Mapookyony 6 - BIBILLYA Mareiyo Meele a Iruva

Uravi lwa Vandu

¹ Naasa kyeeri kilya vandu valepooka ifumbuka urukeny, na vakaira vana va kyika.

² Vana va kyuumi va Iruva llyo valesennyo mmbana yewo va kyika va vandu vekee washa vakakooryafo shaasa vakunda.

³ Nndumi Iruva kaamba, “Mumuyo wakwa mbushelung'anaa na vandu yeva mikonu simu-fo, mashika nawo ni fyuumbe. Kyasia myaaka yakwe ishevaa iyana na makumi avii nsi.”

⁴ Vanefili veefo urukeny, kyeeri ekyo na numa ya vayo-da vana yewo va Iruva elyi valekaa na vana yewo va kyeny va Vandu, vakaira nawo vana. Yewo elyo kasha mmbo vekee vandu vakaari vatiri finya na irina lyawo lyikamanyika.

⁵ Kyeeri Nndumi Iruva alelollya uravi lwa nndu wa vandu ni uniini ulaniny na wo ikusaro lya nrimin wakwe mmbo lyikee iravi wo nkonu.

⁶ Nndumi Iruva kakurrya elyi aleumba nndu ulaniny kasokkywa mfyoova nriminy.

⁷ Nndumi Iruva kaamba. “Mmbo nsherumataa nndu yeu shilemuumba yaa ulaniny, nndu wa vandu na mafisi na ekyo kirufukaa-si na ndeye. Mashika mmbo shakurya nkiki elyi shilevaumbany.”

⁸ Kyeendi we Noe kakooya isenya efo kwa Nndumi Iruva.

Mbony ta Noe

⁹ Yaa nng'u marika a Noe. Noe kava nndu wa usumanu, nndu nsha efo irikeny lyakwe. Noe keenda ariani na Iruva.

¹⁰ Noe kaira vana vararu va kyuumi mmbo: Semu, Hamu na Yafeti.

¹¹ Ulana lukalyamarika usanguny lwa Iruva, ulana lukaisshwa ngapanu na uwai.

¹² Iruva kalollya shaasa ulana lwalyang'a, mashika wo nndu mmbo ekelatya shia ya uravi ulaniny.

¹³ Iruva kavia Noe. “Vandu vammishura ulana ngapanu na uwai, naasany nshevalyamaraa vandu ando amwi na ulana.”

¹⁴ Songosia Safina niini ya mbau ta kidamwa kuvike-fo firya, kuyaambye-fo laami nisha mmba na kyipoo.

¹⁵ Ni indi kushetanaa; mita iyana lyimwi makumi araru na kyeenda llo waasha lwa safina eyo, mita makumi avii na isaanu llyo ivari lya vayo, na mita ikumi na isaanu ni waasha lwa yeenda uwe.

¹⁶ Na yoo mbariny ya vayo vika-u mwaango, kuvike kai firaaru; kya si, kya kavii, na kya karaaru.

¹⁷ “Lola-te! Nsheende mmbwa nniini ya mifu urukeny, ilyamare wo kyuumbe kyiiyo kitiri muu na wo kindo kikee ulaniny kiffwe.

¹⁸ Lyo nshelyaa mma ivanngyi neewe. Kusheangaa efo safininy, yewe na nka-afo na vana vafo, na vaka vawo.

¹⁹ Na wo ifisi kwiipo avii, lya kyuumi na lya kyika safininy, naambo fikkye muu amwi neewe.

²⁰ Kwaate-fo fivii wo ngata ya ndeye na ifisi wo ngata ya ifisi, na efyo fifurukaa si, naambo fikkye muu efo safininy.

²¹ Kwiipoo shoonga ya wo ngata ivaa ilya kuisurumi, nnyo ishevaa shoonga yaany na fyuumbe efyo.”

²² Ni indo Noe aletana shaasa Iruva alembavasya.