Mapookyony 41 - BIBILLYA Mareiyo Meele a Iruva

Yosefu Atambasshwa Moorya a Mangyi

¹ Naasa kwikisia myaaka ivii sele, Farao koorya yoorya, nawe vai mmbo eselelyi yoo mbai ya mura.

² Ate, ng'umbe shisha shivanri, tikasaama tuuka mureny, tikalya mare waambareny.

³ Na ng'umbe tingyi mfungare tikasaama tuuka mureny, shifwa-fwa, shiniiri, tikashesalala kufii na tilya tingyi.

⁴ Naasa ng'umbe eto mfungare shifwa-fwa shiniiri tikalya ng'umbe tilya shisha mfungare, shivanri. Naasa Farao kookya rweny.

⁵ Kalala, koorya-se lya kavii. Ate vai, fyaa mfungare fivesye fikauka yoo ikenyeny lyimwi, fyaa fiwongye, fisha.

⁶ Na lyingyi fyaa fikasha fya mafovyo fikee fyuumise ni uraato lwa taari ya ngameny fikashemmya ando a filya.

⁷ Naasa fyaa efyo fya mafovyo mfungare fikamira fyaa filya mfungare fisha fyeisshwe. Naasa Farao kookya rweny, ate nnyoorya!

⁸ Fika ngama nrima wakwe ukaereve, karuma vandu vandevaanga vaanga woose va Misri, na vandu varango woose veefo. Farao kawoongoya yoorya lyakwe, kulave-fo nta umwi aidima itambashuya Farao mbony eto.

⁹ Naasa nniini wa veraiya mangyi wari kavia Farao, “Inu shankummbwa maravi akwa moose.”

¹⁰ Kyeeri kilya kulesua neese mashinga afo, kwalweera kifingyony kwa nniini wa vasikari, yeny na nniini wa nkori wa mikate.

¹¹ Lukaorya yoorya kio kimwi yeny nawe, wo nndu yoorya lyakwe na urango lwa vayo.

¹² Neefo mmbo lweefo ando amwi na nsoro umwi Mwebiri, nsero wa nniini wa vasikari lukamwongoya, nawe kalutambashuya, kaaluya wo nndu yoorya lyakwe shaasa lyeekai.

¹³ Kyikava indo shaasa alelutambashuya, niindo kileveeva, yeny shaviirwa ishoreny lyakwa, nawe kavaniko nrii-u.

¹⁴ Naasa Farao karuma vandu, Yosefu kandevaangwa, vakammbuta uviny kulya kifinngyony. Kauta nrwe, kaalasha soori, kaanga kwa Farao.

¹⁵ Farao kavia Yosefu, “Mmbo shileorya, nta kulakae-fo nndu aidima ishitambashuya. Neeny shaita mbony tafo, shisha sheelyi kweeta yoorya, vai kushidimaa itambashwa.”

¹⁶ Yosefu karouwa Farao kammbia, “Nshi yeny-fo, Ni Iruva muni asheniingaa Farao kiroowo kya ufoo.”

¹⁷ Farao kavia Yosefu, “Yoorya elyo lyako mmbo shesalelyi yoo wambareny lwa mura,

¹⁸ llate, shalollya ng'umbe mfungare tishukaa mureny, shivanri, shisha, tikalya mare.”

¹⁹ Numa shalollya ng'umbe tingyi mfungare tasaama numa yeeto, shifwa-fwa shiniiri deny, shiniiri; kunu urukeny lwa Misri nshilelollye ng'umbe sheeto kwa ufwa-fwa-fo.

²⁰ Na ng'umbe eto shiniiri, shikasha tikamira ng'umbe tilya ta mbee shivanri.

²¹ Neelyi tammaa imira tilya tingyi nta tilaore sheelyi taantimira kyeendi, tikeengera iva indo sha llya mapookyony tikee shikasha. Naasa neeny shookkya rony.

²² Naasa shalollya lyingyi efo yooryeny, shalollya fyaa mfungare fyammya yoo ikyenyeny lyimwi, fyaa fisha fiisshwe.

²³ Shalollya lyingyi fyaa mfungare fifwa-fwa, fikeefyuumise ni uraato lwa taari ya ngameny fikashemya-u.

²⁴ Na fyaa efyo fifwa-fwa fikamira filya mfungare fisha. Neeny shavia vaanga yewo, kulawonike-u nta umwi aidima ishoora utambashyo lwa vayo.

²⁵ Yosefu kavia Farao, “Yoorya lya mangyi llyimwi; Iruva mmbo aleora mangyi efyo ashetanaa kyeeri ekyi.”

²⁶ Ng'umbe tilya shisha mfungare ni myaaka mfungare; na fyaa filya fisha mfungare ni myaaka mfungare. Yoorya llyimwi nsi.

²⁷ Na ng'umbe tilya mfungare shifwa-fwa shikasha tilesaama numa yeeto tingyi mmyaaka mfungare; na fyaa filya mfungare fya ruu fikee fyuumise ngyuraato lwa ngameny ni myaaka mfungare ya shaa.

²⁸ Niindo shilevia Farao, “Sheelyi Iruva mmbo oora Farao ekyo ashetanaa yaa kyeeriny ekyi.”

²⁹ Lola myaaka mfungare ya mbora ikeesha kunu urukeny lwa Misri koose.

