ISAYA 65 - BIBILLYA Mareiyo Meele a Iruva

Ngapo ya Iruva kwa yewo valyang'a

¹ Vandu valashikunndye mmbo vekevesa mbony takwa; mmbo shallollyo ni yewo valakeshiruuya, mmbo isanga lyilakevaangwa na irina lyakwa.

² Shiloleny, shiloleny, nsanyiny moose? Shammworooya maako akwa vandu vakwa valeshilema, vandu vakeyeenda shia ilasumani, velatyaa makusaro awo veni;

³ vandu usanguny lwakwa kyeeri kyoose, irasya nndeny na ikorya ubani maweny;

⁴ vakekaa rembo efo fifuny, na ilala ando kwawo kwa kirika; vakalya nyama ta nguve, na kivela kya findo fikasha vakaniiya fiiyeeny fyawo firavi;

⁵ vandu vashaamba, salala kumuni, kulashe kufii na yeny, mashika yeny mmbo shikee mweele ngota yewe, vandu yewo ni nsu mmbweny takwa, muro ukeyaaka nsanyiny moose.

⁶ Lola, irero elyi nnyireiye, mbee yakwa. Nshimalallyaa-fo, llyo shitaa, ee, yeny shitaa weesi lwawo, mbafuny tawo;

⁷ maravi any, na maravi a vandeye vany ando amwi, ni Nndumi Iruva aamba yeni mulaatya nsu uwe ya mafumbu, na isharara uwe ya fidooro, nsanyiny, kimaruma kya vayo mmbo shiveesya mbele mashora awo mbafuny tawo.

⁸ Nndumi Iruva aamba indi: “Shaasa mfinyu mwiiya wawonika uuka sabibuny, na nndu umwi kaamba kulaulyamare-fo mashika kwiifo mbora shiingyi nnang'ani ya vayo.” Ni indo shitanaa kimaruma kya varundi vakwa, naambo shilavarumate woose.

⁹ Na yeny mmbo sheende ngyeeri yuuka kwa Yakobo, na mwiwarya masaa a mafumbu akwa ooka Yuda, na yeto shilensauwa nawarye ding'u yakwa, na varundi vakwa mfo vakaa.

¹⁰ Na Sharoni mmbo kuvaa ando kwaiisa maronda a moonri na mburu, na imungo lya Akori ando kulalaa maronda a ng'umbe, kimaruma kya vandu vakwa valeshiruuya.

¹¹ Indi yeni mukeera Nndumi Iruva, na irekywa ifumbu lyakwa yeele, na yaala mesa kimaruma kya ionisa pule, na ishurya fiiya fya mfinyu ukeensasande;

¹² na yeny mshemureiya mundewaawa na upanga, na yeni moose mukulemaa naambo mushishwa mashika kyeeri shilevaanga mmulerika-fo; sharera, mmuleeta-fo; indi mmbo muletana makasha mbee yakwa, mukasauwa findo shilakunndye.

¹³ Kimmba ni indo Nndumi Iruva aamba indi, Lola varundi vakwa mmbo valyaa shoonga, indi yeni mmbo mulyiwa nshaa; lola varundi vakwa mmbo vanaa, indi yeni mmbo mutirwaa nnyura; lola varundi vakwa mmbo vafuraa, indi yeni mmbo mutirwaa nsony;

¹⁴ lola varundi vakwa mmbo vashimbaa na ifura lya nriminy, indi yeni muvyaa nriminy mmbo mukapaa kiiyo kimaruma kya mavavyo a mirima yaany.

¹⁵ Na yeni mmbo muraa irina lyany kidengo kwa vasauwe vakwa. Na Iruva, we Nndumi Iruva mmbo akuwaa, nawe mmbo avaanga varundi vakwe irina lyingyi.

¹⁶ Na mmbo kivaa yeto akuvikya mbora ya ulaniny, mmbo akuvikya mbora kwa Iruva wa dede; na yeto alya mboo ya ulaniny, mmbo alya mboo kwa Iruva wa dede. Mashika mavina a mbee anrekywa, na kimmba ansurumwa usanguny lwakwa.

Uumbi lwuyya

¹⁷ Mashika lola, yeny mmbo shikeeyuumba ngina shiiya na uruka wiiya, na mbony ta kasha tilakumbuwaa lyingi, nta ntishangaa nriminy-fo.

¹⁸ Indi fureny na ikapa nndoro kyeeri kyoose, kimaruma kya efyi shikee ifyuumba; mashika lola, mmbo shiashaalwa Yerusalemu uwe muri va usuri na vandu va vayo vawe ifura.

¹⁹ Na yeny shive na ifura na Yerusalemu, shifuryaa vandu vakwa, unyanga lwa kiiyo llushiitiwa nnang'ani ya vayo lyingyi-fo, nta unyanga lwa kyoorongye-fo.

²⁰ Nkukaa-fo mwana wa mikonu myaangu-fo, nta mmiku nalemaaye mikonu yakwe-fo; mashika mwana mmbo afwaa atiri myaaka iyana, indi nndu llyamari atiri myaaka iyana, mmbo adengwaa.

²¹ Nawo vatanaa mmba, na ikaa nnang'ani ya vayo; mmbo vawaaya sabibu, na valye ndunda ta vayo.

²² Mmbatanaa nakaye-fo nndu ungyi nnang'ani ya vayo-fo, mmbashevakyaa na ungyi alye-fo mashika shaasa mikonu ya nri ifye ni indo mikonu ya vandu vakwa ivaa, na vasauwe vakwa vafuryaa mashora a maako awo mikonu miingyi.

²³ Mmbakuvinisaa na mashora ruu-fo, nta mmbashiraa vana na mavina-fo; kimaruma wo ni ufyari lwa yewo vakevavikye mbora ni Nndumi Iruva, na vana vawo ando amwi nawo.

²⁴ Na mmbo kivaa sheelyi kulaore vantereva mmbo shirouwaa; na kulare vanrera, mmbo nshitaa.

²⁵ Kite kya ngoroshony na yoonri mmbo filyaa ando amwi, na miiso mmbo illyaa mare sha ng'umbe, na kiluulyi mmbo kivaa shoonga ya shoka. Mmbatanaa kikasha nta ilyamara efo ifumbuny lyakwa yeele lyoose-fo, ni Nndumi Iruva aamba.