Mapookyony 40 - BIBILLYA Mareiyo Meele a Iruva

Yosefu Atambasshwa Moorya a Vafungwa

¹ Naasa kyikava numa ya mbony eto, mwiraiya mangyi ya Misri wari, na nkori wakwe wa mikate, vakalyamarya nndumi waawo, we mangyi ya Misri.

² Farao karooyo ni unyafi kimaruma kya maakida vakwe vavii, yeto asorye veraiya mangyi wari neeto asorye vakori va mikate.

³ Kavafinngya kwa nniini wa itorito naambo varingwa efo kifingyony, yoo Yosefu ekee mfingye.

⁴ Nniini wa itorito kavarammbikkya Yosefu, kavakallya, vaka-kaa kifingyony mikonu mive na mive.

⁵ Vakoorya yoorya woose ve vavii, wo nndu na yoorya lyakwe kio ekyo kyeni, wo yoorya na urango lwa vayo, mwiraiya mangyi na nkori wa mikate valya veeke kyifingyony.

⁶ Yosefu nashe ngama kalollya shaasa veetinnywa.

⁷ Kavesa vashilyi yewo va Farao, yewo vekee nawo efo kyifingyony mmba kwa nndumi wakwe, kaamba, “Nkyiki elyi fisangu fyany fikukushye inu?”

⁸ Vakammbia, “Mmbo lwammorya yoorya lulaoni nndu mwilutambashuya.” Yosefu kavavia, “A ishora lyetambashua llya Iruva-ndi? Shamutereva shivieny.”

⁹ Mwiraiya mangyi wari kamwoongoya yoorya lyakwe, kammbia, “Efo yooryeny lyakwa mmbo shileorya, ekato nsabibu mbee yakwa.

¹⁰ Na nsabibu yeto mmbo wetiri maramba araru, nato ukava sheelyi ukeorya, ukevaa fivaro, fitiringo fya vayo fikoota sabibu shiviiri.

¹¹ Na kikombe kya Farao mmbo kyekee wokony lwakwa, shawarya sabibu tilya shakammya upata shaniingya Farao wokony lwakwe.”

¹² Yosefu kammbia, “kwatambashwa nkyaamba indi; maramba araru mmikonu iraru.

¹³ Mmbo kusia mikonu iraru na Farao nashekuviiraa ishoreny lyafo neewe kusheniiingya-se Farao upata efo wokony lwakwe shaasa kweetana llya mbee.

¹⁴ Lyo kushikummbwe neeny kyeeri kusheonisaa mesha yoo, kushitannye fyeesarya, shakutereva-dwa, kushisende na mesha kwa Farao, naambo nashuute kunu.

¹⁵ Mashika dede mmbo shileiwa kulya urukeny lwa Vaebiri, na kunu nta nshitannyi kindo kikasha kutani shavikwa kifingyony-fo.”

¹⁶ Llya nniini ulya wa vakori va mikate alelollya utambashuo lwa yoorya llya llwa mesha, kavia Yosefu, “Neeny shikee efo yooryeny lyakwa, shalollya mideeva iraru ya mikate myaa ikee nrweny wakwa.

¹⁷ Na yefo nndeeveny eto ukee uwe ya ingyi kweifo ngata toose ta shoonga ya Farao. Ndeye tikasha tikafilya tikee yoo ndeeveny nrweny wakwa.”

¹⁸ Yosefu karouwa kaamba, “Utambashuo lwa vayo llo elu, Mideeva iraru ni mikonu iraru.

¹⁹ Mmbo kushiiraa-u mikonu iraru na Farao mmbo ashekurummbwa nrwe, nakuvanike nrii-u, na ndeye tishelya nyama yafo.”

²⁰ Kyasia nkonu wa kararu, ukava nkonu wa iwonika lya Farao, kavikkya mashinga akwe ifura. Kawoota kulya kyifyingyony mwiraia wari wakwe nniini na mwiikora mikate wakwe nniini kavavika mbee ya vashilyi vakwe.

²¹ Kaviira nniini wa veraiya wari ishoreny lyakwe lyeraiya wari, nawe nakooye iningya Farao upata wokony lwakwe.

²² Kyeendi nniini wa veekora mikate kammbanika nriu, indo shaasa Yosefu alevatambashuya.

²³ Kyaindi lyo yeto nniini wa veraiya mangyi wari nalakummbwe-se Yosefu, kanrekywa.