Luka 19 - BIBILLYA Mareiyo Meele a Iruva

Yesu na Sakayo

¹ Na elyi amfika kulya Yeriko eefo ashiraa-u,

² nalyo akakau nndu avangwaa irina lyakwe ni Sakayo. Nawe ekee nniini wa vadedemi kaveva na nndu isimba.

³ Naasa karuuya mwaanya wa ilollya Yesu namanyi mmbwa ngata kyi nalaidimi mashika a mamwiingyi ulya wa vandu, kimmba akee nndu wa yuumba ifii.

⁴ Nalyo karisha na mbee, kasaama nriny wa nkuu, naambo nallolye. Mashika nnyo shia ashiraa.

⁵ Nalyo elyi Yesu afika-u kalola efo uuwe, kammbia, “Sakayo, oloka-fo uviny. Mashika yeny shalollya kuti shive muny wafo inu.”

⁶ Nawe kaangusya yooloka-fo, kammbwarya efo kyeny kwakwe efuraa.

⁷ Na llya vandu valelolya kive indo vakarininda woose, vakaamba, “Mmbo angaa neefo mmba kwa nndu llyamari nandekwiimurisa-fo.”

⁸ Naasa Sakayo kashesalala yoo mbee ya Nndumi kammbia, “Lla-te Nndumi findo shitiri nshaavaa kavii, kyenga shikininge vakiva. Na kwakooya shilensoka nndu kindo nshembiryaa kaana.”

⁹ Naasa Yesu kammbia, “Kyeny eka kammbona ukiro inu, kimmba neewe-da ni mwana wa Abrahamu.

¹⁰ Mashika Mwana yeto wa nndu mmbo asheye iruuya ekyo kirekye nakikire.”

Kyaaso kya fesa

¹¹ Naasa veefo veshaaranyaa mbony yeto, nawe kalungya-u kaveera kyaaso. Nyelyi eefo ashaafukyaa Yerusalemu nawo veeshi kulakooye umangyi lwa Iruva lwiifo lufumaa paa na lyimwi.

¹² Naasa kaamba, “Kweefo nndu wa mmba ya mangyi aleipoo kyaaro kya uruka lwa kwaasha, nandetira-fo umangyi nawuyeny.

¹³ Naasa kavaanga mashinga alya akwe ikumi, kavaniingya fesa ta ikapa mbusha. Kavavia, ‘Endekapeny nato mbusha shitani shawuya.’

¹⁴ Naasa vandu va uruka llwa lwakwe muni vensuuye. Vakaruma varumi veellatya numa vandeamba, ‘Llukundye kutire umangyi kulwiitorye yese-fo!’

¹⁵ Nalyo kyikava elyi antira umangyi ammbuya na kyeny, kaamba kundevaangwa mashinga alya alevaniingya fesa tilya naambo namanyi wo nndu mbusha alewonisa.

¹⁶ Nalyo ulya wa mbee kasha nang'u, kaamba, ‘Nndumi iyana llya lyafo lya fesa lyileende mbusha ya mayana ikumi.’

¹⁷ Nawe kammbia, ‘Eeka ishinga isha, mmbo kweetiri fyaangu kwavefikallya na usaari. Tiraany ushilyi lwa iitorya miri ikumi!’

¹⁸ Nalyo ulya wa kavii kasha nang'u kaamba, ‘Nndumi iyana lyafo lya fesa lyileende mbusha ya mayana araanu.’

¹⁹ Naasa na yeu-da kavemmbia, ‘Neewe vaany mwiitori wa miri iraanu!’”

²⁰ “Nalyo ulya ungyi kasha kaamba, ‘Nndumi iyana llya lyafo lya fesa akakalyi shilelyifingya kiraminy shalyisuruma.

²¹ Mashika shilekwiryaa kimmba yewe ni nndu nnyuku. Mmbo koondwa kundo kulaarye. Kwaveilula kundo kulasuye mbeu.’

²² Nawe kammbia, ‘Yewe ishinga yeesi! Ekyo kyauka kaniny kafo nkyo nkutyaa nakyo uvingo lwafo. Elyi kweeshi yeny ni nndu nnyuku shoondwa kundo shilaarye, shaveilula kundo shilasuye mbeu.

²³ A kimaruma kwara kulanderwaa fesa ilya yakwa efo kwa vandu vekapa mbusha na fesa ta vandu nkyikyi? Neeny elyi sheshaa llyo sheewaryaa kimwi na ulyimi lwa vayo?’

