Mapookyony 33 - BIBILLYA Mareiyo Meele a Iruva

Yakobo Akwaanannya na Esau

¹ Yakobo keepoo miso akwe, kalollya ate ulya ni Esau akeesha eryani na vandu mayana aana. Yakobo kaavya vana vakwe Lea na Raheli na mashinga alya akwe avii na vana vawo.

² Kavika mashinga alya na vana vawo mbee, na Lea na vana vakwe numa yaawo, na Raheli na Yosefu yoo numa.

³ We muni kaira mbee yaawo, kawa si kifulufulu matorito mfungare, kutani afikkya mwana-maye.

⁴ Esau kasha eerishaa, kankulyingillya, kammboya singony, kammiminda; woose vakaiya.

⁵ Kyeeri aleipoo miso kalollya vaka valya na vana kavesa, “Ni vakyi eva kuriani nawo?” Kaamba, “Ni vana Iruva aleniinga ishinga lyakwe kwa isarya lyakwe.”

⁶ Llyo mashinga alya na vana vawo valesembeya kufii vakakwiinyika,

⁷ Lea nawe na vana vakwe, vakaserikya vakakwiinyika, numa Yusufu na Raheli vakaserikya, vaakakwiinyika.

⁸ Esau kavesa, “A ironda elyi lyoose shalyikooya llyeeki ndesa? Kaamba, n'naambo shikuwonisye iwarywa efo kwa nndumi wakwa.”

⁹ Esau kaamba, “Nshitiri nkuka, mwana-ma, efi kukee nafyo na five fyafo.”

¹⁰ Yakobo kaamba, “Oode, kwakooya shammbona iirikywa efo misony afo, shakutereva warya simbo eti, ta pya tyuuka wokony lwakwa mashika elyi shalollya kisangu kyafo kyikava sheelyi shalollya kisangu kya Iruva, mashika mbo kwa shivana na ikunda lyiniini deny.”

¹¹ Shakutereva woi, warya simbo yakwa yei, kweenngywa, mashika Iruva ashivikkye mbora elyi shitiri efi fyoose. Kamwiitikkya, nawe kawarya.

¹² Naasa Esau kammbia, “Ndeeny lweengere yeenda, neeny nshekwiryaa mbee.”

¹³ Kandouwa, “nndumi wakwa kulollye vana ni vadu, na moonri na ng'umbe mmbo tikeyoota, findo efi fikaitikwa ando a nkonu umwi tupu mmbo vifwaa fyoose.

¹⁴ Shakutereva nndumi wakwa kuire mbee ya ishinga lyafo, neeny shivatetere waarya kiinani na meenngye ya findo efyo fiirye mbee yakwa, na kiinani na myeenngye ya vana kutani shashefika kwa nndumi wakwa efo Seiri.”

¹⁵ Esau kaamba, “Ra shikureeyeny vandu maata eva shikee nawo.” Kammbia, “Veekyi, yeny shiwoni yiirikywa tupu efo kwa nndumi wakwa.”

¹⁶ Naasa Esau kawuya nkonu ulya mweni, kawara shia keenda kafika Seiri.

¹⁷ Yakobo keenda kafika Sukoti. Katannya-fo mmba, na findo fyakwe kafitannya matengo. Ando alya kukavaangwa Sukoti.

¹⁸ Yakobo kasha na nsia fika muri wa Shekemu, nato ukee efo urukeny lwa Kanaani, yoo alesheya auka Padan-aramu; kamannya ulale yoo kufii na muri yeto.

¹⁹ Koora kyenga kya uruka, ando alevaaya meema, koora kyuuka kwa vana va Hamori, ndeye wa Shekemu kataa fiparwe iyana fya fesa.

²⁰ Katannya-fo kitara kyerasya, kakivaanga El-elohe-Israeli. (Iruva waVana va Israeli).