ISAYA 47 - BIBILLYA Mareiyo Meele a Iruva

Uvingo lwa Babilony

¹ Osho, oloka kukee rembo efo kiluulyiny ewe mwana wa kyeny wa Babilony. Kaa sumbai kulaiyo kitima kya umangyi, ewe sambura ya Vakaldayo; mashika nkushekivaango-se mmamiri kukundye fya usuri-fo.

² Ipoo isewe, kuse nswa, kwaammbwe ngyireto tafo na masara afo. Lambara marende afo kwiire mura.

³ Umbereto lwafo lushelollyo na usutu lwafo kumanyike. Shishetaiyaa kiduva, nta nshishewaryaa nndu moose-fo.

⁴ Mwikira weeru, Nndumi Iruva wa matorito llyo irina lyakwe, mweele wa Israeli.

⁵ Malallya sau, anga ireeminy eni sambura ta Vakaldayo; mashika nkushekivangwaa-se nka wa kimangyi-fo.

⁶ Shetiri isswa na vandu vakwa, shatefusa umasi lwakwa shavavika maakony afo yewe; nta nkulevalillya-fo, mmbo kulevavika vamiku vawo mashoreny moomu deny.

⁷ Nkuleamba yeve mmbo kuvaa nka wa kimangyi llung'anu, nta nkulekusununda kya efyo-fo nta kukumbwee ufishony lwa vayo-fo.

⁸ Ulaaluny, arannya mbony eti, yewe mwiikunda utore, yewe kulollye kwiifo urilalyi Yewe kukulolye sheelyi yewe ni yewe na nkwiifo mmwaasi yafo-fo. Nshishekaa sha nka wa ding'u nta nshishefiywaa ni vana-fo.

⁹ Kya indi mbony eti ivii tisheshaa kwafo nkonu umwi, kyeeri kyimwi, ifiywa na vana na mmi fishekusheyaa deny; usavi lwafo naakwa lwafumbuka, na vaanga lwafo na lukang'ana inda.

¹⁰ Ni kimaruma yewe kukusirye uravi lwafo kwishambaa, “Nkwiifo ashilolye-fo; na umanyo lyafo na urango lwafo fyankureta, na yewe kwaamba nrimeny kwafo, ‘Yeny mmbwe, nta nkwiifo ungyi mmwaasi yakwa-fo.’

¹¹ Kyeendwa ni ekyo, ukasha lushekusheyaa nkushidimaa ikwauwa-fo, na ting'wa tishekuroywaa nta nkushidimaa ikuutafo-fo; na ungwera kushekushingillyaa na pyany kulalwiishi.

¹² Salala ulaalu, na vaanga vafo, na wiingyi lwa usavi lwafo kulekulumba nalo ukya ukoo lwafo, kweenda ndesa kusheonaa-fo mbusha ao kungyi kushevingaa.

¹³ Kwemaraa kya wingyi lwa mbony tafo, naasa vasalale ewo veeshi mbony ta nyinyiri, na imanya filya fishaa mwiiriny eto, vashekukira na mbony eto tikeeikusheya.

¹⁴ “Lola vashevaa sha matungururu, vashemamitwa ni muro, nta mmbashekyaa-fo, nkushekaa-fo nta makaa erorwa nta yoorwa-fo.

¹⁵ Ni indo kishevaa kya mbony eti kukee ikwaarisa nato. Valya kweekabaa nawo mbusha ukya ukoo lwafo vashenyanyakaa kwaasha neewe wo nndu neende kyakwe, nta kuleefo wa ikwauwa.”