ISAYA 54 - BIBILLYA Mareiyo Meele a Iruva

Ikunda lya Nndumi Iruva kwa Israeli

¹ Imba yewe kukee kyuumba, yewe kulaore kulemmiira; kaba nndoro na iimba, kaba kyoorongye, yewe kulemmbona mavina; mashika vana va yeto alerewa ni veengyi ngota yeto alenrawa, ni indo Nndumi Iruva aamba,

² ng'anisa ando a yeema lyafo ala mikeka yoo ando kukai, kulavaimi engera waasha lwa ngove tafo, omuya firi fya mmba yafo.

³ Mashika mmbo kukwaana taari ya woko umuso na taari ya woko usha, na ufyari lwafo mmbo lushilyaa masanga; yashaallwa miri yekee ukiva ive ando kukawaa mmbandu.

⁴ Kulairyee, mashika nkulyaa ukiva nta isawaa-fo; mashika nkusukaa-fo; mashika kurekywaa sony ta ukoo lwafo, na fyaararo fya nka wa ding'u, nkufikummbwaa lyingyi-fo.

⁵ Mashika muumbi wafo mmbwe mmi wafo, Nndumi Iruva wa matorito nlyo irina lyakwe; na mweele wa Israeli mmbwe mwiikira wafo: We mmbo avaangwaa Iruva wa ulana loose.

⁶ Mashika Nndumi Iruva alekuvaanga sha nka alerewa na iting'wa nriminy, sha nka kyeeri kya ukoo, erewa, ni indo Nndumi Iruva wafo aamba.

⁷ Kakura kwa kyeeri kifiinyi; indi kwi isarya iingyi akusanyiryaa.

⁸ Kwi unyaasi uniini shilekusuruma kisangu na kyaangu indi kyuuka na ulyilyi lwa ikunda lwa llung'anu; ni indo Nndumi Iruva mwiikira wafo aamba.

⁹ Mashika mbony yei mmbo yava sha mura ulya wa Noe kwakwa; mashika shaasa shilelya mboo shaamba mura wa Noe, mmbushiraa uwe ya ulana lyingyi-fo, lyingyi mmbo shalya mboo sheelyi nshirooywa ngoo kimaruma kyafo-fo, nta nshikukangayaa-fo.

¹⁰ Mashika mafumbu ashukaa-u na fidooro fishuutwa-u; indi usha lwakwa llushutwaa kwafo-fo, nta kyaasa kyakwa kya urilalyi nkishutwaa-u-fo; ni indo Iruva Nndumi yeto akulyillye yewe aamba.

Yerusalemu ishaa

¹¹ Yewe kukenlyilyise, kwarumbutwa ni uraato uniini, kulavaa iviirya muu, lola mmbo shivikaa mawe afo fwana shisha, shivike misuka yafo na findo fya uuru.

¹² Na yeny mmbo nshallwaa minara yafo ive ya findo fidodorye, na myaango yafo ya alumasi na minyanu yafo ya mawe ive misha.

¹³ Na vana vafo woose valoshwaa ni Nndumi Iruva; na ufoo lwa vana vafo mmbo luvaa wiingyi.

¹⁴ Mmbo kuvaa wa usumanu, isisyo mmbo lyivaa kwaasha neewe, mashika nkushiryaa-fo, nta nkumatukaa-fo, mashika nkwiifo kindo kikweeresee kikufikyaa-fo.

¹⁵ Lola llya vakusanyiiryaa, lyo nshi kya mbony yakwa-fo. Eto moose akusanyiryaa kimaruma kyafo mmbo awaa kyuuka neewe.

¹⁶ Lola, shileumba mfuru akeyaata muro wa makaa, kauta fisha fya mashora akwe; na yeny mmbo shileumba nndu afilyamare.

¹⁷ Wo kisha kishipowaa kimaruma kyafo mmbo kilemwaa, na wo ulimi lureraa kyafo efo mwaanduny mmbo lushuttwaa uvingo. Yei nnyo ding'u ya varundi va Nndumi Iruva, na usumanu lwawo lwauka kwakwa yeny, ni Nndumi Iruva aamba.