ISAYA 46 - BIBILLYA Mareiyo Meele a Iruva

¹ Yaa mmasiiyony a maruva a Babeli Yeve iruva Beli kwammbwa, na iruva Nebo kwansambuka, mafwanu awo ansaamiswa uwe ya ng'umbe na findo filya mwekeyoondwa efo na efo ulaalu fyammba iryo; iryo lya irovya nshungu waaraye.

² Vankulema vakakulema woose kyimwi; lyo mmbaidima ikurrwa-fo kya indi wo vakarawo kifingyony.

³ Shaaranyiny eni mmba ya Yakobo, eni mukee masaaro a mmba ya Israeli, shilemwiipoo uka kulaore mwammiirwa, mukavikwa ando a uve ukya elyo fika umikuny lwany,

⁴ Yeny mmbwe naakwa ni kyeeri kya ukuu lwany shimwipoo, shiletana indo, ee da shishemwipoo na imukira.

⁵ A mmbo mushiinanisaa na vi na ishaananisa nawe naambo lwiinane?

⁶ Vandu vauta saabu yuuka mbolokony tawo na yeesa meseny tawo, vakavika varundi vandesongosya saabu vakaallwa nng'u maruva awo veefiryandi na iyaarafuma.

⁷ Vashiipoo na iseleesa ando a vayo akasalala, eeda ashevangwaa, lyo nnyashidimaa irouwa nta imwauwa efo ukyiveny lwakwe-fo.

⁸ Kumbweny efi, mundesalala kyuumi, umburaneny eni mukeilyamara.

⁹ Kumbweny mbony ta elyo kasha, mashika yeny ni Iruva, nta kulaifo ungyi, Yeny ni Iruva kulaifo ainani na yeny.

¹⁰ Mmbo shivambisye mbony uka mapookyony fika mafurumyony na ukya elyo kasha mbony kulaore tilentanyika shisheambaa. Usumanu lwakwa llo lushesalalaa. Nshishetanaa kilya kishisennyi yeny.

¹¹ Shavaanga ngoru uka taari ya ngama na nndu wakwa uka uruka lwa kwaasha, ee shammaamba, na yeny shishetanaa.

¹² Shaarannyiny eni mutiri ngoo shuumu, yeni mukee kwaasha na usumanu.

¹³ Yeny shisheendee kufii usumanu lwakwa, llushekaa kwaasha, na ukiro lwakwa llushekyeywaa-fo; na Yeny shishevikaa ukiro efo Sioni kimaruma kya Israeli, usuri lwakwa.