Mapookyony 14 - BIBILLYA Mareiyo Meele a Iruva

Abramu Akira Loti

¹ Naasa kyeeri kya Amrafeli mangyi ya Babilony na Arioko mangyi ya Elasari, na Kedorlaoma mangyi ya Elamu na Tidali mangyi ya Goimu,

² vakakapa fira na mangyi ya Sodoma na Birsha mangyi ya Gomora, na shinabu mangyi ya Adima na Shebari mangyi ya Seboimu na mangyi ya Bela (nyo Soari).

³ Yewo woose vakakwaannya imungony lya Sidimu, (kulya Yeeve lya Shumbi).

⁴ Ando a myaaka ikumi na ivii vakarundya Kedorlaoma, indi mwaka wa ikumi na kararu, vakamwaluka.

⁵ Mwaka wa ikumi na kaana, Kedorlaoma na vamangyi vekee nawe. Vakakapa Varefaites kulya Ashteroth Karnaimu, na Varusi kulya Hamu, na Vaemu kulya Shawe-kiryataimu,

⁶ Wahori kulya ifumbuny lyawo lya Seiri kufike Elparani kufii na kasa koomu.

⁷ Naasa vakawuy vakafika Enmisfati, (nyo Kadeshi) vakakapa uruka loose lwa Vaamaleki, na lwa Vaamori yewo vekee Hasason-tamari.

⁸ Mangyi wa Sodoma na mangyi ya Gomora na mangyi a Adima na mangyi ya Seboimu na mangyi a Bela, (nto Soari) vakakupoo vakadeesya fira kulya imungony lya Sidimu;

⁹ vakapani na Kedorlaoma mangyi ya Elamu, na Tidali mangyi ya Goimu, na Amrefeli mangyi ya Sinari na Arioko mangyi ya Elasari, vamangyi vaana ando a valya varaanu.

¹⁰ Na imungo lya Sidimu mmbo lyeshwe muya. Na vamangyi wa Sodomu na Gomora vakarisha, vakafiiya-fo, na yewo vesaa-u vakarishya ifumbuu.

¹¹ Vakatira findo fyoose fya Sodoma na Gomora na shoonga tawo toose, vakeenda.

¹² Vakatira Loti mwana wa mwanamaye wa Abramu yeto ekee Sodoma, na masaa akwe vakeenda.

¹³ Nndu umwi aleturushuka-fo, kafitya Abramu Mwebrania mbony tilya; nawe mmbo elele Ngoroshony ya Mamre, Mwamori ulya mwanamaye wa Eshkoli na mwanamaye wa Aneri, nawo mmbo veeshani na Abramu.

¹⁴ Abramu ekiita mwanamaye antirwa mfungwa, kaniingya vasero vakwe fisha, vawonikkye yoo kyeny kwakwe, vandu iyana na ikumi na nyanya. Kavasora fika Dani.

¹⁵ Vakakudeesya vakapani nawo elyi kio we na mashinga akwe. Kavakapa kavafuna fika Hoba, ukee taari ya ngama ya Dameski.

¹⁶ Kaviira findo fyoose, kaviira na Loti mwanamaye na findo fyoose ando amwi na vaka na womi.

Meleksedeki Avikkya Abramu Mbora

¹⁷ Kyeeri Abramu aleuka ikapana na Kedorlaoma na vamangyi valya vekee nawe, mangyi ya Sodoma kashemwaambya alya imungony lya Shawe, (nalyo ni imungo lya mangyi).

¹⁸ Na Melkisedeki mangyi ya Salemu keende nkate na mfinyu, nawe mmbo ekee nkohani wa Iruva yeto Akee Uwe ya fyoose.

¹⁹ Kammbikya mbora, kaamba, “Iruva yeto Akee Uwe ya findo fyoose navikkye Abramu mbora, atannyi iruveeu na ulana.

²⁰ Naitikiswa Iruva eto Akee Uwe ya findo fyoose, yeto alevika vakiduva vafo maakony afo.” Abrahamu kaningya kyenga kya ikumi kya findo fyakwe.

²¹ Mangyi wa Sodoma kavia Abramu, “Shininga vandu yewo, na masaa yoo engyi kwipoo yewe.”

²² Abramu kavia mangyi ya Sodoma, “Shallya mboo na irina lya Nndumi Iruva, Iruva eto akee Muumbi wa iruveeu na ulana,

²³ sheelyi nshisheipoo nta uruu ao ukova lwa kyaaru, nta kindo kimwi kyafo-fo, kulasheeamba, ‘Shammallwa Abramu isimba!

²⁴ Nshishipoo nta kindo kimwi-fo kuuta findo efyo vasero valelya na waavi lwa vandu ewo valeenda neeny, mmbo Aneri, Eshkoli, na Mamre; wo vaonise waavi lwaawo.’”