Mapookyony 48 - BIBILLYA Mareiyo Meele a Iruva

Yakobo Avikkya Mbora Manase na Efraimu

¹ Numa ya mbony yeto Yosefu kashefityo mbony, kavio, “Llate, ndoo alwee kaipoo vana valya vakwe vavii, mmbo Manase na Efraimu keenda nawo.”

² Naasa Yakobo kashevywa, “Ekakato mwana wafo Yosefu eefo ashaa na kwafo. Israeli kakutumarisa, ka-kaa rembo yoo kiriny kyakwe.”

³ Yakobo kavia Yosefu, “Iruva muni finya toose mmbo alekoora neeny kulya Lusu, kulya Kanaani, kashivikkya-fo mbora,”

⁴ kashivia, “Yeny nshefumbutaa ufyari lwafo na ilweengera, neewe kushevaa ironda lya vandu, na yeny nsheniingaa ufyari lwafo lwa numa uruka elu, luve lwawo deny, llung'anu.

⁵ Naasany vana yeva vafo vavii kulewonnya kunu Misri kulaore shansha-fo ni vakwa, mmbo ewo Efraimu na Manase ni vana vakwa kimwi sha Ruben na Simion.

⁶ Neewo vengyi kusheiraa numa yeeva mmbo vashevaa vafo, vashevaangwa kimwi sha vana va ma vawo va ding'u yaawo.”

⁷ Neeny llya shileuka Padan, Raheli mmbo aleshifiiyya kulya Kanaani, efo shia nshi kwaasha deny na Efrathi-fo. Shamwaara mbai ya shia ya Efrati nto Betlehemu.

⁸ Israeli kalollya vana va Yosefu, kaamba, “Mmbo vakyi yeva?”

⁹ Yosefu kavia ndeye, “Yeva ni vana vakwa Iruva aleshiniinga shiikee kunu.” Kammbia, “Shiveengye yaa shivavikkye mbora.

¹⁰ Na miso a Israeli mmbo emmaa ivika ireema nta nnyakilollyaa-fo. Nawe kamweengye vana, kavamiminda nevakulyingillya.”

¹¹ Israeli kavia Yosefu, “Nsheekusarye shikaa shikulollye lyingyi-fo, kyeendi Iruva mmbo anshoora na vana vafo.”

¹² Yosefu kawoota yoo ng'undeny yakwe, kakapa kifulu-fulu.

¹³ Yosefu kavavika-u woose ve vavii, Efraimu yoo wokony lwakwe usha, kulella woko umuso lwa Israeli, na Manase yoo wokony lwakwe umuso, kulella woko usha lwa Israeli. Kavasembera yoo kufii nawe.

¹⁴ Israeli kaorrwa woko lwakwe usha kaekyerya yeto we Efraimu yoo nrweny, na woko umuso kaekyerya Manase nrweny, eyiishi ninsha shaasa aveekyeryaa maako mashika Manase mmbwe mwana mbee.

¹⁵ Kavikkya Yosefu mbora kaamba, “We Iruva, yeto vande vakwa Abrahamu na Isaki valeenda mbee yakwe, we Iruva yeto aleshilela muu wakwa moose, fika inu,

¹⁶ nawe Nsu yeto aleshikira maravi moose, navikkye vana yeva mbora, na irina lyakwa lyisendwa nawo, na irina lya vande vakwa, Abrahamu na Isaki, nawo vave nkuka wa vandu kunu ulaniny.”

¹⁷ Kyeeri Yosefu alelollya ndeye eevikaa woko lwakwe usha nrweny wa Efraimu kikammbiiya kyikasha misony akwe. Kaipoo woko lwa ndeye yoo nrweny wa Efraimu naambo aluvike yoo nrweny wa Manase.

¹⁸ Yosefu kavia ndeye, “Nshindo-fo nde-yaakwa, mashika yeu mmbwe eto mmbee; vika woko lwafo usha yoo nrweny wakwe.”

¹⁹ Ndeye kalema, kammbia, “Yeete mwana-kwa shiishi, shiishi deny, naakwa niwe ashevaa, ironda lya vandu, naakwa niwe asheng'anaa, kyeendi mwanawo mmbo asheng'anaa ngota we, na ufyari lwakwe lushevaa nsemu wa vandu.”

²⁰ Nkonu yeto kavavikkya mbora, kaamba, “Yoo kwany Vaisraeli vashevikkyaa mbora vaambe, ‘Iruva nakwallwe sha Efraimu na lyingyi sha Manase, kavika Efraimu yoo mbee ya Manase.’”

²¹ Israeli kavia Yosefu, “Kwiishi, yeny mmbo shikeefwa, kyeendi Iruva ashekaa neeni, nawe ashemuviira fika urukeny lwa vande vany.

²² Neeny mmbo nkuniingaa kyenga kimwi mmwasi ya vana va mau, yekyo shilekyuuta maakony a Vaamori na usu lwakwa na ura lwakwa.”