si ya ngina akasikkywa mmura.

²⁰ Mura ukaingifwa ukasikkya mafumbu waasha lwa mita mfungare.

²¹ Fyoose fikee na muu ulaniny fikafwa, na ndeye na findo fyeevikkya, na wo ifisi lya ngoroshony, na wo kindo kikufurwaa kishafwaa efo si, na wo ndu wa vandu;

²² wo kindo kitiri mumuyo wa muu kikafwa, wo kimwi ekyo kyekee ando oomu.

²³ Wo kimwi kikee na muu ulaniny kikamamitwa kupookya ndu wa vandu kufike findo fyevikya neekyo kikufurwaa si, na ndeye ta nginii-u, fikamamitwa kunu ulaniny, kasaau Noe muni, ando amwi neewo vakee nawe efo safininy.

²⁴ Mura ukakaa witiri finya ando a mikonu iyana na makumi araanu.