ISAYA 53 - BIBILLYA Mareiyo Meele a Iruva

¹ A mbony eto luleita ni vi aleidima itiirikya-ro? Na woko lwa Nndumi Iruva lukasukukya wi?

² Mmbo alemia efo kisanguny kyakwe akee sha ndaru, sha nrarii uparaa maa yauka uteriny uumu, Nnetiri nta waantu nta utore vandu vallole-fo, nta usha lwakwe lulalusenyi yese.

³ Mmbo ekee mwinyale kareva mmbandu, kava nndu wa fyuure aishivie ivavywa, vandu wakatana vansuruma fisangu, kava mwipirwa, nta lulaambe akee nndu.

⁴ Indi ndwari teru mmbwe aletiboo, na ngatara teru mmbwe aletikurika. Na yese mmbo luleamba kulakooye ni nndu moorote, akee nkape ni Iruva, kalyiswa indo ukiva.

⁵ Nawe mmbo alevikwa fyaasha mashika a ulyamari lweru, mmbo aledoshwa kariika kishong'u mashika a makasha eru. Na kyaniinga kaorowa indo naambo yese luoni muu, na efo fyaasheny fyakwe yese lukauta-fo ukiro.

⁶ Mmbo lweraraa sha mburu tirekye, wo nndu kapara na shia yakwe. Indi we Nndumi Iruva kamwekerya uvingo lweru.

⁷ Mmbo alesisyo kavefwaa, nalatarambwe nta kana, kava sha ngurana yaipowa indeshishwa, sha yoonri lyamalallya sau likyee isemwa mafwaa, nta nalatarambwe kana.

⁸ Mmbo aleutwa-fo ashiinyalwa na yuuttwa uvingo, Ni elyi efo nnang'ani ya vandu va fyeeri fyakwe kulaifo nndu alekusara kyakwe na elyi alerumatwa kautwa urukeny lwa vandu vakee na muu? Nawe ni efyo vandu vakwe valyamarye mfyo alekapyo-te.

⁹ Vakanniinga kifu kyakwe ando amwi na vandu varavi, na kundo kwakwe kwerikwa kasandwa na vetana meesi, Nawe nta nnetannyi kindo kya kiila-fo, nta kindo kya ntambo kilakee kaniny kyakwe.

¹⁰ Kya-indi mmbo kivesenyi Nndumi Iruva inkapa indo kya imbavisa. Kwakooya anrambikya-u muu wakwe uwe kiraso kyerasya, Iruva kya ulyamari lwa vandu llyo asheonisaa ufyari na muu mwaasha na yekyo Nndumi Iruva arumbuye kishiinutyoo ni maako akwe.

¹¹ Na elyi aleva mwivina na indo; asheonaa iviiri nawure shapu, nawe akee kishinga kyakwa kya usumanu atiri urango usha, mmbwe asherwaa vandu veengyi usumanuny, nawe mmbwe akurikye ukasha lwawo.

¹² Nkyo nshemwavyaa waavi lwakwwe ando amwi na vasuri, navesasanga na vaafinya ashaavaa findo fyaendwa fyuuka fireny, mashika alerambikya muu wakwe kya ifwa, kakunda yekenywa efo vanduny veetana makasha, kaipoo ulyamari lwa mamwiingyi na valya vetana findo fyeesi kavaterevya efo kwa Iruva.