³⁰ Numa ishe myaaka mfungare ya shaa numa ya vayo, na mbora yeyo mmbo isherekaa urukeny loose lwa Misri, na shaa ishewoya uruka.

³¹ Nta mbora yeyo nnyishekumbuwaa-fo kyimaruma kya shaa yeyo isheshaa numa ya vayo mashika nnyisheng'anaa nnu.

³² Yoorya elyo lya Farao mmbo lyilesha kavii mashika elyi Iruva ekundye ilyivika finya nawe nalyiinutye uviny.

³³ Naasany, Farao naruuye nndu atiri urango na waarya asalallye uruka lwa Misri.

³⁴ Farao atane indo avike na veesalallya uruka, vawarye kyenga kya karaanu kya fimu fyoose fya Misri, myaakeny yei mfungare ya mbora.

³⁵ Vasangirye shoonga shoose ya myaaka yei misha ikeesha, vavike kiraambu kya shoonga kwa Farao, vasanyirye shoonga miriny koose.

³⁶ Na shoonga yeyo mmbo ishevaa kiraambu kya uruka kyeeri kya myaaka, yeyo mfungare ya shaa yeyo isheshaa urukeny lwa Misri uruka lulashelyamarwa nshaa.

Yosefu Avikwa Mwiishillya Nniini wa Misri

³⁷ Mbony yeto tikasennya Farao na vandu vakwe woose.

³⁸ Farao kavia vandu vakwe, “Nkwi efo lushuuta nndu sha yeu, atiri mumuyo wa ki-Iruva nnang'ani yakwe?”

³⁹ Farao kavia Yosefu, “Kimmba Iruva ankumanyisya efyo fyoose, nkwiiyo ungyi atiri urango na waarya sha yewe-fo.”

⁴⁰ Naasany ni yewe kushesalallyaa mmba yakwa, na irero lyafo llyo lyishesalallyaa vandu vakwa. Ni yoo kitiminy kya umangyi kweni nshekaa uwe ngota yewe.

⁴¹ Farao kavia Yosefu, “Lola yeny shankuvika uwe ya uruka loose lwa Misri.”

⁴² Farao koota-fo nrashi yakwe ya umangyi efo wokony kaivika Yosefu, kammbika na soori shisha, na nse wa saabu singony yakwe.

⁴³ Kansaamisa ikariny lyakwe etiri lya kavii. Na vandu vakakapa ngaya mbee yakwe, vakaamba, “Fiiryeny nndi.” Niindo kammbika uwe ya uruka loose lwa Misri.

⁴⁴ Farao kavia Yosefu, “Yeny ni Farao, kulaore ni kwa ivavaso lyafo, nndu nalaipoo woko nta urende kunu urukeny lwa Misri-fo.”

⁴⁵ Farao kavaanga Yosefu kulya Sefanath-panea, kamworisa Asenathi mfu wa Potifera, nkohani wa Oni nave nka wakwe. Yosefu kakweenngya efo neefo efo urukeny lwa Misri.

⁴⁶ Yosefu mmbo etiri myaaka makumi araru kyeeri alesha mbee ya Farao, we mangyi ya Misri. Yosefu kooka mbee ya Farao, kasaiya uruka loose lwa Misri.

⁴⁷ Naasa kyeeri kya myaaka ilya mfungare ya mbora, uruka lukatira findo fiingyi nnu.

⁴⁸ Kasangyirya shoonga toose urukeny lwa Misri myaaka ilya mfungare. Kasangyirya shoonga efo miriny, shoonga ta mareminy kuringitya miri myoose, tikasurumwa.

⁴⁹ Yosefu kasangyirya shoonga ta mbeu sha nsanga wa mbai ya nruva, shiingyi nnu, kara-fo yeekyena, mashika mfyeva yeekyena-fo.

⁵⁰ Kulaore myaaka ya shaa yansha, Yosefu kairywa vana vavii, yewo Asenath mfu wa Potifera, Nkohani wa Oni, alemwiirya.

⁵¹ Ulya mmbee Yosefu kammbaanga Manase, kyeyaamba, Iruva ansheekya sharekywa ngatara takwa toose na mmba ya nnde shoose.

⁵² Na wa kavii kammbaanga Efraimu, kyeyaamba, Iruva mmbo ashiniinga ngyeeri kunu urukeny lwa makiva akwa.

⁵³ Myaaka ilya mfungare ya mbora kulya Misri ikeera,

⁵⁴ myaaka ilya mfungare ya shaa ikapooka isha, shaasa llya Yosefu aleamba. Ikasha shaa ngyurukeny toose, lyo urukeny lwa Misri koose kukatira shoonga.

⁵⁵ Uruka loose lwa Misri lwikiwona shaa ilya vandu vakaiya na Farao navaniinge shoonga. Farao kavia Vamisri woose. “Endeny kwa Yosefu, ekyo amuviaa, taniny.”

⁵⁶ Shaa ikakwaana ulaniny koose nafo. Yosefu karua mbeshe toose kakummbya Vamisri shoonga. Shaa ikarwaa deny kulya Misri.

⁵⁷ Vandu va ngyuruka toose vakasha Misri kwa Yosefu naambo woore shoonga, mashika llya shaa ilerwaa nnu ulaniny koose.