ISAYA 6 - BIBILLYA Mareiyo Meele a Iruva

Iruva avaanga Isaya ave nkisuku

¹ Mwaka ulya mangyi Usia efwa, mmbo shelollya Nndumi Iruva ekaaye kitima kyakwe kya ushilyi kya yiinndywa kyikee uwe, ikedu lya soori yakwe ikeeshwa yefo mmba ya mwiindye shoose.

² Uwe ya vayo kweiyo vasu vatiri maaru arindaru, maaru avii eesikya kisangu, avii eesikya marende na avii eerumbuka.

³ Vakavaangana wo umwi na urooye iindi, “Mweele, mweele ni Nndumi Iruva wa matorito! Ulana loose mmbo lwiishwe itumbe lyakwe.”

⁴ Unyanga lwa valya veekevaanga lukareremisa nsuka wa fyeeko fya mmba ya iterevya na nsu ukaishura efo mmba.

⁵ Neeny shaamba, “Woshiny lwakwa! Ulaalu shamamika mashika yeny mmbo shikee nndu llyamari na ntefusu, shikee nnang'ani ya vandu vatefusu mashika miso akwa allollya ungyi; Nndumi Iruva wa matorito.”

⁶ Naasa umwi wa vasu valya karumbuka eerye ikaa lya muro na mwaaro wokony lwakwe oota alya kitareny kyeerasya.

⁷ Nalyo kashipaana nalyo kana kyakwa, kaamba, “Ikaa ilyi lyakupaana kana kyafo mmbo kwansarywa na ulyamari lwammisya.”

⁸ Naasa sheeta unyanga lwa Nndumi Iruva ashaamba, “Sharuma-vi? Mmbovi asheenda ave nrumi ando eru?” Neeny shaamba, “Nnyaa nkai! Shiruma yeny.”

⁹ Nawe kashiruma kashivia, “Endevia vandu yeva, mmbo muvaa vearannya nnu, iindi-lyo mmushitumuso-fo. Muve veelola nnu, indi-lyo mmulollya-fo.”

¹⁰ Naasa kashivia, “Fuluta makusaro a vandu yeva, vave mbimbi na miso awo alashelollya kwa miso awo, veete kwa maarwi awo vamanyi kwa urango lwawo neeshiwiiya vakirwa.”

¹¹ Neeny shammbesa, “Nndumi, mmbo kyivaa indo kufike indii?” Nawe kashirouwa kaamba, “Kutani miri yasaa-fo marama, kuve ukyiva kuleefo veni mmba tilatiri vandu; na uruka lwamma ilyamarwa deny.

¹² Neeny shishesamirya vandu kwaasha na uruka loose shilwaallwe sama lulatiri vandu.

¹³ Naakwa vasaa-u vandu kyenga kyimwi kya ikumi mmbo vashemamittwaa, yewo mmbo vashevaa kyimwi sha nri wammanywa lyikasaa-u isinde. Isinde yelyo ni mbeu sheele ya muu mwiiya ya vandu va Iruva.”