ISAYA 66 - BIBILLYA Mareiyo Meele a Iruva

Nndumi Iruva aleta masanga

¹ Nndumi Iruva aamba indi, ngina ni kiri kyakwa kya umangyi, na ulana ni ando kwa yeekerya marende akwa; mmbo mushitanyaa mmba ya ngata-kyi? Na ando a iimuya ni ando a ngata-kyi?

² Mashika woko llo luletana efyi fyoose, findo efyi fyoose kutani fyayutika, ni Nndumi Iruva aamba, indi nndu yeu mmbwe shimullaa, nndu akee nnana, atiri ngoo ikunyiisye itirwa mbwiiri, yeto akee irerema kyeeri eeta irero lyakwa.

³ Yeto ashisha ng'umbe mmbo ava sha nndu mwiwaa nndu; na yeto auta kiraso kya ngurana ya mburu nsha nndu afisha singo ya kite; na yeto auta firaso nsha nndu auta samu ya nguwe, na yeto akeefumbira nsu wa ufumba nsha nndu akeviikya ifwanu mbora; Yee, vasauwa shia tawo veni, na mirima yaawo ikafura na findo efyo fyawo fikasha.

⁴ Na yeny shimuni shisauwaa ngapo tawo, mmbo nsheende werei lwawo uwe yaawo, mashika kyeeri shilevaanga mmbaleirika-fo, sharera mmbaleeta-fo; indi mmbo valetana maravi mbee ya miso akwa, vakasauwa findo filashiseny.

⁵ Aranyiny irero lya Nndumi Iruva, yeni mukererema kiruma kya irero lyakwe; vana vama vany vamusuuye yeni, valemura kimaruma kya irina lyakwa, waleamba, “Naarafumwa Nndumi Iruva lwiidimi ilollya ifura lyany; indi washesutwaa.”

⁶ Arannyiny, kyoorongye kya kyituuru kyuuka muriny! Kyorongye kyuuka mmba ya Iruva! Ni unyanga lwa Nndumi Iruva aketaiya vakiduva kya mashora awo!

⁷ Kulaore ammbona mavina kaona mwana! Kulaore ammiita mavaywo, kaona mwana wa vomi,

⁸ Mmbi alemmiita irero elyi? Mmbi alellollya mbony sha eti? Ndesa! Uruka lushidimimaa iwonika nkonu umwi? Isanga lyishidimaa iwonika lyimwi-nsi? Mashika shaasa Sioni aleeta mavavywo, aleera vana vakwe.

⁹ Ndesa! Yeny sheende vana kufii na iwonika, shiveemi valaonike? Ni Nndumi Iruva aamba; yeny shikee iwona, ndesa! Shifinge nsanga? Ni Iruva wafo aamba.

¹⁰ Fureny ando amwi na Yerusalemu, kapeny mindoro kimaruma kyakwe; yeni moose munkundye, fureny ando amwi nawe na ikyesa, yeni moose mukeiya kimaruma kyakwe;

¹¹ mwidimi yoonga, na iwutiswa mmalla a iviirywa mmuu lyakwe, mwidimi ikama, na ifuriswa ni wiingyi lwa usuri lwakwe.

¹² “Mashika Nndumi Iruva aamba indi, lola mmbo shinniinga umasi sha mura, na usuri lwa masanga sha mura wishwe shapu, neeni mukooye yoonga; mushipowaa; mulelembywa yoo ndiny.

¹³ Shaasa nndu akeeviirywa muu mmaye, ni indo na yeny shimuviiryaa muu; neeni muviirywaa muu kunu Yerusalemu.

¹⁴ Neeni mulollyaa na mirima yaany ifure, namafua any natire finya sha mare mavisi, na woko lwa Nndumi Iruva lulollywa, yelwo lukeilola varundi vakwe, nawe ufyari lwakwe lulolywa mmbakiduva vakwe.”

¹⁵ Mashika Nndumi Iruva ashaa na muro, na mitika akwe a fira erishiswaa ni uraato uniini; naambo nawataiye na unyafi lwa muro ushakaa, na wiikimbi lwakwe na fipalapala fya muro.

¹⁶ Mashika Nndumi Iruva avataiyaa woose vakee na mwiili na muro na upanga lwakwe; na yewo vawawaa ni Nndumi Iruva vawawaa veengyi.

¹⁷ Vandu valya vakekwilyisa na ikusangya efo bustaniny, numa ya yeto akee nnang'ani, veelyaa nyama ta nguve, na findo fikasha, na makokoi, mmbo vamandaa ando amwi, ni Nndumi Iruva aamba.

¹⁸ Na yeny shiishi mashora awo na makusaro awo; kyeeri kikeesha shisanyirye masanga moose na fishomu fyoose; nawo washaa nawo valollyaa usuri lwakwa.

¹⁹ Na yeny shivikaa wende nnang'ani yaawo, na yeny shirumi yewo valekirwa kwa vandu va masanga, Tarshishi, na Puli, na Ludi, vakeyoomwa ura kwa Tubali na Yavani, findilyi fikee kwaasha vandu valakundye iita mbony takwa, nta ilollya usuri lwakwa, nawo vashambaa usuri lwakwa kunu masangeny.

²⁰ Nawo vasheende vana vamaye vany woose uka masangeny koose, iva kiraso kwa Nndumi Iruva, na uwe ya frasi na mitika, na fitara, na uwe ya nshungu na mafisi, fika ifumbuny lyakwa yeele Yerusalemu, ni Nndumi Iruva aamba; shaasa vana va Israeli vakeyeende firaso fyawo mmba ya Nndumi Iruva na kiiya kisha.

²¹ Na veengyi vawo mmbo vawaa makohani na Valevi, ni Nndumi Iruva aamba.

²² Shaasa shitanaa ngina shiiya na uruka wiiya, filung'anye llung'anu kimaruma kya wiidimi lwakwa, ni indo ufyari lwafo na irina lyafo filung'annyaa.

²³ Na mmbo mwiiri mwiiya na Sabato fika sabato, vandu woose vashevaa na wiindi mbee yakwa, ni Nndumi Iruva aamba.

²⁴ Nawo wasomukaa na poo na ilola, minying'a ya vandu yewo valeshilema; mashika sava yaawo nnyifwaa-fo, nta muro wawo mmburumika-fo; nawo mmbo vavaa nsindara mbee ya vandu woose vakee na muu.