ISAYA 62 - BIBILLYA Mareiyo Meele a Iruva

¹ Kimaruma kya Sioni nshimalallyaa-fo, na kimaruma kya Yerusalemu nshishiimuyaa-fo, fika usumanu lwakwe lulollywaa paa, na ukiro lwakwe sha taa ikeyaaka.

² Na masanga valollyaa usumanu lwafo, na vamangyi woose walollyaa usuri lwafo, neewe kuvaangwa irina iiya, lyishaambawaa ni kana kya Nndumi Iruva.

³ Neewe kuvaa ureto usha efo wokony lwa Nndumi Iruva, na kitambaa kya umangyi efo wokony lwa Nndumi Iruva wafo.

⁴ Nkukivaangwaa lyingyi “Akeenre-fo” nta uruka lwafo ivaangwaa lyingyi “Ukiva-fo;” Indi mmbo kuvaangwaa “Iruva akee neeny” na uruka lwafo “ni uvikye mbora” Mashika Nndumi Iruva akee neewe, na uruka lwafo mmbo lusheva mbora.

⁵ Mashika shaasa tindi ya kyuumi akeipoo tindi ya kyika, ni indo vana vafo vakoraa yewe; na shaasa nndumi wa walyi akeefura na mwalyi mwaalyikwa, ni indo Iruva wafo akufuryaa yewe.

⁶ Mmbo shammbika varingyi uwe ya masimamba afo, Yee, Yerusalemu; mmbamalallyaa kio nta nsanyiny-fo;

⁷ Yeni vekumbura Nndumi Iruva, mulamalallye-fo, nta mulare namalallye-fo fika kyeeri asaleesa Yerusalemu nisha, na iivika uwe na usuri urukeny.

⁸ Nndumi Iruva anlya mboo na woko lwakwe usha, na kwa woko lwakwe lwa finya, nkya dede nshiniingaa vakiduva vafo nganu tafo tiwe shoonga yaawo-fo; nta veny mmbanaa mfinyu wafo, yeto kulerundya mashora-fo.

⁹ Indi yewo valeelula, mmbo valyaa, na iindya Nndumi Iruva; na yewo valeyaya mmbo vanaa, efo mmba ando akwa kweele.

¹⁰ Ireny, ireny, efo myaangony; songosieny shia ta vandu, Songosieny, songosieny shia shilangari uteny-fo mawe, saamiseny bendera kimaruma kya masanga a vandu.

¹¹ Lola, Nndumi Iruva ankapa weele fika kishingony kya ulana, vieny vandu va Sioni, “lola ukiro lwafo lukeesha; lola kindo kya pya kikee ando amwi na yewe, na weesi lwa wayo lukee mbee yafo.”

¹² “Wo vavangwaa vandu veele, Yerusalemu uvaangwa Muri ukundyo ni Iruva; Na yewe mmbo kuvaangwaa; Muri kulare Iruva aleura.”