Mapookyony 31 - BIBILLYA Mareiyo Meele a Iruva

Yakobo Arisha Laban

¹ Naasa Yakobo keeta marero a vana va Laban veshaamba, “Yakobo mmbo aleipoo masaa moose a-nde weeru, na kyeendwa mmasaa a-nde weeru mmbo ammbonisa usuri elu loose.”

² Yakobo elyi alola kisangu kya Laban kakooya nnyakeekillola nisha sha ukwa-u na isho-fo.

³ Nndumi Iruva karera na Yakobo kammbia, “Wuya na kulya urukeny lwa vandoo na lwa vandu vafo, neeny nshekaa neewe.”

⁴ Yakobo karuma vandu, Raheli na Lea vandevaangwa vashe kulya wureny akai na findo fyakwe. Kavavia,

⁵ “Shilollye kisangu kya nde waany, ulaalu nyakeeshilola nisha sha ukwa-u na isho-fo. Lyo Iruva wa nde-yaakwa akee neeny.”

⁶ Neeni lyo mwiishi mmbo shilerunndya nde-waany na finya takwa toose.

⁷ Na nde-waay mmbo aleshilemba, kaalasha weesi lwakwa kalunyiisa kamaa ikumi, kya indi Iruva nnyalenra nashivavise-fo.

⁸ Llya aleamba, yeto ta maparanga mmbo tisheva weesi lwafo, findo fyoose fikafyaa ta mabooboo. Na llya aleamba yeto ta mishira toose tishevaa weesi lwafo lyo na findo fyoose fikafyaa ta mishira.

⁹ Ni indo Iruva alesoka nde-waany kashiniinga yeny,

¹⁰ Mmbo kileva indi, kyeeri findo efyo filewata, mmbo shilelollya efo yooryeny, woro eto tilesaamya mburu eto mmbo teetiri maboo-boo na mavaru-varu na mishira.

¹¹ Na nsu wa Iruva kashivia efo yooryeny, Yakobo! Shammbia, “Eka-u yeny mmbee”,

¹² Kashivia, “Ipoony miso afo te kulole, woro toose eto tikesaamya mburu mmbo titiri mishira na maboo-boo na mavaru-varu, mashika shilelollya fyoose Laban alekutannya;

¹³ Yeny mmbo shikee Iruva wa Beteli alya kuleletya ngo ilya mafura, kwaashivikya kyaasa. Ulaalu kwipoo, kuuke kunu urukeny elu, kuwuye na kulya urukeny lulya kuleonikya.”

¹⁴ Raheli na Lea vakanndouwa vakammbia, “Kwiifo kindo kilelusaaya kya waavi ao ding'u efo mmba kwa nde-weeru?

¹⁵ Nyaleluallwa sha veny-fo, mmbo alelukumba, nawe mmbo alemaa fesa teru den?

¹⁶ Mashika masaa yoo moose Iruva alesoka nde-weeru, masaa yoo meni ni eru na vana veru. Kyasiany, ekyo kyoose Iruva alekuvia, ekyo kitani.”

¹⁷ Llyo Yakobo alekupoo kasaamisa vaka vakwe na vana vakwe efo ngamuleny.

¹⁸ Kaipoo findo fyakwe fyoose fyeevikkya, na masaa akwe moose yoo ellyima, na findo filya ewonisa kulya Padan-aramu, naambo nandefika kwa ndeye Isaki kulya Kanaani,

¹⁹ Naasa na Laban endesema moonri akwe mafwaa, na Raheli keeva findo fyeeke maruva a ndeye we Laban.

²⁰ Yakobo keeta Laban ntambo, mashika nnyalemmbia sheelyi akeerisha-fo.

²¹ Naasa karisha we na fiilya fyoose ekee nafyo. Kakwiipoo kakillya mura, keenda alella ifumbu lya Gileadi.

Laban Alelemba Yakobo

²² Kufike nkonu wa kararu Laban kashevio Yakobo alemmaa irisha.

²³ Kaipoo vana-va-mae keenda nawo emmbingyaa ando a mikonu mfungare. Kashenkooya ifumbuny lya Gileadi.

²⁴ Iruva kasheya Laban Mshami efo yooryeny kammbia, “Lola kukwiise. Kulashevia Yakobo irero lyoose lyikava isha ao ikasha.”

²⁵ Laban kakooya Yakobo, na Yakobo mmbo ereiye meema yoo mbai ya ifumbu lya Gileadi.

²⁶ Laban kavia Yakobo, “Nkyoki-ro kuletana?” Mmbo kuleshiita ntambo kwaipoo vefu vakwa sha mifungwa valeendwa wootwa fireny.

²⁷ Nkyiki elyi kuleshiita ntambo kwarisha, nta nkuleshivia naambo shikuvie nakwafo-fo, kukweengye na ifura, na fiimbo, na mbasa, na fivale?

²⁸ Nta nkuleshira shimiminde vashuku vakwa-fo, na vefu vakwa; mmbo kuletana utondo.

²⁹ Lyo shitiri wiidimi wokony lwakwa shikuvavise, kya indi Iruva wa ndoo kio ekyi mmbo aleshivia, “Lola, kwiise, kulasheevia Yakobo nta irero lyimwi-fo, lyive isha ao lyive ikasha.

³⁰ Naasa ulaalu yewe mmbo kulekwipoo mashika elyi kukunndye nnu kyeny kwa ndoo. A mmbo kileva indaany kwaiva maruva akwa?”

