Mapookyony 39 - BIBILLYA Mareiyo Meele a Iruva

Yosefu na Nka wa Potifa

¹ Naasa Yosefu kashefitwa Misri, nawe Potifa, nshilyi wa Farao, kaveva nniini wa itorito, akee nndu Mmisri, kamuura maakony a Vaismaili valya vemweende-fo.

² Nndumi Iruva ekee amwi na Yosefu, nawe kammbesya nnu, nawe kava mwikaa mmba kwa nndumi wakwe, we Mmisri eto.

³ Nndumi wakwe kalollya sheelyi Nndumi Iruva ekee amwi na Yosefu, na Nndumi Iruva mmbwe akeevirisa findo fyoose kyuuka na woko lwakwe.

⁴ Yosefu kawona yiirikywa mbee ya Potifa kamfurukannya. Nawe kammbika nave mwisalallya mmba yakwe, na fyoose fiifo kafivika maakony akwe.

⁵ Nndumi Iruva kavikya mmba ya Mmisri ulya mbora kyeendwo ni Yosefu. Mbora ya Nndumi Iruva ikakaa na fyoose eetiri efo kyeny kwakwe na efo mareminy.

⁶ Fyoose eetiri kafira maakony a Yosefu; nalamanyi mbony ta kindo kyoose eetiri, kuuta shoonga yeyo yeelya sheni. Nawe Yosefu ekee nndu nsha, atiri kisangu kisennyi.

⁷ Naasa numa ya mbony eto, nka wa Potifa kalanga Yosefu, kashemmbia, “Kaa neeny.”

⁸ Kyeendi we kalema, kavia nka yeto wa nndumi wakwe, “Lola Nndumi wakwa nnyeeshi kindo kyikee kyivike mmba kwakwe-fo, na findo fyoose atiri, mmbo afivikkye maakony akwa.

⁹ Nkwiifo nta nndu ashing'annyi yeny-fo, nta, nnyashiimyi nta kindo kyimwi-fo, kuuta yewe kumuni, ni elyi kukee nka wakwe. Niindaany shitanaa uravi elu uniini shilyamarye Iruva?”

¹⁰ Nka yeto keengera ilelemba Yosefu nkonu, kwi nkonu kyeendi lyo nnyalemwaarannya nta nnyalekunda ikaa nawe tara-fo.

¹¹ Naasa, nkonu umwi kaanga efo mmba naambo narunde mashora akwe, na nkweeiyo nndu ungyi efo mmba nkonu eto-fo;

¹² Naasa nka yeto wa Potifa kantira soori tapu, kammbia, “Kaa neeny!” Kyaindi Yosefu kanreeya soori ilya yakwe efo wokony, karisha kasomuka poo;

¹³ Naasa ekilollya ammureeya soori yakwe maakony akwe karishya poo,

¹⁴ kavaanga vandu va mmba kwakwe, karera nawo kaamba, “Loleny-te, mmbo alelweenngye Mwebrania naambo nalutannyi fya kinyala.” Mmbo aanga kwakwa naambo nashaafinye, kyeendi shakooma na unyanga uniini.

¹⁵ Naasa llya alollya shankooma nnu na ifua kashireeya soori yakwe, karisha kasomuka poo.

¹⁶ Naasa kasuruma soori ilya kutani elyi mmi wakwe ashaa kyeny.

¹⁷ Nawe kashemwongoya marero yoo, kaamba, “Ishinga elyo we Mwebrania ulya kulemweende kweru, mmbo aleanga kwakwa, naambo nashaafinye.”

¹⁸ Naasa kyeeri shilekooma neefira neiya kara soori yakwe kwakwa karishya poo.

¹⁹ Naasa llya nndumi wakwe aleeta marero a nka wakwe shaasa alemmbia, eshambaa ni indo Ishinga elyo lyafo lyileshitannya, katirwa ni unyafi.

²⁰ Mmi wakwe kaipoo Yosefu kamweera kifingyony, kundo vafungwa va mangyi vekee vafinngye, nawe kakaa-fo.

²¹ Kyeendi Nndumi Iruva ekee na Yosefu, kallyillya, kanniinga yiirikyo efo misony a nniini wa kifingyony.

²² Nniini wa kifingyo kavika vafungwa woose makony a Yosefu, na fyoose fyetanyikaa-fo kava mmbwe afisalallyaa.

²³ Nta nniini wa kifingyo nnyalelollya nta kindo nnang'ani ya filya fyekee maakony a Yosefu-fo, mashika elyi Nndumi Iruva ekee nawe. Nndumi Iruva kansongoya efo mashoreny moose eeketana.