²⁴ Nalyo kavia valya vasalali yoo kufii, ‘Nsokeny iyana elyo lyakwe lya fesa muniingye yeto atiri mayana ikumi.’

²⁵ Nawo vakammbia, ‘Nndumi, mmbo atiri mayana ikumi-te!’

²⁶ Neeny shamuvia, ‘Wo nndu atiri kindo mmbo aniingwaa na fingi. Na yeto nalatiri mmbo asokwaa na kilya atiri.

²⁷ Indi vakiduva valya vakwa valya valakundye shivikwa mangyi mwivashilya, endeveendeny na yaa muvarengetye si shiilolye!’”

Yesu aanga Yerusalemu

²⁸ Nalyo elyi ammaa irera indo keera na mbee asheendaa irwa na kulya Yerusalemu.

²⁹ Nalyo kyikava elyi aafukya kulya Betifage na Betania kulya ifumbuny lya miri ya mafura, nalyo karuma vandu vakiloshyony vavii.

³⁰ Kaamba, “Endeny efo muriny usumani na yaa lukai. Mukafika-fo mushekooyaa ngashe ya nshungu ikee shifingye ando nayo ilandesaamwa ni nndu. Iporomweny musheengye.

³¹ Na kwakooya nndu amuvesa, nnyeeki mwaiporomwa mmbo mushambaa ni Nndumi aikundye!”

³² Naasa valya varumwa vakakweengya vakavekooya indo-da shaasa avavia.

³³ Naasa elyi veefo veporomwaa ngashe ilya veni valya va vayo vakavavia, “Nkyiki elyi mwaporomwa ngashe yei ya nshungu?”

³⁴ Nawo vakaamba, “Ni Nndumi aikundye-te!”

³⁵ Nalyo vakayeengye Yesu. Vakawuya vakaala soori tawo ta yeerya efo mungony wa vayo, vakasaamisa-u Yesu.

³⁶ Naasa eefo ashendaa nawo vakaala soori tawo ta yeerya efo shia.

³⁷ Naasa elyi amfika alya kufii na yoolokyony lya ifumbu llya lya miri ya mafura, nalyo mamwiingyia valya vakiloshyony kyakwe vakapooka iitikisa Iruva na unyanga uniini velookaa, kimaruma kya findo filya fya wiidimi valolye fyoose.

³⁸ Vakaamba, “Kundearafumwa yeu asha akee mangyi arumwa ni Nndumi! Efo iruvee-u kuvaa na ufoo na efo kukee uuwe ya findo fyoose kukatira tikisi!”

³⁹ Nalyo Vafarisayo vaangu vakee efo nnang'ani ya mamwiingyi ulya wa vandu, vakammbia, “Llosha kyeemya vandu yeva vakiloshyony kyafo-te!”

⁴⁰ Nawe kaallwa kaamba, “Kwakooya wo vamalalya ni mawe yaa ashekapaa kyoorongye.”

Yesu Adonissya Yerusalemu Misoru

⁴¹ Na elyi eefo ashaafukyaa-fo kalola muri ulya kaudonisya misoru.

⁴² Kaamba, “A nkyema kuveishi na yewe kindo kyeekweengyee ufoo naakwa ni nkonu yeu wa inu! Indi kwankisurumwa kulashekilolyaa-se ulaalu-fo.

⁴³ Mashika kukaa kushe kyeeri kikuwoyaa tiny elyi misa ashekuringityaa sha isimamba riti vakuraye deny vakushingilye taari toose.

⁴⁴ Nawo vakuwunduye si vakusande na vana vafo va efo nnang'ani yafo, nta mmbasheraa-u iwe lyikweekyerye iwe uroye wa vayo-fo, kimmba kwanra kulamanya kyeeri kyafo kya isengerwa.”

Yesu aanga mmba ya Iruva

⁴⁵ Nawe keera neefo poo ya mmba ya Iruva kaanta-fo valya veefo veekumbaa findo.

⁴⁶ Kavavia, “Mmbo kyikee kireiye kyeamba, ‘Mmba yakwa kuti ive mmba yeeterevya.’ Lyo yeni mukawuya iyaallwa mbanga ya veala shia.”

⁴⁷ Naasa kava mwiilosha efo mmba ya Iruva wo nkonu. Na vakohani valya vaniini vakasanga na veelosha mavavaso vakasia mwaanya weemmamita, na vandu valya vasongoru va uruka ni kiwo-da.

⁴⁸ Nawo nta valaoni kyeetana mashika mamwiingyi moose wa vandu mmbo weeriani nawe vemwaaranyaa.