³¹ Yakobo karouwa kammbia, “Mmbo shileirya shaamba, kulakooye kusheshisokaa vefu vafo.”

³² Nndu yeto ashekooywaa na maruva afo nalakae na muu-fo. Kisanguny kya vana-va-mae, veru eva, ruuya yekyo kyikee kyafo kukyipoo. Mashika Yakobo lyo nnyalemanya sheelyi ni Raheli aleiiva maruva a Laban-fo.

³³ Laban kaanga yeemeny lya Yakobo, na yeemeny lya Lea na yeemeny lya fishinga fivii, nta nalafilollye. Kasomuka yeemeny lya Lea, kaanga yeemeny lya Raheli.

³⁴ Nawe Raheli emmipoo maruva alya a wongo kaasuruma efo findony fya mishungu fyeekaya, kafikaya. Laban kasallwa efo yeemeny koose nta nalafilollye.

³⁵ Nawe Raheli kavia ndeye, “Nde-yaakwa kulasue elyi shalemwa isalala-fo, mmbo shilwee ndwari ya kyika, Karuuya nta nalalollye findo efyo.”

³⁶ Yakobo kasua, kasakkya na Laban. Yakobo karouwa kavia Laban, “Ukasha lwakwa llo-ki? Na ulyamari lwakwa llo ki, kutani kwashifinngya indo?”

³⁷ Mmbo kwawara-wara findo fyakwa fyoose; nkyokyiny kwakooya-fo kya kyeny kwafo? Kukyivike yaa mbee ya vandu vakwa na mbee ya vandu vafo, valulete yese.

³⁸ Myaaka yei makumi avii mmbo shilekaa kwafo, moonri afo na mburu tafo nta ntilefuna uryo-fo, nta eto ta woro nkwiiyo shileishisha-fo.

³⁹ Ekyo kileratuwa ni ifisi nta nshilekyikweengye-fo, ni yeny shimuni shileipoo iryo lya vayo, yewe mmbo kuleshivesa kyuuke maakony akwa, kwakooya mmbo kilereka nsanyiny ao kwakooya mmbo kilereka kio.

⁴⁰ Shakukaya indo, mwi ukashikora nsanyiny, na mbeo kio, rwe tikashisia misony.

⁴¹ Myaaka yei makumi avii mmbo shilekaa kwafo, shakurunndya myaaka ikumi na yiina shiwoni vefu vafo vavii, na myaaka ingyi irindaru sharunndya findo fyafo fyeevikkya, neewe kwaalasha weesi lwakwa kyamaa ikumi.

⁴² Kulaore ni elyi Iruva nde-yaakwa, Iruva wa Abrahamu na Isaki, ekee neeny ulaalu mmbo kweshuumbutaa na maako aruu. Ngatara yakwa na mashora a maako akwa Iruva mmbo alollye, nkyo kakwiikyimba kio ekyi.

Mma Nnang'ani a Yakobo na Laban

⁴³ Laban karoua kavia Yakobo, “Vefu yewo ni vefu vakwa, na vana yewo ni vana vakwa, na findo efyo fyeevikkya ni findo fyakwa, neefyo fyoose kulollye ni fyakwa; a inu nkyoki-dwa shishidimaa itannya vefu vakwa na vana vawo valeveera?”

⁴⁴ Kyasia, ulaalu luvikyane kyaasa, yeny na yewe, kive nkyo ukureeki nnang'ani yakwa neewe.

⁴⁵ Yakobo kaipoo iwe kalyisaleesa sha ngo.

⁴⁶ Yakobo kavia vandu vakwe, “Sang'iryeny mawe, vakaipoo mawe vakaishura mbillya, vakalyiiya-u shoonga yoo kufii na mbillya ilya ya mawe.”

⁴⁷ Laban kavaanga-u Yegarsahadutha, kyeendi Yakobo kavaanga-u ni Kaledi.

⁴⁸ Laban kaamba, “mbillya yei ni ukureekyi inu nnang'ani yakwa neewe. Kweekyo kukavaangwa Kaledi,”

⁴⁹ Laban kaamba, Iruva namanyi kyeru kyeri yekyi lukee kwaasha noongyi. Ando yoondo kukavaangwa Mispa.

⁵⁰ Laban keengera yaamba, “Kwakooya kwenda kwasisya vefu vakwa ao koora vaka vengyi, lla yelyi shilamanyaa, indi Iruva alulollye.”

⁵¹ Lola mbillya yei ya mawe na ngo yei shaisaleesa nnang'ani yafo neeny.

⁵² Efo fi fivii ni fya ilukumbura. Nshikillyaa mbillya yei shishekapana fira neewe-fo, neewe nkushekillyaa mbillya yei na ngo yei isheshikapa fira-fo.

⁵³ Iruva wa Abrahamu na Iruva wa Nahori, Iruva wa vande veeru asheluuta Naasa Yakobo kalya mboo na irina lya Iruva yeto nde wakwe Isaki emwinndyaa.

⁵⁴ Yakobo kashisha ng'umbe kaniingya kiraso efo ifumbuu, kavaanga vana vakwe vashelya shoonga, vekimaa ilya vakakaa rembo efo ifumbuu kio tara-raa alya mbai ya ifumbu.

⁵⁵ Laban kakwiipoo ngama nraasi kamiminda vashuku vakwe na vefu vakwe kavavikkya mbora. Laban akimaa kawuya kyeny kwakwe.