ISAYA 9 - BIBILLYA Mareiyo Meele a Iruva

Mangyi ashewonikaa

¹ Indi uruka elo mmbo lwenkaa ukyiveny na mavavywa ando a kyeeri kyaasha; lyo nlushekaa indo fyeeri fyoose-fo. Kyeeri kya Sabulon na kyeeri kya Naftali uruka elo mmbo lweeke lwiipale, indi numa kashewoora itumbe lyakwe taari ya ngama kwakulya ya Yordan naakwa ni kulya Galilaya urukeny lwa vandu va masanga moose.

² Vandu valya veeke yeenda yefo ireeminy lying'ani, vallollya sa ing'ani; valya veeke yefo urukeny lwa ireema lya makimima vamikywa ni sa.

³ Vandu vawo vammengereka, na ifura lyawo lyikaengereka; vakafura mbee ya usangu lwafo, sha kyeeri kya maulullyony a fimu, sha ifura lya vandu vashaava mifungwa.

⁴ Mashika kwanvaporomwa yooka ilya yeevarovye na ngova tilya veekekapwa nato meeveny awo. Valya veekevawonnya kwavatuula sha valya va kyeeri kya Vaamedi.

⁵ Fyaaru fya veekapana, na soori tawo tifwani samu mmbo tishemamitwa sha ngwi tayaata muro.

⁶ Mashika kweru mwana ammbonika, ammbonika mwana wa vomi, na umangyi mmbo llukee meeveny akwe na irina lyakwe ashevaangwa, “Mangyi wa marikiso Iruva Atiri Finya! Nnde wa llung'anu! Mangyi ya Urilalyi!”

⁷ Kya umangyi na ushilyi lwakwe ni fya llung'anu filatiri umando, mmbwe asheshillya ando a mangyi Davidi mmbwe asheuvambisaa na iusaleesa fika llung'anu. Efyo mmbo fitanwaa ni Nndumi Iruva wa matorito.

Ngapo ya Vaisraeli

⁸ Nndumi anruma irero lya wiikyimbi kwa Yakobo, nalyo mmbo lyishewoyaa umangyi lwa mmba ya Israeli.

⁹ Vandu woose llyo vamanyaa ufyari loose lwa Efraim na valya vakee Samaria koose kya umbafu elo lwawo na ikurosa vaambe:

¹⁰ “Masimamba a matofali ammbunduka, indi yese mmbo lusaaleesa kwa mawe akee mapashe! Mmba ta myaamba ya mikuu tammbwa indi ando kwa-va-yo mmbo lushesaleesa kwa mbau ta mieresi.”

¹¹ Akyo Nndumi Iruva ammbaattya mwaandu na vakiduva vakeengereka.

¹² Vaashuru va taari ya ngama na Vafilisti va taari ya nkwaany vamiipoiyo fisha kya Israeli. Naakwa nnyendo, nyashi ya Nndumi Iruva mmbo ikeengera isaama na ngapo tikeengereka.

¹³ Lla neefo vandu varikkywa ngapo, mmbakeekurya nta ikunda yaalukya Nndumi Iruva wa matorito-fo.

¹⁴ Nndumi Iruva mmbo asherummbwa-fo nrrwe na nkya, maramba a maangashi na makongye kwa nkonu umwi-nsi.

¹⁵ Vasongoru na vandu vasuri mmbo nrrwe na vakisuku yewo veelosha wongo mmbo nkya!

¹⁶ Veetetera vandu yeva, mmbo vakeevalemba, neewo veeteterwa vakeereka shia.

¹⁷ Kweekyo Nndumi Iruva nnyatiri isarya lya vakoo-fo nta ilyillya ngwera na vaka va ding'u-fo, mashika woose mmbo vakee kilasha na Iruva; woose mmbo vakeeyaamba wongo. Naakwa nnyendo nyashi ya Nndumi Iruva mmbo ikeengera isaama na ngapo tikeengereka.

¹⁸ Ukasha mmbo lukeyaaka sha muro ukeekora misuusuu na miinga, ukasha sha muro ukeekora nsito na ituuru lyavayo lyikeesaama uwe nginii-u.

¹⁹ Kyimaruma kya nyashi ya Nndumi Iruva wa matorito, uruka mmbo lukeeyaaka muro na vandu mmbo ngwi ta muro yeto, kuleefo nndu akeelyillya mwanamaaye.

²⁰ Wo nndu akeetefura kunu na kunu, nta nkyikeemaa-fo vakalya na taari eyo ya kavii lyo mmbakeewuura-fo, wo nndu kalya nndu ungyi.

²¹ Manase na vandu vakwe vakasakya na vandu va Efraim, Efraim na vandu vakwe, vakasakya na vandu va Manase. Vandu va Manase vkasanga amwi na vandu va Efraim vakakapa Yuda. Nta ekyo nkyilemaa ifweerisa nyashi ya Nndumi Iruva-fo. Mmbo vakeengerwa ikapwa. Nyashi ya Nndumi Iruva mmbo ikeengera isaama na ngapo tikeengereka.