Mapookyony 49 - BIBILLYA Mareiyo Meele a Iruva

Marero a Mafurumyony a Yakobo

¹ Yakobo kavaanga vana vakwe, kavavia, “Kusanyiryeny mushe shimuvie findo fikaa fimukooye elyi mikonu yeefurummya.

² Kusanyiryeny, mwarannye, eni vana va Yakobo Arannyiny nde waany Israeli.

³ Reuben kukee mwana wakwa mmbee, Finya yakwa, na finya yakwa ya mbee Mmbo kwilannye vengyi kwa finya na uniini,

⁴ Mmbo kulekillya nnyanu sha mura, naasany kulatire itumbe-fo Mashika llya kulesaama kitara kya ndoo Kwakitefusa, mmbo kulesaama kitareny kyakwa.

⁵ Simion na Levi ni vana va nka; Ngyusu tawo ni fisha fya ufiri.

⁶ Nrima wakwa kulasheanga kyameny kyawo Usuri lwakwa kulakulunge na ironda lyawo Mashika kyeendwa ni unyafi lwawo mmbo valewaa nndu, Na kwa ufiri lwawo vakarummbwa nraarii wa ng'umbe;

⁷ Unyafi lwawo ludengwa deny, mashika luleilannya Nerooywa ni ngoo lyawo, mashika llyetiri usari-fo. Nshevarauwaa efo kwa Yakobo. Shishevanyanyata nnang'ani ya Israeli,

⁸ “Yewe Yuda, vana va mau vashekurumishaa, Woko lwafo mmbo lushekaa yoo singony ya vakiduva vafo, Vana va ndoo vashekukunyiisyaa.

⁹ Yuda ni kimwana kya miiso, Mwana-kwa mmbo kwasaama kuuka ilasa mafisi, Mmbo alekwiinyika kalala sha miiso. Ekee sha miiso ya kyika ni vi ashemwaantaa?

¹⁰ Mbiiri ya umangyi nyisheukaa kwa Yuda-fo, Nta mwiruuya usumanu yoo marendeny akwe-fo, Kutani asheshaa yeto muni ushilyi, Mmbwe masanga moose ashemwiindyaa.

¹¹ Mmbo ashefingyaa nshungu wakwe yoo nsabibuny, Na ngashe ya nshungu yoo nsabibuny nsha, Mmbo asangya soori takwa na mfinyo, Na masara akwe na samu ya nsabibu.

¹² Miso akwe mmbo ashedodoraa kimaruma kya mvinyo, Na mayoo akwe mmbo asheilaa kimaruma kya malela.

¹³ “Sabulon mmbo ashekaa mbaa-mbaa ya yeeve, Mbaa-mbaa yakwe mmbo ishevaa ando kweesaleesa ngalava, Na nnyanu wakwe mmbo ushevaa mbai ya Sidoni.

¹⁴ Iskari ni nshungu wa finya, Akulallyaa efo wiisirony lwa moonri,

¹⁵ Kalollya ando a iimuya, akee esha, Na uruka nalo ni usha, Kakwinyika naambo yeeva lyakwe lyiipo mario, Kava ishinga lya mashora moomu.

¹⁶ Dani asheanduyaa vandu vakwe, Sha umwi wa ngyiufyari ta Israeli.

¹⁷ Dani mmbo ashevaa shoka ya shieny, Shoka ya urowi unyaasi mbaa-mbaa ya shia, Imaara tutuny ta frasi, Neeto atisaammye nawe-si na mungo,

¹⁸ Ukiro lwafo shiluvereye, Woi Nndumi,

¹⁹ Kati ironda lya vasikari lyishenshingillyaa, Kyeendi mmbwe yeto ashevashingillyaa fika tutuny.

²⁰ “Aseri shoonga yakwe ishevaa shivanri Nawe asheutaa mesha a kimangyi,

²¹ Naftali ni isarya lyaporomuwa, Mmbo ashuutaa marero mesha,

²² Yosefu ni nri nshu ushevikaa ndunda mbaa-mbaa ya usoka, Maramba a vayo akalambara efo isimambeny,

²³ Veasa mife mmbo valentannya fiva-vaa, Vakamweerya, vakammbavisa,

²⁴ Kyeendi ura lakwe lukakaarya, Maako akwe akawonisa finya, Kwi maako a muni finya shoose wa Yakobo; Kwi irina lya mwiisi, mmbwe iwe lya Israeli.

²⁵ Yee, kwa Iruva wa Ndoo yeto ashekutaramaa, Na kwa Iruva muni findo fyoose yeto wafo ashekuvikkyaa mbora; Kwa mbora tishukaa efo uwe iruveeu, Mbora tishukaa efo ndilyiny-si, Mbora ta malela na findo fikeyoora,

²⁶ Mbora ta ndoo, Mmbo yiirye mbora ta mafumbu na kasha, Findo fisennyi fya mafumbu a llung'anu, Fyo fishekaa uwe ya nrwe wa Yosefu, Yoo urorony lwa nrwe wa yeto akee ng'nganise nnang'ani ya vana va maye.

²⁷ “Benyaminy sha ikite lya ngoroshon lyiratwaratwaa, Ngama mmbo ashelyaa filya anreiya, Na nkwaan nasheava mifungwa.”

²⁸ Yeto toose nto ngyufyari ikumi na ivii ta Israeli. Neefyo mfyo ndeye waawo alevavia, na ivavikkya mbora; wo umwi na yakwe kavavikkya mbora.

Ifwa na Irikwa Lya Yakobo

²⁹ Kavavavasya, kaamba, “Yeny mmbo shikeenda indesandwa na vandu vakwa; shirikeny ando amwi na vande vakwa, kulya mbangeny ya Efroni, Mhiti;

³⁰ efo mbangeny yeyo ikee ireminy lya Makpela, ikee yoo mbee ya Mamre kulya urukeny lwa Kanaani, ilya Abrahamu aleyuura ando amwi na irema lyuuka kwa Efroni, Mhiti, kuve kwakwe deny kwa irika.

³¹ Yefo mfo valeara Abrahamu na nka wakwe Sara nafo-da vakaara Isaki na nka wakwe Rebeka; neeny efo kweni shaara-fo Lea;

³² ireminy na mbangeny ya vayo fileurwa kwa Wahiti.”

³³ Naasa Yakobo ekimaa ivavasya vana vakwe, kalema marende akwe yoo kiriny, kafwa, kandesandwa ando amwi na vandu vakwe.