ISAYA 61 - BIBILLYA Mareiyo Meele a Iruva

Mbony shaantu ta ukiro lwa Yerusalemu

¹ Mumuyo wa Iruva, we Nndumi Iruva ni uwe yakwa, mashika Nndumi Iruva aleshaamba mafura, shindeongoya yewo vaale nrumi ya nsia; kashiruma shendevavara yewo vammuuta-pa, ivia mashinga mmbo allekwa ulaalu, na yewo vafinge mbony ta iporomuwa lyawo.

² Yaamba mwaaka wa Nndumi Iruva ukemwiirikye, na nkonu wa itaiya kiduva wa Iruva weeru; iviiryaa muu woose vakeeiya.

³ ivavasya yewo wakeiya va Sioni, vaniingwa ureto lwa fivaro ando a ifu, mafura a ifura ando a ikapa kiiyo, isarya lya utori ando a irovywa nriminy; vedimi ivaangwa miri ya usumanu ilevakywa ni Nndumi Iruva, naambo naarafumwa.

⁴ Nawo vatanaa ando kwa kasha, kulelyamarwa, vasaleese ando kwekee ukiva kasha, wasongosye miri ilelyamarwa, ando kulerewa ni marika na marika.

⁵ Na veny vasalalaa na iisa maronda any, na vandu va masanga engyi vave varemi vany, na veelola misabibu yaany.

⁶ Indi, yeni mmbo muvaangwa makohani va Iruva weeru, mmbo mulyaa umasi lwa masanga, na iitikisa usuri lwawo.

⁷ Ando a sony tany mmbo muwonisaa kavii, na ando a usutu vafuryaa ekyo kikwaani nawo, naasany efo urukeny kwawo mmbo vashillyaa kavii, ifura lyawo ni lya llung'anu.

⁸ Mashika yeny Nndumi Iruva, mmbo shikunndye uleti, mmbo shisuye unyinyi na ukasha; na yeny mmbo shivataa kya mashora awo kya dede, mmbo shivikaa nawo kyaasa kya llung'anu.

⁹ Na ufyari lwawo mmbo lumanyikaa masangeny na ngyeeri tawo nnang'ani a vandu; yewo woose vavalollyaa mmbo vavikaa ukureekyi sheelyi wo ni ufyari luvikywa mbora ni Nndumi Iruva.

¹⁰ Mmbo shifuraa nnu na Nndumi Iruva, nrima wakwa ukesaa kya Iruva wakwa; mashika masara a ukiro, ansikya na isarya lya usumanu sha nndumi wa walyi akekushopa na usha lwa masara a walyi, na mwalyi mwaalyikwa akekushopa na findo fya saabu.

¹¹ Mashika shaasa uruka lukeemya myooro ya vayo, na shaasa bustani yammya findo filevakywa nnang'ani ya vayo ni indo Nndumi Iruva amiisa usumanu na utore mbee ya masanga moose.