ISAYA 55 - BIBILLYA Mareiyo Meele a Iruva

Ulyilyi lwa Iruva

¹ “Naasany, wo nndu atirwa nnyura nashe mureny na yeto alatiri fesa, oshony muure mulye, Ee, oshony muure mfinyu na malela, kulaore kwiifo fesa nta wuuru.

² Nkimaruma-kyi iniingya fesa kindo kilakee shoonga? Na umasi lwany na kyindo kilaurisaa? Shaarannyiny nisha, mulye kyindo kisha, mirima yaany ifurye findo fivandye.

³ Laluteny maarwi any, na ishisheya; aranyiny na mirima yaany ikye, na yeny shivikaa kyaasa kilung;ani na yeni, ee isarya lya Davidi lyiwangye.

⁴ Loleny shammuvika nawe nkureekyi masangeny a vandu; nawe nsongoru na nniini wa fira masangeny a vandu.

⁵ Lola, kuvaanga isanga kulalyiishi, na isanga lyikwiishi yewe lyikuvingyaa yewe, kimaruma kya Nndumi Iruva wafo, we Iruva na kimaruma kya mweele wa Israeli, mashika ankwitikisa.”

⁶ Ruuyeny Nndumi Iruva mashika asheonikaa, mmbaangeny mashika akee kufii

⁷ Nndu nkasha nare shia yakwe, Na nndu nalakee wa usumanu nare makusaro akwe; nawuyye Nndumi Iruva, nawe allyillye, nashe kwa Iruva weeru, nawe ansaryaa-deny.

⁸ Mashika makusaro akwa nshi makusaro any-fo, nta shia tany nshi shia takwa-fo, ni Nndumi Iruva aamba.

⁹ Mashika shaasa ngina ikee uwe-deny ngota ulana ni indo-da shia takwa tikee uwe-deny, na makusaro akwa ngota makusaro any.

¹⁰ Mashika shaasa mmbwa ikeoloka, na laura yuuka iruve-u, nta kulaore ikewuya-fo; indi ikanisa sumbai na imiisa findo, ikaniinga nndu mbeu navaaye na nndu nalye, shoonga

¹¹ ni indo irero lyakwa lyivaa, lyooka kaniny kyakwa; nlyiwuyaa ruu-fo, indi lyishiinutyaa nsia wakwa, nalyo mmbo lyivesywaa findony fyoose filya shilelyiruma.

¹² Mashika musomukaa mwifuraa; mmteterwa na urilalyi Mbee yaany mmbo mushiimbywaa fiimbo, mmafumbu na fidooro na miri myoose ya mamungony ishoona.

¹³ Ando a miinga kumyaa msonobari, Ando a mbikiri kuwe-u mhadesi. Mbony yei mmbo ivaa indo, irina lya Nndumi Iruva lyirumishwa, mmbo luvaa wende lwa llung'anu lulavaa ira.