ISAYA 60 - BIBILLYA Mareiyo Meele a Iruva

Itumbe lya Yerusalemu lyishaa

¹ Kwiipoo, yewe Sioni kwavaa sa; mashika sa yafo yansha, na usuri lwa Nndumi Iruva lukeekuvaiya.

² Mashika, lola ireema mmbo lyisikyaa ulana, na ireema iniini mmbo lyisikyaa masanga a vandu; Indi Nndumi Iruva akusheyaa yewe, na usuri lwakwe mmbo lulollywo kwafo.

³ Na masanga asheyaa sa yafo, na vamangyi vashe seny ya isha lyafo.

⁴ Inwa miso afo kwalola taari toose, woose vakekusanyirya vakusheye yewe, vana vafo vashaa vooka kwaasha, na vana vafo va kyika vekurikywa maakony.

⁵ Llyo kulollya na imikywa nsa, na nrima wafo mmbo ureremaa na iting'wa; mashika yeeve mmbo shingyi tishindutwaa tikulatye, na usimba lwa uruka mmbo lukusheyaa.

⁶ Ngamula shiingyi tikusengyetyaa, ngamula shikoo ta Midian na Efa; toose tishaa tuuka Sheba, vashendee saabu na ufumba; na yaamba usha lwa Nndumi Iruva.

⁷ Maronda moose a Kedari akusanyiryaa kwafo, suva toose ta Nebayoti tikufurukannyaa; Wasamaa uwe meseny akwa na yeny shishopaa mmba ya usuri lwakwa.

⁸ Mmbaki yeva wakerumbuka sha ifishi, na mbeta tikeyeenda fifuriny fya wayo?

⁹ Ni dede maruva ashivereyaa, na Merikebu ta Tarshishi mbele, naambo vana weendwa wauka kwaasha, na fesa andu amwi na saabu tawo. Kimaruma kya irina lya Nndumi Iruva, we Iruva wafo, kimaruma kya mweele wa Israeli; kimmba ankung'anisa yewe.

¹⁰ Na veny vatanaa masimamba afo, na vamangyi vawo vakufurukannyi; mashika kyuuka na unyafi lwakwa shilekukapa; Indi kyuuka na ulyilyi lwakwa shakulyillya.

¹¹ Myaango ya mmba yafo mmbo iruwaa kyeeri kyoose, nnyiraywaa nsanyiny nta kio-fo, naambo vandu vakweengye usimba lwa masanga, veteterwaa mmbamangyi vawo.

¹² Mashika wo isanga na umangyi valakunndye ikufurukannya mmbo varumakaa; Yee, masanga yoo mmbo arumatwaa deny.

¹³ Usuri lwa Lebanoni mmbo lukusheyaa yewe, Mberoshi na mtisari nteshuri ando amwi, naambo washope ando akwa kweele, na yeny shiitikise ando a marende akwa.

¹⁴ Na vana va vandu valya valekulyisa ukiva, mmbo vashaa kwafo na ikufiiryandi; Na woose valekwiila vakunyiisa fika si ya ngyayo ta marende afo; Nawo vakuvaanga, “Muri wa Nndumi Iruva, Sioni, Mweele umwi wa Israeli.”

¹⁵ Na kimmba kulerewa na isuwa, kutani kuleefo nndu aira mmba yafo, mmbo shikwaallwa kuwe usuri lwa llung'anu, ifura lya marika na marika.

¹⁶ Kushoonga malela a masanga, koonge mavee a vamangyi, neewe kumanyaa nnyeny Nndumi Iruva, ni mwikira wafo, na mwauwa wafo atiri uniini lwa Yakobo.

¹⁷ Ando a arera nsheende saabu, na a minya nsheende fesa, na ando a nri nsheende arera, na ando a mawe, minya; Lyingyi nshaallwa vesalallya vafo vawe na urilallyi, na yewo vakee ikuvesa fesa vawe na usumanu.

¹⁸ Ngusana ishiitiwa lyingyi urukeny lwafo-fo, ukiva na urumato nfiikaa minyanuny yafo-fo; Indi masimamba ta mmba yafo mmbo avangwaa “Ukiro” na myaango yafo, “Tikisi”

¹⁹ Kyeende-sa nkikivaa sa yafo nsanyiny-fo; nta mwiiri mmbukuniinga sa ya vayo-fo; Indi Nndumi Iruva mmbo avaa sa yafo llung'anu, na Iruva wafo nave usuri lwafo.

²⁰ Kyeende-sa kyafo nkisholooka lyingyi-fo, nta mwiiri wafo mmbukurauwa-fo, mashika Nndumi Iruva mmbo avaa sa yafo llung'anu na mikonu yafo ya kiiyo ishemandaa.

²¹ Vandu vafo nawo mmbo vavaa va usumanu woose, nawo mmbo vatiraa uruka llung'anu, Iramba shilelyivaakya yeny shimuni, lyikee ishora lya maako akwa naambo yeny shaarafumwa.

²² Yeto akee n-du ya woose, mmbo ashevaa ufyari; Neeto akee n-du kailannya vengyi; mmbo ashevaa isanga lying'ani. Yekyo mmbo shikyiinutya nviny kyeeri kyikamfika Yeny mmbwe Nndumi Iruva.