ISAYA 56 - BIBILLYA Mareiyo Meele a Iruva

Vandu va masanga moose ni va Iruva

¹ Nndumi Iruva aamba, “Tireny ivavaso, mutani usumanu, mashika ukiro lwakwa lukee kufii isha, na usumanu lwakwa lusheorwa paa.

² Ngoma yeto aketana indo, na nndu yeto atira nnu; ainndya Sabato takwa nalafishe, ashiimaa woko lwakwe lulatane uravi loose.”

³ Nta muny, akelatya Nndumi Iruva nalaambe indi, ni dede Nndumi Iruva anshirauwa na vandu vakwe, nta nkapendafu nalaambe, Yeny mmbo shikee nri muumu!

⁴ Mashika ni indi Nndumi Iruva avia vakape ndafu yewo vainndya Sabato takwa, na isauwa mbony shisha na itira nnu kyaasa kyakwa,

⁵ mmbo shivaniingaa kyeny kwakwa, na nnang'ani ya fiambaso fya mmba yakwa, ikummbwa na irina lyikee isha ngota iva na vana va kyika na va kyuumi; mmbo shivaniinga irina lyikaa llung'ani, mmbo lyilasherwaa sakyeny.

⁶ Na veny valelatya Nndumi Iruva naambo vanndundye, na ikunda irina lya Nndumi Iruva, iva varundi wakwe, wo nndu akeindya Sabato nalairete na itira nnu kyaasa kyakwa,

⁷ Nawo mmbo shiveende fika ifumbuny lyakwa yeele, na ivaniinga ifura efo mmba yakwa ya iterevya, firaso fyawo fyekora na muro na fyeersya mmbo fishiirikywaa efo meseny akwa; mashika mmba yakwa ivaangwa mmba ya iterevya mmasanga moose.

⁸ Iruva we Nndumi Iruva asanyiryaa yewo waleantwa kunu Israeli ni indo aamba, Ando amwi na indo shisanyiryaa na vengyi mmwasi ya yewo wakwe valesanyirywa.

Vasongoru va Israeli vautyo uvingo

⁹ Yeni mafisi moose a kasa, oshony, Lyeny yeni mafisi a ngoroshony.

¹⁰ Varingyi woose ni vafu miso, woose-da mmbatiri urango-fo, mfite filashoraa mmbashidimaa yoora-fo, woryaa moorya, vakalala vakakunda rwe.

¹¹ Ee, fite efyo nkififi-deny, mmbauraa-ufo neewo ni weesi valashidimaa imanya irero, woose vammalashika vakawa taari ingyi, vakalatya shia tawo veni, wo umwi na mbusha yakwe, uka taari toose.

¹² Mmbo vakeyaamba: Osho, nshendee mfinyu; luni lunangwa-deny, na ndesi kiwe sha inu, uwe nkonu wa ifura mmwasi-deny.