MALAKI 3 - BIBILLYA Mareiyo Meele a Iruva

¹ Loleny-te shiifo shirumaa nsu wakwa nashiirye mbee. Na Nndumi Iruva yeto mumbereye ashesheyaa vandu vakwe tiny. Ee, nsu ulya wa kyaasa amusenyi. Mmbwe yeto akeesha. Ni Nndumi Iruva wa matorito aamba indo.

² Lyo mmbi ashekaaryaa elyi nsu yeto ashaa? Ao ni vi ashesalala elyi ashaa? Mashika we mmbo ashevakaa muro wa mfuru wa iffwa fesa. Ao mfwanu wa sabuny ya nndu asangyaa soori.

³ Nave sha nndu akeeffwa fesa na muro na iyiilyisa. Nawe mmbo asheilyisaa vana va Levi, navasangye sha sahabu na fesa. Llyo vasheutyaa Nndumi Iruva firaso fyeeremutu.

⁴ Llyo firaso fya Yuda kulya Yerusalemu fishesenyaa Nndumi Iruva, shaasa kyekee llya lya mbee.

⁵ Nshevaa mwiuta uvingo, shuutye vasavi na vatuusi uvingo, neewo valya mboo ta wongo. Neewo veema varundi usumanu lwawo lwa weesi. Vakafota vaka va ding'u na vana va ngwera. Vakeema na nndu muny usumanu lwakwe. Nta mmbashereyaa yeny Nndumi Iruva wa matorito-fo.

Yuuta Kyenga kya Ikumi

⁶ Yeny Nndumi Iruva nshireveka-revekaa-fo. Nkyo kimaruma yeni vana va Yakobo mulemamitwa.

⁷ Uka kyeeri kya vande vany mmbo muleeveka mukara mavavasyo akwa. Shiwuiyeny-te, neeny shimuwuiye yeni. Lyo yeni mukaamba, “A mmbo lukuwuiyaa inda?”

⁸ Nkyo dede kivaa nndu neeve waavi lwa Iruva? Yeni mmbo mukeshiivya yeny. Neeni mukawuya yaamba, “A mmbo lwakwiivya inda?” Mmbo mwashiivya firaso na kyenga kya ikumi.

⁹ Mukava vadenge elyi mwashiivya, yee, yeni moose deny.

¹⁰ Shyeengyeny waavi lwa kyenga kya ikumi kyoose-te, naambo mmba yakwa itire shoonga, musheese nakyo, yeny Nndumi Iruva wa matorito, mulole shanra shilamuruyaa mbora tipusuke tuuka iruveeu kutani muturaa ando kweevika!

¹¹ Neeny mmbo nshemwekaa imamita makuru yoo alyaa fimu fyany, nta misabibu yaany nnyisheangaraa ndunda tavayo. Kyeeri kilafika-fo.

¹² Neeni mmbo mushevaa va ngoma mbee ya vandu va masanga engyi moose, kimmba uruka lwany lushesenyaa nnu deny. Ni Nndumi Iruva muni matarito aamba indo.

Kyaasa kya Iruva Kyesarya

¹³ Nndumi Iruva kawuya kaamba, “Marero any ammba moomu nnu deny.” Neeni mukaamba, “Mmarero-ki yoo lulerera?”

¹⁴ Mmbo muleamba irundya Nndumi Iruva lyitiri mbusa-fo. Na lyingyi, mmbasha-kyi lulewona-u yiindya mavavaso akwe? Na ivallya na Nndumi Iruva lwiitiri vio?

¹⁵ Na ulaalu lukaamba yewo veekutuula mmbo yewo vatiri ngoma, yee, veetana makasha mmbo vatiri ifura. Neewo veesa Nndumi Iruva vakavesyo.

¹⁶ Naasa valya veevallya na Nndumi Iruva vakaumburana veni na veni. Nndumi Iruva kavaarannya keeta kilya vaamba. Kyitabu kyavayo kikareiyo kima kya yewo valevallya na Nndumi Iruva vakeetikisa irina lyakwe.

¹⁷ Nndumi Iruva wa matorito kaamba, “Yewo mmbo vandu vakwa nkonu eto weefurumya.” Yewo mmbo ifura lyakwa Neeny nshevasaryaa kimwi sheelyi nndu asarya mwana wakwe alemfurukannya.

¹⁸ Yoo nng'u mushelollyaa kilakanisa kya vesha na varavi, na kya yewo veerunndya Iruva neewo valakenndundya.