Mapookyony 26 - BIBILLYA Mareiyo Meele a Iruva

Isaki Asamya Urukeny lwa Kerari

¹ Ikasha shaa urukeny elo, shaa ingyi nshi ilya ya kyeeri kya Abrahamu-fo. Isaki keenda kwa Abimeleki mangyi ya Vafilisti kulya Kerari.

² Nndumi Iruva kakoora nawe kammbia, “Lola kulashesoka na Misri, mmbo kukaa yoo urukeny elo nshekoora.”

³ Kaa urukeny weny, neeny nkaa neewe, shikuvikye mbora, mashika nshekuniingaa ngyuruka eti toose yewe na ufyari lwafo. Na yeny nshenangisaa kyaasa kyakwa kilya shilevika na ndoo Abrahamu.

⁴ Nshefumbutaa ufyari lwafo sha nyinyiri ta efo nginii-u, neen nsheningaa ufyari lwafo ngyuruka eti toose, na yoo kwafo nng'u ando ngyufyari toose ta ulana tishevikywa mbora.

⁵ Kimmba Abrahamu aleinndya unyanga lwakwa, katira na mavavasyo akwa, na mavavaso akwa na uvavaso lwakwa.

⁶ Isaki kakaa Kerari.

⁷ Vandu va efo vakammbesa mbony ta nka wakwe. Kavavia, “Yeu ni mfwama; mashika llya aleereya yaamba ‘Yeu ni nkaakwa,’” vandu va uruka llwa valasheemmbwaa kimaruma kya Rebeka, mashika mmbo ekee nsha nnu elyi kwallola.

⁸ Naasa elyi ankaafo mikonu miingyi, Abimeleki mangyi ya Vafilisti, kaamaiya na idirisheny kalollya Isaki eelelembaa nkaakwe Rebeka.

⁹ Abimeleki kavaanga Isaki kammbia, “Dede deny yeu ni nkaafo, a nkiki elyi kuleamba, ‘Yeu ni mfwa-ma?’” Isaki kammbia, “Mmbo shilekusara shilashefwa kyeendwa mmbwe.”

¹⁰ Abimeleki kammbia, “Nkyoki ekyi kulelutannya?” Kweenda kukooye umwi wa vandu wakwa mmbwe alekaa na nkaafo nta nalaireye, yoo mmbo kweluutya uvingo.

¹¹ Naasa Abimeleki kavavasa vandu woose kavavia, “Kwakooya nndu ashepaana nndu yeu ao nkaakwe nkuti nawaawa.”

¹² Isaki kavaaya mbeu kulya urukeny lulya, mwaaka ulya mweni kawonisa fimu fiingyi ka iyana mashika, Nndumi Iruva mmbo alemmbikya mbora.

¹³ Na nndu yeu kang'ana, keengera ivesywa, kava nndu nnini nnu.

¹⁴ Katira masaa a moonri, na ng'umbe na mshinga meengyi. Vafilisti vakantirya kififi.

¹⁵ Na firori filya fyoose fyesumwa ni mashinga a ndeeye Abrahamu kyeeri ekee na muu, Vafilisti mmbo vemmaa ifilyikya.

¹⁶ Abimeleki kavia Isaki, “Kweete kweru, mashika yewe mmbo kutiri finya ngota yese.”

¹⁷ Naasa Isaki kauka-fo, kandekaa imungony lya Kerari.

¹⁸ Isaki kawuya ilukkwa-se firori filya fya mura vefisuma kyeeri kya ndeye Abrahamu, mashika Vafilisti valya mmbo vefilyikya kyeeri Abrahamu emaa ifwa; nawe kafifishya marina alya meni kiinani na shaasa ndeye Abrahamu efivanngye.

¹⁹ Mashinga a Isaki akasuma kulya imungony lyilya vakaonisa-fo kirori kya mura usheekaa.

²⁰ Veesa findo va Kerari vakasakya na veesa findo fya Isaki vakaamba, “Mura yeu mmbweru.” Lyo kafishya kirori kilya irina ni Eseki, mashika elyi valekapannya nawe.

²¹ Vakasuma kirori kyingyi, neekyo-da vakakapannya. Kakivaanga irina lya vayo Sitna.

²² Kaukafo kandesuma kirori kingida, lyo ekyo mmbalekikapannya-fo. Kakifishya irina ni Rehobothi, nyelyi aleamba, “Mashika ulaalu Nndumi Iruva alluwonisya mwaanya neese lushefumbukaa urukeny,

²³ Kasaama ooka yoo kafika Beer-sheba.”

²⁴ Nndumi Iruva kansheya kio kilya kyeni kammbia, “Yeny ni Iruva wa ndoo Abrahamu kulaereye-fo, mashika yeny shikee neewe, neeny nshekuvikyaa mbora, neefumbuta ufyari lwafo kimaruma kya ishinga lyakwa lyo Abrahamu.”

²⁵ Kasongosia kitara kyerasya, kasenndya-u irina lya Iruva. Kavika-u yeema lyakwe, na mashinga akwe akasuma-u kirori kya mura.

Mma Nnang'ani ya Isaki na Abimeleki

²⁶ Abimeleki kooka Kerari kansora ando amwi na ngyama yakwe Ahusati, na Fikoli, nshilyi wa vasikari vakwe.

²⁷ Kyava-se inda elyi mwashisheya neeni mummaa ishisua na ishifuna kwany?

²⁸ Vakaamba, “Dede mmbo lulelollya Nndumi Iruva mmbo akee neewe;” nkyo kyimaruma lukaamba, “Lukulyisye mboo luveni, yese na yewe, lusange-se neewe.”

²⁹ Kyeyaamba llushekitanaa makasha-fo, mashika llulekupaana-fo, nta llulekutannya kindo kyingyi-fo kuuta mesha tupu, lukakura kwakweengya noofoo; newe ulaalu kukee mmbikye mbora wa Nndumi Iruva.

³⁰ Nawe Isaki kavakorya ilule lya shoonga, vakalya vakana.

³¹ Vakakupoo ngama nraasi, vakalyiiana mboo wo veni na veni. Numa Isaki kavatauwa vakeenda na ufoo.

³² Kikavaany nkonu eto mweni, mashinga a Isaki vakashemwengye mbony vakammbia, “Mbony ta kirori kilya valesuma, vakaamba, ‘Lwallollya mura.’”

³³ Kakifishya irina ni Shiba. Naasa irina lya muri eto ni Beer-sheba, fika inu.

Vaka va Esau va Masanga Engyi

³⁴ Kyeeri Esau eetiri myaaka makumi aana, kaora Yudithi, mfu wa Beeri, Mhiti, na Basemathi, mfu wa Eloni, Mhiti.

³⁵ Vakavavisa nnu mirima ya Isaki na Rebeka.