ISAYA 58 - BIBILLYA Mareiyo Meele a Iruva

Ikootoya lya dede

¹ “Kapa kyoorongye, kulare, rosa unyanga sha mbembe; kuvie vandu ngyulyamari tawo, na mmba ya Yakobo maravi awo”.

² Indi vakeshiruuya wo nkonu; vakundye imanya shia takwa, sha masanga alya aletana usumanu, valare ivavaso lya Iruva waawo, nng'u mavavaso a dede kwakwa, wakafura ikaa kufii na Iruva.

³ Vakaamba, Nkyikyi elyi lukotooya indi mulalollye? Nkyiki lwalyisa mirima yeeru ukiva, indi kulakunde ilola? Manyiny, nkonu wa ikotooya lyany mmbo mukeiruuya ifura lyany muveni na irovya yewo woose wakerunda mashora efo kwany.

⁴ Yeni mmbo mukekootoya naambo muvakyani na ikabana yeni mweni na veni, na ikapa ngunde ya uravi. Mmukekotooya nkonu yeu wa inu naambo mwaaranyi unynga luuke uwe-fo.

⁵ Ndesa ikotooya indo nkyo shilemusauya yeny? Ndesa nto nkonu wa nndu ikunyiisa we muni? Ni ilemya nrwe si sha ire na yaala soori ta makunnya a ilaaya na ifu kwasi yakwe? Ndesa luvaanga ekyi ni ikotooya, na iirikywa ni Nndumi Iruva?

⁶ Ndesa ikotooya shilelyisauwa lya ngata yei; irrwa fifungo fya ulyamari, yelelesa fyoove fya ulyamari, irrwa vafungwa valesisywa, na yuuta-fo ushinga lwa wo ngata.

⁷ Ndesa nshi yaavya vatirwa nshaa shoonga tafo, na ivaanga vakiva efo kyeny kwafo. Kwalollya nndu akee mbereto, kummbike soori, nta kulasurumi kisangu kwa nndu, mukee samu imwi neewe-fo.

⁸ Llyo sa yafo, ivaa sha mwi wa ngama, na iva na finya uviny, na usumanu lwafo lukwiirye mbee; usuri lwa Nndumi Iruva lukulatye numa lukuringe.

⁹ Llyo kuvaanga; na Nndumi Iruva nakwiirikye, mmbo kufiiraa nawe naambe: “Shikee yaa!” Kwakooya kwauta-fo ukasha; lulakeefo nnang'ani yafo nta yoorwa nni wafo nta irera maravi,

¹⁰ na kwakooya kwarambuya nndu atirwa nshaa nrima wafo, na iurisa nrima utiri ukiva, llyo sa yafo ivaa ireeminy, na sa ya miso afo ava sha sa ya ngama.

¹¹ Nawe Nndumi Iruva mmbo akuteteraa kyeeri kyoose, mmbo avuutisa nrima wafo ando kulatiri mura na iniinga maffwa afo finya; mmbo kuvaa sha nnda ukee nnise, na usoka lwa mura kulaore mura wa vayo ushangwaa.

¹² Na vandu vafo mmbo vatanaa mmba ando kuumu, mmbo kushipoo misuka a marika meengyi; neewe kuwaangwa: Alesongosya ando kuwundukye, na Alesongosya ando kuvaa ikaa.

Kindo kya pya kwa valya vainndya Sabato

¹³ “Kwakooya kushindutaa urende lwafo lulaimmbwe Sabato, kure kulatana findo fya uravi nkonu wakwa mweele, kuvaange Sabato yakwa nkonu wa ifura na nkonu wa Nndumi Iruva utiri wiindi, usharafumwaa, ira kularunda findo fyafo kumuni yefyo kukundye, nta irera marero afo kumuni;

¹⁴ llyo kufuraa na Nndumi Iruva; na yeny shikusamise uruka lukee uwe; shikuniinge ding'u ya Yakobo nde wafo; mashika ni kana kya Nndumi Iruva kyaamba indo.”