ISAYA 48 - BIBILLYA Mareiyo Meele a Iruva

Iruva ni Nndumi Iruva wa meeri moose

¹ Aranyiny mbony eti eni vandu va mmba ya Yakobo, yeni muvangwaa kwa irina lya Israeli, yeni muukye efo ufariny lwa Yuda, mulyee mboo kya irina lya Nndumi Iruva na isenda irina lya Iruva wa Israeli, lyo nshi dede nta nkisumani-fo.

² Mashika mmukuvangaa ni vandu va dingu ya muri mweele, mwikwamiraa na Iruva wa Israeli, Nndumi Iruva muni matorito llyo irina lyakwe.

³ Yeny shilevambisa mbony ta kasha ukya mapookyony, eeda, tileuka kaniny kyakwa, shishetioraa paa, shetana na pyany, fikara.

⁴ Mashika shemanya yewe ni mbafu na singo yafo ni singo ya minya na kisangu kyafo ni minya shuumu.

⁵ Naasa shankoora ukya kasha, kulaore fyentanyika shekoora, kulakooye yaamba ni mafwanu akwa atana indo, mafwanu a ipashwa na yoo a yeetwa na muro nng'u aamba indo.

⁶ Kwamma iitya yaa, lola efyo fyoose; a ndesa eni mushevambisaase mbony eti? Shankoora mbony shiiya ukya kyeeri ekyi, eeda, mbony tisurumye kulaore kwetiishi.

⁷ Mmbo tileutika ulaalu nta nshi ukya kasha-fo na nta kulaore ni ukya inu nkweleitya mbony tavayo-fo, naambo kulasheamba lola sheetishi.

⁸ A nkuleita, eeda nkulemanya, ee ukya kasha maarwi afo nyaleruuka; mashika sheeshi yewe mmbo kwekee irunda na mfile deny, na yewe kwavaangwa ni nndu llyamari ukya llya kuleirwa.

⁹ Kimaruma kya irina lyakwa shishefwerisaa unyafi lwakwa; na kimaruma kyafo shisisirye shilakurumate.

¹⁰ Lola yeny, mmbo shikwiitaa kyeesony kya muro, lyo nshe sha muro wa yeesa fesa-fo.

¹¹ Nkimaruma kyakwa, nkimaruma kyakwa yeny shimuni shishetanaa indo. A ndesa irina lyakwa lyitefuswaa? Nta nshiniinga ungyi usuri lwakwa-fo.

Koreshi nsongoru nsauwe ni Nndumi Iruva

¹² Shaarannya Yeny, ewe Yakobo na Israeli shilekuvaanga; Yeny mmbwe yeny ni wa mapookyony na mafurumyony.

¹³ Eeda woko lwakwa luvikye nsuka wa ulana na woko lwakwa usha lukaala ngina na shafivaanga fishesalala-fo ando amwi.

¹⁴ Kuumbyeny mwoose mushaarannyi, a ni vi nnang'ani yaawo alevambisa mbony eti? Nndumi Iruva alenkunda, asheinutyaa shaasa akunda kya Babilony na woko lwakwe navike uwe ya Vakaldayo.

¹⁵ Yeny, eeda yeny shammaamba, ee shammembaanga shammemweende nawe ashesongovisaa shia yakwe.

¹⁶ Oshony kufii, arannyiny mbony eti ukya elyo mapookyony nshilerera kirumo-fo, ukya lya fyeifo, yeny sheifo na ulaalu ni Nndumi Iruva ashiruma na mumuyo wakwe.

Uramba lwa Nndumi Iruva kwa vandu vakwe

¹⁷ Nndumi Iruva mwikira wafo, mweele wa Israeli aamba endi, “Yeny ni Nndumi Iruva wafo, shikee ikulosha naambo kuone mbusha, shikee ikoora shia isennyi kulatye.

¹⁸ Kyevaa kyeni kwakooya kwelatya mavavaso akwa, llyo ufoo lwakwa lwevaa sha mwalukoluko wa mura efo yeeveny.

¹⁹ Lyingyi vana vafo vashevaa sha nsanga wa yewo vauka nsangeny wafo sha kyaana, irina lyakwe llyesherumakaa nta irekywa-fo.”

²⁰ Naasany, risheny muuke efo Babilony efo kwa Vakaldayo. Ambeny paa kya ifura na iimba, ambeny kyifikye maavyony a ulana mwishambaa, Nndumi Iruva ammauwa ishinga lyakwe Yakobo.

²¹ Nta mmbaleitya kyaakuta llya alevatetera efo kasa kyuumu-fo. Aleuta mura uuka efo iweny kimaruma kyawo. Na lyingise kapara mwaamba mura mwiingi ukashoshoka.

²² “Nkwiifo ufoo kwa varavi-fo,” Ni Nndumi Iruva aamba.