ISAYA 64 - BIBILLYA Mareiyo Meele a Iruva

¹ Kyekee ng'waana kweparaa ngina, na yolooka naambo mafumbu nareremi mbee yafo;

² Shaasa muro ukekora ngorosho, na muro ukesambuta mura, naambo koore vakiduva vafo irina lyafo, masanga nareremi mbee yafo!

³ Kyeeri kuletana findo fya wende kulaore lweefiishi, kuleoloka, mafumbu akarerema mbee yafo.

⁴ Mashika uka kyeeri kya kasha vandu mmbalekwaraanya-fo, nta imanya na maarwi, nta iriso llyilelollya Iruva akuvakye yewe-fo, kutanaa mbony kimaruma kya yewo wakuvikye nsia.

⁵ Yewe kwawarya yeto akefurya usumanu na itana, vandu valya vakeevallya na shia tafo; lola, kwetirwa ni ngoo, neese lukatana ulyamari; lwankaa findony efyo fyeeri fyaasha, ndesa neese lukirwaa?

⁶ Mashika yese loose lwammba sha nndu afwani kirinda, na mitannye yeeru myoose ya usumanu, ikava sha soori tirinndye, yese loose mmbo lukeyuuma sha ire, na uravi lweru mmbo lukee iluvivita sha uraato.

⁷ Nta nkwiifo akevaanga irina lyafo-fo, akekuvangisa ikutira; kimmba kwallusuruma kisangu kyafo neewe kwalura kyuuka na maravi eru.

⁸ Indi ulaalu, yee Nndumi Iruva, yewe mmbo kukee Nde weeru; yese loose ni uteri neewe kukee muumbi weeru, yese loose mmbo lukee mashora a maako afo.

⁹ Woi Nndumi Iruva kularooywa nngoo shiingyi, nta kulakummbwe ulyamari kyeeri kyoose; lola, lwakutereva, yese loose mmbo lukee vandu vafo.

¹⁰ Miri yafo meele yammba kasa koomu, Sioni, kwammba kasa, Yerusalemu yanrumaka.

¹¹ Mmba yeeru sheele shisha, kundo vekwarafumyaa vande veru, kwa nrumatwa mmuro; findo fyeru fyoose fyesennyi miso fyanlyamarika.

¹² Mmbo kukwimaa kulalole mbony eti, yewe Nndumi Iruva? Mmbo kumalallyaa na ilulyilyisa deny?