ISAYA 63 - BIBILLYA Mareiyo Meele a Iruva

Nndumi Iruva awinga va masanga

¹ Mmbi yeu akeeyuuka Edomu, atiri masara afwani samu ooka Bosra? Yeu atiri soori ta Kimangyi akeyeenda ekung'anisa muni? Yeu nnyeny shikerera kisumani, nkaari wa ikira.

² Nkyiki soori tafo tidodorye, na masara afo sha a nndu avavaraa sabibu?

³ “Mmbo shilevarya shasirya yeny shimuni; na nta nkwiifo ekee neny-fo, mmbo shilevavara unyaasi lwakwa, shawarya na unyafi lwakwa, Na soori takwa tikafwana marony a samu tawo, na masara akwa akarinda moose.

⁴ Mashika nkonu wa itaiya kiduva wekee nriminy mmbwakwa, na mwaaka wawo shilevakira nato wansha kufii.

⁵ Shalola, nta nkwiifo wa yeekya-fo; shasongololo mashika nkwiifo mwiiyeekya-fo, Naasa woko lwakwa weni lukasheengye ukiro, unyafi lwakwa llo luleshiidimisya.

⁶ Shawavavara makabila a vandu na unyafi lwakwa, shavanangyisa na unyafi lwakwa, neeny sheeritya samu yaawo sumbai.”

Usha lwa Nndumi Iruva kwa Waisraeli

⁷ Mmbo nshaambaa usha lwa Nndumi Iruva, usuri lwa Nndumi Iruva kya fyoose alelutannya Nndumi Iruva; na usha lwakwe wiingyi lwa mmba ya Israeli, alevaniinga na isarya lyakwe, na usha lwakwe wiingyi.

⁸ Mashika aleamba, “Nkya dede yeva mmbo vandu vakwa, vandu valatiri kiila,” kava mwikira waawo.

⁹ Nnang'ani ya ukiva lwawo woose we kalyiswa, ukiva na nsu wa kisangu kyakwe kavakira, kyuuka we muni, kavarosa, kavaipoo mikonu myoose ilemmiira.

¹⁰ Indi vakallema, vakanlyilyisa nnu mumuyo wakwe mweele; kyuuka na indo kaalashika, kava nkiduva, kakabana nawo.

¹¹ Llyo alekummbwa mikonu ilya ya kasha, kyeeri kya Mose, na vandu vakwe kaamba, “Nkwi akai yeto alemusaamisa uka yeeveny ando amwi na veesi va ironda lyakwe? Nkwi akai yeto alevika Mumuyo nnang'ani yaawo?

¹² Yeto alewatetera na woko lwakwe lwa usuri, na woko usha lwa Mose? Yeto alerauwa mura mbee yaawo, naambo nawe na irina lya llung'anu?

¹³ Alevatetera filoriny fya mura, sha frasi efo kasa, waleuteu nsindara.

¹⁴ Sha ng'umbe tisholokaa imungony, mumuyo wa Nndumi Iruva kavavirya muu, ni indo aletetera vandu vafo, naambo irina lyakwe lyiwe na usuri.”

Kiterewo kya ilyillya na weekyi

¹⁵ Lola uka iruveeu, kulollye uka marembo a usuri lwafo na usha lwafo; kififi kyafo nkwi kyikai, na wiidimi lwafo? Nrolu wa nrima wafo na isarya lyafo fyansurumwa kwakwa.

¹⁶ Mashika nnyewe Ndeye weeru naakwa ni elyi Abrahamu nalalwiishi, nta Israeli nalakee ilukureekya; Yewe Nndumi Iruva, nnyewe Nde weeru, “Mwiikira weeru” uka llunganu llyo irina lyafo.

¹⁷ Yee, Nndumi Iruva, nkyiki kuluretya shia tafo, kwaallwa mirima yeeru myuumu nta lulakwiryee? Wuya kimaruma kya varundi vafo, ngyufyari ta ufyari lwafo.

¹⁸ Vandu vafo veele mmbo valetira kyeeri kyaangu, na vakiduva weru vakavavara ando afo kweele.

¹⁹ Lwammba sha vandu kulavashillye deny; sha vandu valekevaangwa na irina lyafo.