Mapookyony 4 - BIBILLYA Mareiyo Meele a Iruva

Kaini na Abeli

¹ Naasa Adamu kakaa na nka wakwe Eva, kakufinga, kaira Kaini, Kaamba, “Shammbonisa mwana wa womi mbora yooka kwa weekyi lwa Nndumi Iruva!”

² Kaengera keera mwana ungyi wa womi we Abeli. Abeli kava mwiivikya moonri, na Kaini kava mwirema si.

Firaso fya Kaini na Abeli

³ Naasa elyi numa Kaini keende fimu kiraso kwa Nndumi Iruva,

⁴ Abeli nawe keende ngurana shive eto shivanri auta efo mavikyeny akwe. Nndumi Iruva, kasenywa ni Abeli na firaso fyakwe.

⁵ Kyaindi Kaini nalamwirikye, nta firaso fyakwe. Kaini katirwa ni unyafi nnu na kisangu kyakwe kikakukusha.

⁶ Nndumi Iruva kavia Kaini, “Nkyiki elyi kutirwa ni unyafi? A nkyiki elyi kisangu kyafo kyikukushye?

⁷ Kwakooya kwatana mesha mmbo kuraa kulawarywa? Kwanra kulatana mesha lola ulyamari mmbo lukuvereye yoo mwaangony, lukee ikulaaya, lyo nkuti kuluvinge.”

Kaini Awaa Mwanawo Abeli

⁸ Kaini kavia mwanawo Abeli, “Nnde kulya imungony.” Naasa kyeeri vekee imungon, Kaini kawarana na mwanawo Abeli, kammbwaa.

⁹ Nndumi Iruva kavia Kaini, “Mwanany Abeli nkwi akai?” Karouwa kaamba, “Nshiishi-fo”, Kaini karouwa. “Mmbo shikee nringyi wa mwaneru-ro?”

¹⁰ Nndumi Iruva kammbia, “a nkyoki kwatana? Samu ya mwanany ikeeshifuuya mbee yakwa!

¹¹ Yewe mmbo kukee nndenge uka sumbai yeyo iletarammbwa kana ikawarya samu ya mwanany yuuka maakony afo.

¹² Elyi kusheremaa si nkushekiwonisaa fimu fisha-fo. Neewe kuvaa nndu mwirishiswa na mwiraaraa ulaniny.”

¹³ Kaini kavia Nndumi Iruva, “Ngapo yakwa yang'ana nnu nshiifitaa-fo.

¹⁴ Lola mmbo kwanshumbuta urukeny elu, shikee kwaasha na usangu lwafo, neeny nsheraa-raa shilatiri kirembo ulaniny, na wo nndu ashilollyaa mmbo akundaa ishiwaa.”

¹⁵ Nndumi Iruva kammbia, “Kimmba ni indo, nndu awaa Kaini mmbo ashetaiywaa ka mfungare.” Nndumi Iruva kammbika wende naambo nndu allolyaa nalashemmbwaa.

¹⁶ Kaini kooka kisanguny kya Nndumi Iruva, kandekaa urukeny lwa Nodi kufiitani na Eden.

Ngyeeri ya Kaini

¹⁷ Kaini kakaa na nka wakwe, nawe kakufinga, kaira Enoki. Kaini katana muri kauvaanga Enoki, sha irina lya mwana eto wakwe.

¹⁸ Enoki kaira Iradi, Iradi nawe kaira, Mehuyaeli, Mehuyaeli kaira Metushaeli na Metushaeli kaira Lameki.

¹⁹ Lameki karwaa vaka vavii, irina lya eto umwi ni Ada na lya eto wa kavii ni Sila.

²⁰ Ada kaira Yabali; yeu mmbwe ndeye wa vandu ewo vekaa yeemeny na ivikkya ng'umbe.

²¹ Na irina lya mwanamaye ni Yubali, yeu mmbwe ndeye wa veekapa fivale.

²² Sila nawe kaira Tabal-kaini, mfuru wa findo fya yaambo na minya. Na mfwamaye wa Tabal-Kaini ni Naama.

²³ Lameki kavia vaka valya vakwe, “Arannyiny unyanga lwakwa Ada na Sila; Eni vaka va Lameki, shaarannyiny ekyo nshambaa; mashika shiwaiye nndu aleshikaba mwana nkoo aleshivika kishavere.

²⁴ Kwakooya Kaini ashetaiyoo ka-mfungare. We Lameki mmbo ashetaiyoo ka makumi mfungare na mfungare”!

Seti na Enosi

²⁵ Adamu kakaa na nka wakwe-se, kaira mwana wa womi. Kamfishya irina lyake ni Seti, Nkyo kyaamba, “Iruva anshiniinga mwana ungyi ando a Abeli, ulya Kaini alemmbwaa.”

²⁶ Seti nawe kaira mwana, kambaanga Enosi. Yaa ng'u ando vandu valepooka irunda na irina lya Nndumi Iruva vemwiinndyaa Nndumi Iruva.