Mapookyony 42 - BIBILLYA Mareiyo Meele a Iruva

Vana va Maaye va Yosefu Veenda Misri Yuura Shoonga

¹ Naasa Yakobo keeta kulya Misri kwiifo shoonga, Yakobo kavia vana vakwe, “Niinda elyi mwakulola muveni na veni?”

² Kaamba, “Llate shammita kulya Misri kwiifo shoonga, sokeny nafo mundeluurya-fo shoonga lulye lukkye lulasheefwa.”

³ Vana va maye ikumi va Yosefu vakasoka Misri naambo vandeura-fo shoonga.

⁴ Kyeendi Benyaminy, mwanawo wa Yosefu, Yakobo nnyalekunda naende na vana vamaye-fo, kaamba naambo aleshekooywa nkindo kyikasha.

⁵ Vana va Israeli vakaenda vandeura shoonga, mashika kulya urukeny lwa Kanaani kweefo shaa.

⁶ Na Yosefu mmbo ekee ngari ya uruka loose, mmbwe yeto eekumbyaa uruka loose shoonga. Na vana va maye va Yosefu vakasha vakawa si kifulu-fulu mbee yakwe.

⁷ Yosefu kalollya vana va maye kavamanya, kyeendi kava sha muny deny kwawo. Kavarerya na marero manyaasi, kavavia, “Yeni nkwi mwauka?” Vakaamba, “Mmbo looka urukeny lwa Kanaani naambo lusheura shoonga.”

⁸ Yosefu kamanya vana va maye, lyo wo valammanye.

⁹ Yosefu kakummbwa moorya eeshoorya kyawo woose. Kavavia, “Yeni mmbo mwasha ilusuma mushelola unana lwa uruka.”

¹⁰ Vakammbia, “Oode mmbe, mashinga afo mmbo asha asheura shoonga.

¹¹ Yese loose mmbo lukee vana va nndu umwi mmbo lukee vandu va dede yese, mashinga afo yese llukee nsaa-fo.”

¹² Kavavia, “Mmbongo, mmbo mwasha mushelola unana lwa uruka elu.”

¹³ Vakammbia, “Yese mashinga afo mmbo lukee vana ikumi na vavii vana va nndu umwi kulya urukeny lwa Kanaani, mwaneru umwi mmbo asaa na nde-weeru inu, na umwi we nnyeefo-fo.”

¹⁴ Yosefu kavavia, lyingyi, “Shammaamba, yeni mmbo mukee saa.

¹⁵ Mushaaramwaa ulaalu, Farao eefo na muu, mmushukaa yaa-fo, kutani asha mwanany yeto n-du.”

¹⁶ Rumeny umwi waany nandemweende neeni mufingwa, kutani marero any avikywa ukureekyi, kwakooya mukee va dede, kilammba indo, Farao akee na muu, yeni nsaa.

¹⁷ Kavavika woose kifingyony ando a mikonu iraru.

¹⁸ Nkonu wa kararu Yosefu kavavia, “Taniny indo mukae na muu, mashika lyo yeny mmbo shikee nndu wa Iruva.

¹⁹ Kwakooya yeni mukee vandu va dede, umwi waany nakae kifingyony, neeni mweende mundeipoo shoonga kimaruma kya kyeny kwany,”

²⁰ mundeende mwanany yeto n-du yaa kwakwa; naambo marero any alollywa ni a dede, naambo mulafwe. Nawo vakatana indo.

²¹ Vakaumburana vakaamba, “Dede lyo yese lulelyamarya mwana-maye weeru, mashika llya lulalelollya ngatara ya nrima wakwe, kyeeri elutereva, yese lulamwarannye, nkyo ngatara yei ikeelukooya ulaalu.”

²² Ruben karouwa kavavia, “Shemuvia-se llya shaamba mulatannye mwana kyikasha? Neeni nta mulashiite, naasany samu yakwe mmbo ikeeruuya.”

²³ Nawo nta valamanye Yosefu aveetye, mashika kweiyo ntapita ekee nawo.

²⁴ Yosefu keenda mbai kaiya. Numa kavawuiya, karera nawo kauta Simeon yoo vakai, kammbika kifingyony velollye.

Vana va Maaye va Yosefu Vawuya Kaanani

²⁵ Yosefu kavavasya mikusha yaawo yiishurwa shoonga, na wo umwi waawo naviiryo fesa takwe efo nkusheny wakwe, vaniingwa na kisha-u kya shia.

²⁶ Vakatannywa indo vakarika mishungu yaawo shoonga eto, vakauka-fo.

²⁷ Ummwi waawo llya aleporommwa nkusha wakwe naambo naniinge nshungu shoonga, kakooya-fo fesa, ate nyoo uwe nkusheny ikai.

²⁸ Kavia vana va maye, “Fesa yakwa mmbo yaviirwa, lola akai kunu nkusheny wakwa. Vakaawukwa mmuu, vakaindukyana veereremaa, vakaamba, ‘A nkyokyi ekyi Iruva alutannya?’”

²⁹ Vakafika kwa ndeye-awo Yakobo, kulya Kanaani, vakammbia mbony toose shaasa kileva, vakaamba,

³⁰ “Nndu yeto akee mmbwe nniini wa uruka mmbo alerera neese na unyaasi kalwaallwa vandu va nsaa.”

³¹ Lukammbia, “Yese mmbandu va dede, nta nshi nsaa-fo.

³² Yese mmbo lukee vana ikumi na vavii va nde weeru. Umwi nnyaiyo-fo, na yeto n-du weeru mmbo akee na nde weeru kulya Kanaani.”

³³ Nndu yeto akee nniini wa uruka, kaluvia, “Ulaalu shimanyaa kwakooya mukee vandu va dede mwana maye umwi waany nreny kunu kwakwa, mundeipoo shoonga ta kyeny kwany, mukweenngye.

³⁴ Mundesheenngye mwanany yeto n-du; llyo nshemanyaa dede yeni nshi nsaa-fo, ni vandu va dede, naasa nshemuviirya mwanamaye waany, lyony mushevaa vekapa mbusha kunu urukeny elu.”

³⁵ Naasa llya valepusua mikusha yaawo, ate kikushu kya fesa mmbo kyikee mikusheny myoose, Nawo llya valelollya fesa tilya efo mikusheny yaawo, wo na nde-yaawo vakaereya nnu.

³⁶ Yakobo we nde-yaawo kavavia, “Mmbo mwanshisoka vana vakwa, Yosefu nnyaiyo-fo, nta Simion nnyaiyo-fo, na Benyaminy nawe mmbo murye imwiipo, eto ni mbony tishikooye yeny.”

³⁷ Ruben kavia ndeye, kaamba, “Waa vana vakwa vavii shanra shilaviira Benyaminy, shinrambikya, neeny shimmbiire-se kwafo.”

³⁸ Kaamba, “Mwana-kwa yeu nnyasokaa neeni-fo, mashika vavae mmbo afiiyye, nawe kasaa-u muni, findo fikasha fikankooya efo shieny yaany, llyo myaasa yakwa ishefumbukaa kutani shafwa.”