Mapookyony 50 - BIBILLYA Mareiyo Meele a Iruva

¹ Yosefu kawoya ndeye efo kisanguny, kamuiya kammiminda.

² Yosefu kavavasya vandu vakwe valya vakee vavavari, vaambe ndeye miri naambo nalaraa. Vavavari vakaamba Israeli miri.

³ Mikonu yakwe makumi aana ikeera, mashika niindo mikonu yeamba miri yekai. Vamisri vakamuiya ando a mikonu makumi mfungare.

⁴ Mikonu yeemuiya yikiira, Yosefu karera na vandu va mmba ya Farao vakeenda veryani nawe, vamiku va mmba yakwe, na vamiku woose va uruka lwa Misri.

⁵ Nde wakwa nnyeshilyisya mboo kaamba, “Nshikee kufii ifwa, kifu kyakwa ekyo shilesuma shimuni yefo urukeny lwa Kanaani; nng'u ando kushaara. Ulaalu shakuterewa shira sheende shinderika nde wakwa, shammaa shiwuyaa.”

⁶ Farao karouwa kaamba, “Enda kwanderika ndoo shaasa ekulyisya mboo.”

⁷ Llyo Yosefu kanderika ndeye; mashinga a Farao akeenda nawe, vasongoru va mmba yakwe na vasongoru woose wa uruka lwa Misri.

⁸ Na mmba shoose ya Yosefu, na vana va maye, na mmba ya ndeye, vakara-fo vana vawo veni, na moonri awo na ng'umbe tawo, efo urukeny lwa Gosheni.

⁹ Ando amwi nawe vakeenda vesaammye frasi, na mitika, vakava ironda iniini nnu.

¹⁰ Vakafika iweny lya Atadi lyikee kwakulya ya Yordan. Vakaiya kiiyo kiniini, kiroo nnu. Kavika kiiyo vaka-kaa rembo mikonu mfungare.

¹¹ Na valya vekee kulya urukeny, Vakanani ewo, kyeeri valelollya veeke rembo efo Atadi vakaamba, “Kiiyo ekyi kya Vamisri nkiniini,” nkyo ando alya akavaangwa Abel-Misri, ikee kwakulya ya Yordan.

¹² Vana vakwe vakantannya shaasa aleva-vavasya;

¹³ mashika valemwipoo fika urukeny lwa Kanaani, nawo vakamwaara efo mbangeny ya irema lya Makipela, lyikee mbee ya Mamre, llya Abrahamu alelyuura ando amwi na irema kwa Efroni Mhiti, kuve kwakwe kweerika.

¹⁴ Yosefu kawuya Misri we na vana va maye, na valya woose valeenda nawe inderika ndeye, ekimaa irika.

Yosefu Aniinga Vana va Maaye Uleke

¹⁵ Vana va maye va Yosefu vekilollya nde-yaawo amfwa, vakakusara, kulakooye Yosefu ashelusuaa; nawe mmbo ashelutaiyaa makasha eru alya lulentannya.

¹⁶ Vakaruma vandu kwa Yosefu, yaamba, “Ndoo mmbo aloota ivavaso llya kulore emfwa, kaamba,

¹⁷ ‘Vieny Yosefu indi, shakutereva kureeye vana va mau ulyamari lwawo na ukasha lwawo, mashika valekutannya makasha; ulaalu lwakutereva kulufwaaye ukasha lwa mashinga a Iruva wa nde-yaafo.’” Yosefu kaiya kyeeri valerera nawe.

¹⁸ Vana va maye vakeenda lyingyi, vakammboya yoo marendeny, vakaamba, “Lola, yese mmbo lukee mashinga afo.”

¹⁹ Yosefu kavavia, “Mulairyee-fo, A ndesa yeny mmbo shikee ando a Iruva?”

²⁰ Neeni dede lyo mmbo mweshikunndya makasha, kyeendi we Iruva kakunda ave mesha, naambo kushe-u ikira ironda iniini lya vandu, shaasa kyikee inu.

²¹ Naasa ulaalu mulairyee-fo; yeny nshemuningaa shoonga ando amwi na vana vany. Kavaviirya muu, neerera nawo nisha.

Ufu lwa Yosefu

²² Yosefu kakaa Misri, we na mmba ya ndeye Yakobo, kamaa myaaka iyana na ikumi.

²³ Yosefu kalollya vana va Efraimu fika irika lya kararu, ni vana va Makiri, mwana wa Manase yewo vewonikkya kwa Yosefu.

²⁴ Yosefu kavia vana va maye, “Yeny mmbo shiifo shifwaa, kyeendi Iruva nkuti ashemusheyaa yeni, ashemusamisaa muuke urukeny elu, mushefika urukeny lulya alevikkya kyaasa Abrahamu na Isaki na Yakobo.”

²⁵ Yosefu kalyisya vana va Israeli mboo, kaamba, “Ni dede Iruva ashemusheyaa, neeni mushesaamisa nafo maffwa akwa.

²⁶ Naasa Yosefu kafwa etiri myaaka iyana na ikumi, vakamwaamba miri, vakammbika isandukuny efo Misri.”