Mapookyony 1 - BIBILLYA Mareiyo Meele a Iruva

Iruva Aumba Iruveu na Ulana

¹ Yoo mapookyony Iruva mmbo aleumba iruveu na ulana.

² Na ulana lwekee ufu lukava ruu, na ireema llyo lyeesikye na Mumuyo wa Iruva nto wekee uwe ya mura.

³ Iruva kaamba, “Kuve sa,” nayo sa ikava.

⁴ Iruva kalollya sa ni shisha. Iruva karauwa sa na ireema.

⁵ Iruva kafishya sa ni “Nsanyiny,” na ireema kalyivaanga “Kio,” Kukaila kukakya, nto nkonu wa mbee.

⁶ Iruva kaamba, “Kukaefo ngina yoo nnang'ani kavii ya mura, irauwe mura.”

⁷ Iruva kavikau ngina, karauwa mura ulya ukee uwe ya ngina na ulya ukee si ya ngina; kyikava indo.

⁸ Iruva kafishya ngina ilya irina ni iruveeu. Kukaila kukakya; nto nkonu wa kavii.

⁹ Iruva kaamba, “Mura ukee si ya ngina ukusanyirye ando amwi, naambo kushe-u ando kwaarutu.” Nakyo kyikava indo.

¹⁰ Iruva kavaanga yoo kwaarutu ni uruka; na kyikuumbony kya mura ni yeeve. Iruva kalollya ni kisha.

¹¹ Iruva kaamba, “Uruka lummyi mooro, miri ishuuta mbeu, na miri ya ndunda wo nri utiri ndunda na ngata ya vayo, na mbeu ta vayo, yaa ulaniny, nakyo kyikava indo.”

¹² Uruka lukamiisa mooro, mare atiri mbeu ta wo ngata. Iruva kalollya ni kisha.

¹³ Kukaila kukakya, nto nkonu wa kararu.

¹⁴ Iruva kaamba, “Kukaefo fyeende sa efo nginii-u naambo firauwe nsanyiny na kio; five mfyo ngyende teyoora fyeeri na mikonu na myaaka.

¹⁵ Lyingyi five mfyo fyeende sa efo nginii-u fimikye ulana.” Kyikava indo.

¹⁶ Iruva kavika fyeende sa fivii finiini, kilya kiniini kishillye nsanyiny na kilya kidu kishillye kio; kavevika-fo na nyinyiri-da.

¹⁷ Iruva mmbo efivika efo nginii-u naambo, fyeende sa urukeny,

¹⁸ na ishillya nsanyiny na kio fiverauwa sa na ireema. Iruva kalollya ni kisha.

¹⁹ Kukaila kukakya, nto nkonu wa kaana.

²⁰ Iruva kaamba, “Mura wiishwe findo fikee na muu, na ndeye tirumbuke nginii-u uwe ya uruka.”

²¹ Iruva kavika-fo mafisi maniini a mureny, na fyuumbe fya mureny fya wo ngata. Na ngata ta ndeye tirumbukaa, wo imwi na ngata ya vayo Iruva kalollya ni kisha.

²² Iruva kafivikya mbora, kaamba, “Fwarikeny, mufumbuke, mwiishure mura wa yeeve, ndeye nato tiingifwa urukeny.”

²³ Kukaila kukakya, nto nkonu wa karaanu.

²⁴ Iruva kaamba, “Uruka lufwarise fyuumbe fikee na muu fya ngata ya vayo, findo fya mmba, neefyo fikuruffwa si, na findo fya ngoroshonyi fya wo ngata,” kyikava indo.

²⁵ Iruva kavika-fo ifisi lya ngoroshonyi lya wo ngata, na findo fya ivikya fya wo ngata na wo kindo kikurufwaa si kya wo ngata. Iruva kalollya ni kisha.

²⁶ Naasa Iruva kaamba, “Nndeny luumbe nndu aluvakye wa fwana yeeru. Ashillye makunga efo mureny, na ndeye ta efo nginii-u, na findo fyeevikya na uruka loose deny, na yekyo kyoose kikufurwaa efo si.”

²⁷ Iruva kaumba nndu ammbakkye wa fwana yakwe, Iruva kaumba, nndumi na nka kavaumba.

²⁸ Iruva kavavikya mbora, kavavia, “Fwarikeny mukwaani ulaniny koose, mwiishure uruka, na ilusalallya, mushillye makunga efo yeeveny, na ndeye na wo kyuumbe kitiri muu kikeerua ulaniny.”

²⁹ Iruva kaamba, “Lolen, shamuniinga wo mooro utiri mbeu, ukee kunu urukeny, na wo nri, yeto ndunda ta vayo titiri mbeu, fishevaa mfyo shoonga yaany,

³⁰ mfyo na shoonga ya mafisi a ulaniny, na ya ndeye ta nginii-u, na ya wo kindo kifurukaa sumbai, kitiri muu; mooro moose wa mare, ng'u shoonga yaany,” kyikava indo.

³¹ Naasa Iruva kalollya wo kindo alekivika-u ni kisha nnu. Kukaila kukakya, nto nkonu wa karindaru.